Муус устар 25 күнүгэр олохтоох култуура дьиэтигэр, муус устар 27 күнүгэр Республикабыт күнэ бэлиэтэнэринэн, кэлэн иһэр бу бэлиэ күнүнэн бука бары бар дьоммутун истиҥник эҕэрдэлээн туран, Улуу кыайыы 80 сылын көрсө, өссө эрдэ, 1995 сыллаахха, 30 сыл анараа өттүгэр, Улуу кыайыы 50 сылыгар анаан, биир дойдулаахтарбыт Александра Николаевна, Павел Васильевич Габышевтар дьиэ кэргэн, сүдү үйэтитии үлэни бэйэ көҕүлээһиннэринэн тэрийэн, киинэ устан – таҥан, оҥорон таһаарбыт — «Биһиги аҕаларбыт» документальнай киинэни аан бастаан киэҥ эйгэҕэ таһааран көрдөрүү тэрилиннэ. 30 сыл анараа өттүгэр уһуллубут, сорҕото уһун сылларга мунньуллан сыппыт материалтан таҥыллыбыт уонна 30 сыл кичэллик хараллан сыппыт, аныгы технология көмөтүнэн көрдөрүллэргэ бэлэмнэммит киинэни, бу саалаҕа мустан, сэргээн сэҥээрэн көрө мустубут нэһилиэк олохтоохторугар Александра Николаевна, Павел Васильевич Габышевтар дьиэ кэргэн хайдах оҥоһуллан тахсыбытын сиһилии билиһиннэрдилэр.
Эҕэрдэ тылын, эйэлээх олох иһин Ийэ дойдуларын көмүскээн, сырдык тыыннарын толук ууран, сэрии толоонуттан эргиллибэтэх буойуттар уонна кыайыы көтөллөнөн, дойдуларыгар эргиллэн кэлэн, эйэлээх олоххо олорон, дьоһуннук үлэлээн ааспыт биир дойдулаахтарбыт, ытык – мааны Аҕа дойду улуу сэриитин ветераннарын тустарынан ахтан – санаан, дьоһун ахтыыны оҥордо «Мэҥэ нэһилиэгэ» тыа сирин түөлбэтин баһылыга Куприянов Александр Валерьевич.
Дьэ ол кэннэ долгуйа, ааспыт кэмнэри ахтан – санаан туран, «Биһиги аҕаларбыт» документальнай киинэ көрүү саҕаланна.
«Биһиги аҕаларбыт» документальнай киинэ Аҕа дойду сэриитин ытык ветераннарын, кинилэр сырдык ааттарын үйэтитэргэ, кинилэр олорон ааспыт олохторун сырдатарга ананан оҥоһуллубута. Хас да сыл аастын, кинилэр сырдык ааттара хаһан да умнуллубаттарын, үйэттэн үйэҕэ үйэтитиллэ турарын тыыннаах туоһута буолар. Ытык дьоммут олорон ааспыт олохторун, саҥа көҥүл олоҕу тутууга күргүөмнээх үлэлэрин, Ийэ дойду көмүскэлигэр бойобуой сырыыларын кэлэр кэнчээри ыччат умнуо суохтаах, олоҕун устатыгар суолдьут сулус, холобур оҥостуохтаах. Кинилэри умнубат, кинилэргэ сүгүрүйэр ытык иэспит буолар.
Убаастабыллаах Александра Николаевна, Павел Васильевич !
Нэһилиэк бары олохтоохторун ааттарыттан бу сүдү историческай суолталаах үйэтитии үлэни оҥорон, таҥан таһаарбыккытыгар, кичэллик харайан 30 сыл устата уура сылдьыбыккытыгар уонна дьон – сэргэ көрүүтүгэр таһаарбыккытынан ис сүрэхтэн тахсар махтал тылларын аныыбыт. Эһиэхэ саха алмааһыныы кытаанах доруобуйаны, этэҥҥэ буолууну баҕарабыт, өссө да элбэх интэриэһинэй бырайыактаргытынан, историяны сэгэтэн ахтан – санаан ааһар, хас биирдии киһи сүрэҕин долгутар үлэлэргитинэн үөрдэ туруҥ диэн баҕа санаа бастыҥын аныыбыт. Түгэнинэн туһанан, аныгы технология көмөтүнэн оцифровка оҥотторууга спонсордаабыт ыччаппытыгар Мохначевскай Арьян Руслановичка истиҥ махталбытын биллэрэбит. “Биһиги аҕаларбыт” документальнай киинэ – Умнубаппыт! Сүгүрүйэбит! Кэриэстиибит! Ким да умнуллубат, туох да умнуллубат!
