Балаҕан ыйын 18 күнүгэр нэһилиэкпит эдэр фермердэрэ Илья Егорович Мохначевскай, Дьулустан Геннадьевич Говоров холбоһуктаах саҥа саҕалыыр бырайыактарынан 78-80 га иэннээх «Бүөтүр солооһуна» бааһынаны күрүөлээһиҥҥэ бастакы субуотунньук тэрилиннэ.
Бааһынаны бу күһүн күрүөлээһинин бүтэрэн, аны саас бурдук ыһыытын саҕалаан, кормовой база тэринии тэрээһин үлэтэ саҕаланыахтаах. Бырайыак олоххо киирэригэр олохтоох дьаһалта (баһылык Габышев Нь.В.), М.П.Габышев аатынан Балыктаах орто оскуола (директор Иванов Е.Н.), олохтоох олох-дьаһах коммунальнай хаһаайыстыба (салайааччы Харитонов С.С.), Мэҥэ-Хаҥалас улууһуттан шефтээх тэрилтэбит – МУП «Техкоммунсервис» (салайааччы Трифонов Е.И.) уонна биирдиилээн нэһилиэкпит күүстээх аҥардара, ыччаттара төһүү күүс буолан, күн бүгүн бааһына 2 га сиригэр остуолбалар туруохтара.
21 эр бэрдэ остуолба суоруу, остуолба үүтүн буурдааһын, мас тиэйиитэ, остуолба туруоруу үлэлэрин, бары биир киһи курдук, түмсэн, тэрийэн ыыттылар. «Норуот күүһэ — көмүөл күүһэ» диэн мээнэҕэ этиллибэт, мантан салгыы өссө да субуотунньуктар тэриллэн ыытыллыахтара, аҕыйах кэминэн «Бүөтүр солооһуна» бааһына төгүрүччү күрүөлэнэн, эһиил бурдук ыһарга бэлэм буолуо диэн эрэнэбит. Күрүөлээһин, сетканан бүрүйүү түмүктэннэҕинэ, ыаллыы сытар «Тумул» СХПК күүс — көмө буолан, сири таҥастааһын үлэтин ыытыахтаах.
Бу курдук, эдэр фермер уолаттарбыт хамсааһыннарын өйөөн, тэриллэр субуотунньуктарга бары, биир киһи курдук, көхтөөх кыттыыны ыларгытыгар ыҥырабыт. Бүгүн тэриллибит «Бүөтүр солооһуна» бааһына күрүөлээһинин субуотунньугар кыттыыны ылбыт нэһилиэкпит тэрилтэлэрин, шефтээх тэрилтэбит – МУП «Техкоммунсервис» эр бэрдэригэр, ону сэргэ урбаанньыт Кириллин Н.Л. бородууктанан көмөтүн иһин сылаас махтал тылларын аныыбыт. Куруутун маннык активнай позицияҕытын ыһыктыбакка нэһилиэк, улуус сайдарын туһугар үлэлиэҕин, хамсыаҕын.
