Сэтинньи 21 күнүгэр олохтоох култуура дьиэтигэр «Мындыр саас» бырайыак чэрчитинэн, «Биһиги Сойууска төрөөбүт дьоллоохпут!» — девизтээх 12-с төгүлүн ыытыллыбыт Мэҥэ Хаҥалас улууһун аҕам саастаахтарын «Сулустаах эстэпиэтэ» бэстибээлэ буолан ааста.
Сарсыардаттан «Сулустаах эстэпиэтэ» бэстибээлигэр ыраахтан, чугастан кэлбит нэһилиэктэр уус-уран кэнсиэрин кыттыылаахтарын, ыалдьыттарын, өбүгэбит саҕаттан илдьэ кэлбит ыалдьытымсах сиэринэн, «Доруобуйа» (салайааччы Ноговицына М.И.) уонна «Арчы» (салайааччы Рожина Н.Ф.) түмсүүлэр далбар хотуттара саха мааны аһынан – алаадьынан үөрэ – көтө көрүстүлэр.
«Сулустаах эстэпиэтэ» бэстибээл үөрүүлээх аһыллыытыгар кэлбит ыалдьыттарга анаан эҕэрдэ тылын тириэртэ «Мэҥэ нэһилиэгэ» тыа сирин тэриллиитин баһылыга Ньургун Владимирович Габышев.
Бэйэтин эҕэрдэтин, дьүүллүүр сүбэни билиһиннэрдэ Мэҥэ Хаҥалас улууһун аҕам саастаахтарын сэбиэтин бэрэссэдээтэлэ Евдокия Саввична Решетникова.
«Сулустаах эстэпиэтэ» бэстибээл үөрүүлээх аһыллыытын Петр Никитин ылбаҕай ырыатынан киэргэтэн ситэрэн-хоторон биэрдэ.
«Сулустаах эстэпиэтэ» бэстибээлин дьүүллүүр сүбэтигэр үлэлээтилэр: Шарина Зоя Васильевна – дьүүллүүр сүбэ бэрэссэдээтэлэ, СР култууратын туйгуна, улуустааҕы култуура бэтэрээннэрин сүбэтин салайааччыта; Скрябина Татьяна Николаевна – СР социальнай сулууспатын үтүөлээх үлэһитэ, улуустааҕы бэтэрээн сэбиэтин бэрэссэдээтэлин солбуйааччыта; Федоров Улмас Егорович – улуустааҕы култуура уонна духуобунай сайдыы салалтатын методиһа.
Салгыы Мэҥэ нэһилиэгин ытык – мааны бэтэрээннэрэ 7 ирдэнэр нүөмэрдээх концертнай программаларын арыйан, утуу – субуу, иэйэн – куойан туран, бэрт сэргэх, бииртэн биир чаҕылхай нүөмэрдэри көрөөччүлэргэ бэлэх ууннулар:
«Талба» ветеран үҥкүү ансаамбылын коллективын толоруутугар үҥкүү «Крушина», салайааччы СР үтүөлээх үлэһитэ Сардана Стручкова.
Вера Фадеева толоруутугар ырыа — Анастасия Варламова тыла, дьүрүлэ «Майя-Алдан».
Туйаара Стручкова – Огдооччуйа репертуарыттан сыаҥка «Дьиэтээҕи үлэ». Оруолларга: эбээ – Елена Кычкина, уол сиэн – Егор Афанасьев.
Саха суруйааччыларын Ийэ дойду көмүскэлигэр анаммыт айымньыларыттан таҥыллыбыт уус-уран ааҕыы «Аналбыт – эрэнэ кэтэһии», салайааччы Сардана Молукова.
70 – 80 сыллардааҕы ретро муода, (бэлэмнээтэ Надежда Рожина).
Татьяна Цыденжапова толоруутугар «Хомуска сахалыы матыыптар».
«Ситим» эр дьон вокальнай ансаамбылын толоруутугар ырыа – Марфа Куличкина тыла, Валерий Ноев дьүрүлэ «Күөрэгэй», салайааччы СР култууратын туйгуна Иван Прибылых.
