Олунньу 23 күнүгэр олохтоох култуура дьиэтигэр нэһилиэкпитигэр Аҕа сылын чэрчитинэн, Аҕа дойдуну көмүскээччилэр күннэригэр аналлаах тэрээһин уонна тэрилтэлэр, нэһилиэкпит эр дьоннорун, оскуола үөрэнээччилэрин 5 киһи кыттыылаах сүүмэрдэммит хамаандалар икки ардыларыгар «Өбүгэ оонньуулара — 2024» күрэхтэһии буолан ааста. Күрэхтэһиигэ 6 көрүҥҥэ уопсайа 25 кыттааччы илин-кэлин түһүстүлэр.
Аҕа дойдуну көмүскээччилэр күннэригэр аналлаах тэрээһин биһиги бүгүҥҥү сырдык күммүт иһин олохторун толук уурбут ыччаттарбытын Ариан Колесовы, Николай Кычкины кэриэстээн чуумпуруу мүнүүтэттэн саҕаланна.
Билиҥҥи кэмҥэ оскуола үөрэнээччилэригэр байыаннай-патриотическай иитиигэ улахан болҕомто ууруллан, сыллата ыытыллар байыаннай-строевой хаамыыларга дьаныардаахтык бэлэмнэнэллэр, араас байыаннай-патриотическай күрэхтэргэ ситиһиилээхтик кытталлар. Бу күн Михаил Прокопьевич Габышев аатынан Балыктаах орто оскуолатын үөрэнээччилэрэ саалга мустубут көрөөччүлэргэ, күрэхтэһии кыттыылаахтарыгар анаан строевой хаамыыны көрдөрдүлэр.
Аҕа дойдуну көмүскээччилэр күннэринэн эҕэрдэ тылын тириэртэ «Мэҥэ нэһилиэгэ» тыа сирин тэриллиитин баһылыгын солбуйааччыта Иван Егорович Мохначевскай.
Үтүө үгэскэ кубулуйбут нэһилиэкпит үбүлүөйдээх саастарын туолбут ытык дьоннорбутун чиэстээн эҕэрдэлээһин салҕанар. Ол курдук 70 саастарын туолбут ытык-мааны ветераннарбытыгар эҕэрдэ сурук, анал сувенирдар туттарылыннылар:
Ноговицын Дмитрий Николаевичка — «Максим Горькай» аатынан, «Мэҥэ» сопхуос, олохтоох олох дьаһах коммунальнай хаһаайыстыба тэрилтэлэригэр эҥкилэ суох үлэлээбит ытык-мааны ветеран, элбэх оҕолоох ыал амарах аҕата, эйэҕэс эһээтэ.
Андросов Петр Ильичка — үлэ ветерана, «Максим Горькай» аатынан, «Мэҥэ» сопхуоска эҥкилэ суох таһаарыылаахтык тракториһынан үлэлээбит ытык-мааны ветеран, нэһилиэкпит спортивнай олоҕор активнай кыттааччы, саахымакка күн бүгүн нэһилиэк чиэһин үгүс күрэхтэһиилэргэ көмүскүүр биир бастыҥ спортсмен.
Түгэнинэн туһанан, байыаннай дьайыы ветераныгар, нэһилиэкпит бастыҥ общественнигар Ноговицын Семен Александровичка бэлиэ күнүнэн олохтоох дьаһалта аатыттан эҕэрдэ, анал бириис туттарылынна.
5 киһи кыттыылаах сүүмэрдэммит хамаандалар икки ардыларыгар «Өбүгэ оонньуулара — 2024» күрэхтэһии балаһыанньатын, хаамыытын билиһиннэрдэ кылаабынай судьуйа Михаил Русланович Барабанов.
Тэрээһин үөрүүлээх чааһыгар култуура дьиэтин директора Любовь Васильевна Кычкина саамай активнай позициялаах ыччаттары, эр хоһууннары, кинилэринэн сирэйдээн нэһилиэкпит бары аҕаларын, эр дьонун Аҕа дойдуну көмүскээччилэр күннэринэн эҕэрдэлээтэ уонна бу тэрээһин кыттыылаахтарын олохтоох култуура дьиэтин коллективын аатыттан минньигэс тордунан күндүлээтэ.
Аҕа дойдуну көмүскээччилэр күннэригэр аналлаах тэрээһин үөрүүлээх чааһын музыкальнай нүөмэрдэринэн ситэрэн-хоторон киэргэттилэр:
«Үрүйэ» үҥкүү бөлөҕүн толоруутугар «Сир симэхтэрэ», салайааччы Лилия Долгунова.
