Сэтинньи 5 күнүгэр олохтоох култуура дьиэтигэр, Ил, эйэ, норуоттар сомоҕолоһууларын бэлиэ күнүнэн бука бары бар дьоммутун истиҥник эҕэрдэлээн туран, «Дугуйа хаампыт Дугуйдаан Боотур» документальнай киинэ уһуллан – таҥыллан, оҥоһуллан тахсан — аан бастаан киэҥ эйгэҕэ таһааран көрдөрүү биһиги нэһилиэктэн саҕаланна. Бу күн мустубут нэһилиэк олохтоохторугар Дугуйдаан Винокуров Өймөкөөнтөн Магадааҥҥа айаннаабытын туһунан уһуллубут олус интириэһинэй ис хоһоонноох документальнай киинэни сэҥээрэн көрдүбүт.
«Дугуйа хаампыт Дугуйдаан Боотур» документальнай киинэҕэ уһун сылаалаах айаҥҥа хорсун, тулуурдаах, ыарахаттартан чаҕыйбат уонна эрэллээх арыаллыыр аргыстардаах, араас мүччүргэннээх да түгэннэри ааһан, саха сылгыларын Дьөһөгөй оҕолорун тулуурдарын, эрэллээхтэрин сөҕө махтана билистибит.
Документальнай киинэ көрдөрүүтүн устата, Дугуйдаан, доҕотторунаан хайдах ыраах айаҥҥа бэлэмнэммиттэрин, саха ата барахсан саха киһитин мииниллэр минэтэ буолан, түөрт түөрэм туйаҕа лочугураан хоту- соҕуруу сындалҕаннаах айан суолун тилийэ сылдьыбытыгар олоҕуран сиһилии билиһиннэрэрэ олус кэрэхсэбиллээҕин бэлиэтээтибит.
Дугуйдаан Боотур ат миҥэлээх айанын көрөн баран, билиҥҥи үлэ үөһүгэр сылдьар ыччат дьоммутунан киэн тутуннубут.
Бу киинэни биир тыынынан көрөн долгуйдубут уонна олус дириҥ ис хоһоонноох киинэ буолан тахсыбытын бэлиэтээн, көрөөччү сэҥээриитин ылыа диэн бигэ эрэллээхпит .
Саха, сылгы куттаах ыччаттарбытыгар анаммыт «Дугуйа хаампыт Дугуйдаан Боотур» документальнай киинэ – чахчы да барыбыт дууһатын долгутта, хорсун санаалаах Дугуйдаан Боотур кэлэр кэнчээри ыччаттарбытыгар үтүө холобур буола турдун!
