Кулун тутар 31 күнүгэр олохтоох култуура дьиэтигэр оҕуруот үүннэриитин киэҥник баһылаабыт Дьяконова Евдокия Васильевна нэһилиэк олохтоохторугар анаан арбуз үүннэриитин туһунан маастар-кылаас тэрийэн ыытта.
Бу күн маастар-кылааһы интэриэһиргээн кэлбит истээччилэргэ Евдокия Васильевна арбуһу хайдах прививкалаан (атын үүнээйигэ сыһыаран) тымныыга тулуурдаах гына үүннэрэр туһунан кистэлэҥнэрин билиһиннэрдэ, баай уопутуттан үллэһиннэ. Ону сэргэ хайдах олордор, хайдах көрөр-истэр туһунан сиһилии кэпсээтэ, сүбэ-ама биэрдэ, боппуруостарга эппиэттээтэ, бастыҥ сортаах арбуз сиэмэлэрин атыылаата.
«Арбуз — саха сиригэр!» маастар-кылааһы иилээн-саҕалаан ыыппыт оҕуруотчут Далбар Хотуҥҥа Евдокия Васильевнаҕа туһалаах сүбэлэрин иһин сылаас махтал тылларын аныыбыт. Мантан сайын нэһилиэкпит оҕуруотчуттара сахабыт сирин сайынын манньытар минньигэс аһын арбуһу үүннэриэхтэрэ диэн эрэнэбит.