Далаана репертуарыттан «Чэмэлиинэ» ылбаҕай ырыатынан Айыына Олесова.
«Сайдыына» вокальнай ансаамбыл толоруутугар «Күөрэгэй», салайааччы Рима Фадеева.
5 киһи кыттыылаах сүүмэрдэммит хамаандалар икки ардыларыгар «Өбүгэ оонньуулара — 2024» күрэхтэһиигэ — салгын саанан ытыы, ох саанан ытыы, мээчиги киллэр, бэһирик сүүрдүү, дартс уонна өйү сытыылыыр ыйытыктарга хоруйдуур викторина көрүҥнэргэ тыҥааһыннаах, ыһыылаах-хаһыылаах, илин-кэлин түсүһүүлээх күрэхтэһии түмүгэ маннык буолла:
«Дартс» көрүҥэр 1-кы миэстэ — «5 фермер» хамаанда (109 очколаах), 2-с миэстэ бастакы холонууга тэҥ очколанан, иккистээн быһаарсыы түмүгүнэн быһаарылынна, онон 2-с миэстэ – «Чемпионы» хамаанда (107 + 39 очколаах), 3-с миэстэ – «ЦК» хамаанда (107 + 28 очколаах), 4-с миэстэ – «Дьулурҕан» хамаанда (106 очколаах), 5-с миэстэ – «Бэргэн» хамаанда (99 очколаах).
«Салгын саатын ытыы» көрүҥэр 1-кы миэстэ — «ЦК» хамаанда (41 очколаах), 2-с миэстэ – «Бэргэн» хамаанда (35 очколаах), 3-с миэстэ – «Дьулурҕан» хамаанда (31 очколаах), 4-с миэстэ – «5 фермер» хамаанда (26 очколаах), 5-с миэстэ – «Чемпионы» хамаанда (15 очколаах).
«Мээчиги киллэр» көрүҥҥэ 1-кы миэстэ — «ЦК» хамаанда, 2-с миэстэ – «Чемпионы» хамаанда, 3-с миэстэ – «Бэргэн» хамаанда, 4-с миэстэ – «5 фермер» хамаанда, 5-с миэстэ – «Дьулурҕан» хамаанда.
«Ох саанан ытыы» көрүҥҥэ 1-кы миэстэ — «Чемпионы» хамаанда, 2-с миэстэ – «5 фермер» хамаанда, 3-с миэстэ – «Бэргэн» хамаанда, 4-с миэстэ – «ЦК» хамаанда, 5-с миэстэ – «Дьулурҕан» хамаанда.
«Бэһирик сүүрдүү» көрүҥэр 1-кы миэстэ — «Чемпионы» хамаанда (5м, 15см), 2-с миэстэ – «5 фермер» хамаанда (4м, 14см), 3-с миэстэ – «Бэргэн» хамаанда (93см), 4-с миэстэ – «ЦК» хамаанда (70см.), 5-с миэстэ – «Дьулурҕан» хамаанда (46см.).
«Викторина» көрүҥэр 1-кы миэстэ — «Чемпионы» хамаанда, 2-с миэстэ – «Бэргэн» хамаанда, 3-с миэстэ – «ЦК» хамаанда, 4-с миэстэ – «5 фермер» хамаанда, 5-с миэстэ – «Дьулурҕан» хамаанда.
Уопсай түмүккэ 12 очкону ылан, эрэллээхтик чемпион аатын сүгэн, 1-кы миэстэ ылары ситистэ «Чемпионы» хамаанда. Чемпионнарга анал мэтээл, сэмэй бириистэр туттарылыннылар.
Бэрт кыранан хаалан 16 очкону ылан 2-с миэстэҕэ «ЦК» хамаанда тахсан, анал мэтээллэринэн, сэмэй бириистэринэн нааҕараадалананнар үөрүүлэрэ үксээтэ.
17 очкону ылан 3-с бочуоттаах миэстэни ылары ситистэ «5 фермер» хамаанда. Хамаандаҕа анал мэтээл, сэмэй бириистэр ананнылар.
Өссө төгүл эркин курдук эрэнэр эр бэрдэрбитин Аҕа дойдуну көмускээччилэр күннэринэн эҕэрдэлиибит. Барыгытыгар чэгиэн-чэбдик туругу, энчирээбэт эрчими, булгуруйбат модун санааны баҕарабыт. Чугас дьоҥҥут этэннэ буоллуннар, үлэҕит-хамнаскыт ситиһиилэннин, иннигит диэки эрэллээхтик хардыылаан иһин!
