Балаҕан ыйын 12 күнүгэр олохтоох култуура дьиэтигэр нэһилиэк олохтоохторугар анаан Мэҥэ нэһилиэгэр буолаары турар баһылык быыбарыгар кандидат Габышев Ньургун Владимирович истиҥ көрсүһүү тэрийэн ыытта.
Көрсүһүү, саха дьон сиэринэн, алгыстан саҕаланна. Алгыһы түһэрдэ алгысчыт, эмчит, сиэри-туому тарҕатааччы, Саха Өрөспүүбүлүкэтин Үтүөлээх оһуохай этээччитэ, Мэҥэ Хаҥалас улууһун Дархан оһуохай этээччитэ Оконешников Денис Викторович, ону сэргэ саха эстрадатын чаҕылхай сулустара, ырыа куттаах эр бэртэрэ Байбал Сэмэнэп, Лэкиэс уонна Иннокентий Владимиров — Кештиан ырыаларынан-тойуктарынан көрсүһүүнү сэргэхтик саҕалаатылар.
Көрсүһүүнү «Мэҥэ нэһилиэгэ» тыа сирин тэриллиитин баһылыга Куприянов Александр Валерьевич иилээн-саҕалаан ыытта. Истиҥ көрсүһүүгэ Ил Түмэн депутата, Россия академиятын наукатын Сибиирдээҕи отделениетын саха сирин научнай киинин сүбэһитэ Тихон Николаевич Скрябин, Мэҥэ Хаҥалас улуууһун урбааны сайыннарар киин директора Вячеслав Иннокентьевич Санников, Ил Түмэн депутата, бааһынай-фермерскэй хаһаайыстыба баһылыга Эдгар Валентинович Константинов, «Сахаагроплем» тэрилтэ салайааччыта Алексей Дмитриевич Жирков, «Хоту» СППК бэрэссэдээтэлэ Иван Ильич Максимов, ООО «Томтор» бэрэссэдээтэлэ, бааһынай-фермерскэй хаһаайыстыба баһылыга Денис Константинович Жирков кыттыыны ыллылар.
Салгыы «Мэҥэ нэһилиэгэ» тыа сирин тэриллиитин баһылыгар кандидат Ньургун Владимирович нэһилиэгин дьонугар-сэргэтигэр инники үлэтин программатын, былаанын сырдатан билиһиннэрдэ.
Программаны истэн баран, Ньургун Владимировиһы өйөөн бэйэлэрин санааларын тириэртилэр: Говорова Мавра Иннокентьевна, Бродников Илья Николаевич, Турантаева Елена Егоровна, Иванов Егор Николаевич, Мохначевский Иван Иванович, Иванов Константин Афанасьевич.
Бу курдук «Мэҥэ нэһилиэгэ» тыа сирин тэриллиитин баһылыгар кандидат Ньургун Владимирович Габышевы кытта бэрт истиҥ көрсүһүү буолан ааста.
