Дьиэ кэргэн — олох тирэҕэ, таптал уйата, үтүө үгэстэр ситимнэрэ. Бүгүн биһиги чөл олоҕу өрө тутан, биир сомоҕо буолан сүүрүү суолугар таҕыстыбыт. Сүүрүү — бу эт-хаан эрэ эрчиллиитэ буолбакка, дууһа көтөҕүллүүтэ, кыайыыга дьулуур буолар! Ыам ыйын 15 күнүгэр олохтоох култуура дьиэтигэр, нэһилиэкпит олохтоохторо, үөрэнээччилэр, ыччаттар, төрөппүттэр кыттыылаах, Аан дойдутааҕы дьиэ кэргэн күнүн чэрчитинэн, Александра Егоровна Мохначевская көҕүлээһининэн «Биир сомоҕо дьиэ кэргэн» сүүрүү бырааһынньыга буолан ааста.
«Биир сомоҕо дьиэ кэргэн» сүүрүү бырааһынньыгын иилээн – саҕалаан ыытта Мэҥэ – Хаҥалас улууһун оройуоннааҕы балыыһа психиатр-нарколог бырааһа, СР доруобуйатын харыстабылын туйгуна, 2024 сыл Мэҥэ – Хаҥалас улууһун бастыҥ общественнига, 2025 сыл түмүгүнэн Мэҥэ – Хаҥалас улууһун физкультуратын уонна спордун бастыҥ көҕүлээччитэ, «Maya.run» сүүрүктэр уопсастыбаларын салайааччыта, «Чөл Майа» общественнай тэрилтэ чилиэнэ, 2020 (2021) сс. — 21 км., 2022 с. -10 км, 2023 с. — 21. км, 2024 с. -10км. Москватааҕы, Дьокуускайдааҕы полумарафоннар кыттыылааҕа, 42.2 км дистанцияҕа Казанскай марафон кыттыылааҕа, 2025 сылга ыытыллыбыт республиканскай 22 — с Манчаары оонньууларын спартакиадатын уотун эстафетатын кыттыылааҕа Мохначевская Александра Егоровна.
Бу күн сүүрүү бырааһынньыгар мустубут бары кыттааччыллар уопсай сүүрүүгэ бэлэмнэнэн, Александра Егоровнаны көҕүлээһининэн, бары зарядка хамсаныыларын тэҥҥэ оҥордубут.
Салгыы Аан дойдутааҕы дьиэ кэргэн күнүн чэрчитинэн, Александра Егоровна Мохначевская көҕүлээһининэн, 1 км дистанцияҕа уопсай сүүрүү ыытылынна.
Уопсай сүүрүү кэнниттэн, 1 км дистанцияҕа «Биир сомоҕо дьиэ кэргэн» сүүрүүгэ стартка дьиэ кэргэнинэн оҥостон кэлбит кыттааччыларбыт сүүрдүлэр.
Сүүрүү кэнниттэн растяжкаҕа бэлэмнэнэн, сааһыланан тураммыт, бары эппитин – сииммитин дьарыктаан, Александра Егоровнаны үтүктэн хамсаныыларын тэҥҥэ оҥордубут.
«Биир сомоҕо дьиэ кэргэн» сүүрүү бырааһынньыгын түмүгэ маннык буолла.
Уопсай сүүрүүгэ: 1-кы миэстэ Слава Мохначевскай, 2-с миэстэ Лука Говоров, 3-с миэстэ Гаврил Дьяконов.
Дьиэ кэргэнинэн сүүрүүгэ: 1-кы миэстэ Дайаана, Мария Егоровна Сотниковтар дьиэ кэргэн, 2-с миэстэ Таня Сотникова, Анна Владимировна Попова аймаҕынан дьиэ кэргэн, 3-с миэстэ Амир, Рима Кимовна Фадеевтар дьиэ кэргэн.
Кыайыылаахтаарга анал грамоталары, мэтээллэры уонна өйдөбүнньүк футболкалары Александра Егоровна дохсун ытыс тыаһынан туттартаата.
«Доруобуйа» түмсүү салайааччыта Ноговицына Марфа Иннокентьевна сүүрүү күнүн тэрийбит Александра Егоровнаҕа махтанан туран, бэйэтин авторскай кинигэтин бэлэх уунна.
Салгыы «Биир сомоҕо дьиэ кэргэн» сүүрүү бырааһынньыгар Александра Егоровна сүүрүү кистэлэҥнэрин, чөл олох туһунан аһаҕас кэпсэтии тэрийэн ыытта, бэйэтин тус опытыттан санаатын атастаста.
Нэһилиэкпитигэр «Биир сомоҕо дьиэ кэргэн» сүүрүү бырааһынньыгын тэрийсибитин иһин «Мэҥэ нэһилиэгэ» тыа сирин түөлбэтин баһылыгын Габышев Нь.В. махтал суругун ыччат лидера Говоров Л.Г. туттарда. Салгыы Александра Егоровна кылааһын салайааччыта Говорова А.Н. бэйэтин санаатын тириэрдэн туран сэмэй бэлэҕин туттарда.
Бу курдук, Аан дойдутааҕы Дьиэ кэргэн күнүн чэрчитинэн Александра Егоровна Мохначевская көҕүлээһининэн «Биир сомоҕо дьиэ кэргэн» сүүрүү бырааһынньыгын бары бииргэ көрүстүбүт. Сэргээн сэҥээрэн кэлэн көхтөөх кыттыыны ылбыт, доруобуйаларын тупсарбыт нэһилиэкпит олохтоохторугар, үөрэнээччилэрбитигэр, ыччаттарбытыгар, төрөппүттэрбитигэр кэлэн биһигини кытта бииргэ буолбуккутугар, сүүрүү бырааһынньыгын тэрийбит Александра Егоровнаҕа уонна «Доруобуйа» түмсүү Далбар Хотуттарыгар (салайааччы Ноговицына М.И.) итии чэйдээх сандалы тэрийбиккитигэр махтал сылаас тылларын аныыбыт. Дьиэ кэргэҥҥит сылааһа мөлтөөбөтүн, доруобуйаҕыт туругура турдун!