Мэҥэ нэһилиэгин уус-уран кэнсиэрин иилээн-саҕалаан ыытта Лариса Кычкина.
Дьүүллүүр сүбэ сыанабылынан лауреат үрдүк аатын ылары ситистилэр:
«Талба» үҥкүү коллективын «Крушина» үҥкүүтэ.
Вера Фадеева «Майя-Алдан» ырыата.
Татьяна Цыденжапова толоруутугар «Хомуска сахалыы матыыаптар».
«Ситим» эр дьон вокальнай ансаамбыла «Күөрэгэй» ырыата.
Дипломант үрдүк аатын сүктүлэр:
Елена Кычкина, Егор Афанасьев толорууларыгар сыаҥка «Дьиэтээҕи үлэ».
«Аналбыт – эрэнэ кэтэһии» уус-уран ааҕыы.
Салгыы кэрэни кэрэхсиир, үтүөнү үксэтэр, үтүө үгүс дьоннордоох «Дьабыыл», «Мөҥүрүөн», «Ходоро», «1-кы Тыыллыма», «1 -кы Баатара», «2-с Наахара» нэһилиэктэрин «Биһиги Сойууска төрөөбүт дьоллоохпут!» — девизтээх 12-с төгүлүн ыытыллар Мэҥэ Хаҥалас улууһун аҕам саастаахтарын «Сулустаах эстэпиэтэ» кыттыылаахтара, бииртэн биир чаҕылхай нүөмэрдэринэн ыллаан – туойан, үҥкүүлээн, сыанкалаан, хоһоон ааҕан, уус-уран кэнсиэрдэрэ үрдүк таһымҥа аастылар.
Улуустааҕы аҕам саастаах дьоҥҥо аналлаах уус – уран көрүү бэстибээл балаһыанньатын быһыытынан, Сойуус кэминээҕи фотозона туруоруу ирдэммитэ. Бу күн нэһилиэкпит тэрилтэлэрэ: олохтоох дьаһалта (баһылык Габышев Н.В.), М.П.Габышев аатынан Балыктаах орто оскуолата (директор Иванов Е.Н.), «Звездочка» оҕо уһуйаана (сэбиэдиссэй Кычкина А.С.), ОДьКХ (салайааччы Харитонов С.С.), ветеринарнай учаастак (сэбиэдиссэй Кычкина Л.Л.) коллективтара СССР кэминээҕи бэйэлэрин эйгэлэрин сырдатар, ону сэргэ көрдөһүүбүтүн ылынан, Трифонова Елизавета Алексеевна «Ферма кыһыл муннуга» фотозоналары туруорбуттарын кэлбит ыалдьыттар, нэһилиэк олохтоохторо сөҕө-махтайа көрдүлэр, өйдөбүнньүк хаартыскаҕа түстүлэр.
Көрдөһүүбүтүн ылынан, ыалдьыттарга анаан, сылаас эгэлгэ ас атыытын тэрийдилэр Маргарита Васильевна Катакинова, Туймаада Леонидовна Дьяконова уонна 11 кылаас үөрэнээччилэрин төрөппүттэрэ. «Биһиги Сойууска төрөөбүт дьоллоохпут!» — девизтээх 12-с төгүлүн ыытыллар Мэҥэ Хаҥалас улууһун аҕам саастаахтарын «Сулустаах эстэпиэтэ» бэстибээлигэр кыттыыны ылбыт ыалдьыттарбыт ас арааһыттан амсайан, минньигэһин бэлиэтээн, махтанан, бука бары дуоһуйан, астынан тарҕастылар.
Тэрээһиммит үрдүк таһымҥа ааһарыгар күүс-көмө буолбут бука бары дьоммутугар олохтоох култуура дьиэтин коллективын аатыттан сылаас махтал тылларын аныыбыт. Бу курдук нэһилиэкпит сайдарын туһугар, бары биир сомоҕо буолан үлэлиэҕин, иннибит диэки эрэллээхтик хардыылаан иһиэҕиҥ! Дьоллоох буолуҥ! Доруобай буолуҥ!
Бэртээхэй тэрээьин ааспыт