Хас биирдии киһиэхэ саамай күндү, саамай сырдык бырааһынньык — Кыайыы күнэ! 81 сыл анараа өттүгэр бүгүҥҥү биһиги дьоллоох, эйэлээх олохпутун түстээбит, сыл-хонук төһө да ааспытын иһин, хас да, көлүөнэ дьон үөскээбитин-төрөөбүтүн иһин хаһан да өлбөөдүйбэт, хаһан да саппаҕырбат, Улуу Кыайыы чаҕылхай, сандаархай, үөрүүлээх күнэ үүммүтэ. Бүгүн уот силлиэ охсуһуу хонуутугар сырдык тыыннарын толук уурбут, өлүүнү туораан, кыайыы-хотуу көтөллөнөн, дойдуларыгар эргийбит албан ааттаах буойуттарга, тыылга кыайыыны уһансыбыт үтүө үлэһит дьоммутугар сүгүрүйэр, махтанар, эҕэрдэлиир ытык күммүт. Ыам ыйын 8 күнүгэр олохтоох култуура дьиэтигэр тыыл ветераннарыгар, сэрии сылын оҕолоругар, 70-тан үөһээ саастаах ытык дьоннорбутугар, Улуу кыайыы күнүнэн, «Айхаллан, Кыайыы күнэ!» бырааһынньыктааҕы сандалы тула истиҥ эҕэрдэлээх тэрээһин буолан ааста.
Тэрээһин саҕаланыытыгар эриэккэс олоҕу көрбөккө охтубут буойуттары, эргиллэн кэлэн олох олорботохтору, ааттарын обелистарга хаалларбатахтары, өлүүттэн ордон, кыайыыны өрө уунан тыыннаах эргиллэн кэлэн эйэлээх олоҕу олорон ааспыт ветераннарбытын сүһүөххэ туран уһун үйэлэргэ кэриэстээтибит.
Эҕэрдэ тылын тириэртэ Мэҥэ нэһилиэгэ тыа сирин түөлбэтин баһылыга Ньургун Владимирович Габышев уонна Улуу кыайыы 81 сылынан эҕэрдэ суруктарын, ону сэргэ нэһилиэк ветераннарын сэбиэтэ (салайааччы Кычкина Е.К.) көҕүлээһининэн, нэһилиэккэ ыытыллыбыт «Үтүө санаа долбуура» акциянан оҥоһуллубут анал бородууктанан бэлэхтэри туттарда:
Үлэ, тыыл ветераннарыгар, ытыктабыллаах Заровняева Вера Григорьевнаҕа, Черкашин Егор Николаевичка, Стручков Иван Егоровичка.
Тыылга улуу кыайыыны уһансыбыт, кыайыы туһа диэн хара көлөһүннэрин тохпут, оонньоммотох оҕо сааһы ааспыт сэрии сылын оҕолоругар, күн бүгүн ытык-мааны ветераннарбытыгар:
Үлэ ветераннарыгар Протодьяконов Афанасий Никифоровичка, Габышева Мотрена Игнатьевнаҕа, Габышева Марфа Николаевнаҕа, Куприянова Розалия Николаевнаҕа, Харитонова Марфа Петровнаҕа, Винокуров Николай Семеновичка, Винокурова Анна Христофоровнаҕа, Максимова Дария Архиповнаҕа, Ноговицына Елена Васильевнаҕа.
«Айхаллан, Кыайыы күнэ!» бырааһынньыктааҕы сандалы тула истиҥ эҕэрдэлээх тэрээһини эҕэрдэ нүөмэрдэринэн киэргэтэн, ситэрэн-хоторон биэрдилэр:
«Кыайыы күнэ» ырыанан «Сайдыына» вокальнай ансаамбыл, салайааччы Рима Фадеева.
Ытык-мааны ветераннары «Ньургуһуннар» ырыанан эҕэрдэлээтилэр «Доруобуйа» түмсүү, салайааччы Марфа Иннокентьевна Ноговицына.
Нэһилиэкпит ветераннарын сэбиэтин Далбар Хотуттара бэйэлэрэ тиктибит сахалыы былааччыйаларынан муода.
Булат Окуджава тылыгар уонна дьүрүлүгэр «Нам нужна одна победа» ырыанан Мотрена Монастырева.
«Доруобуйа» түмсүү уонна нэһилиэк ветераннарын сэбиэтин Далбар Хотуттара төрүт үгэһинэн тигиллибит сахалыы мааны соннорун эргийэ хааман көрдөрдүлэр.
«Смуглянка» үҥкүүнэн «Үрүйэ» үҥкүү коллектива, салайааччы Лилия Долгунова.
«Доруобуйа» түмсүү далбар Хотуттарын көрдөрүүлэригэр муода – хаппар киэргэллээх ыһыахха кэтиллэр сахалыы мааны былааччыйа.
Анна Барашкова тылыгар уонна дьүрүлүгэр «Мин дойдум» ырыаны бэлэх ууннулар Гаврил Дьяконов, Вадим Шепелев, Евгений Дьяконов.
Нэһилиэк ветераннарын сэбиэтэ бэлэмнээбит бырааһынньыктааҕы итии чэйдээх, сылаас астаах сандалы тула олорон ирэ-хоро кэпсэтэн, ааспыты ахтан, бу үөрүүлээх күн мустубут ытык-мааны ветераннарбыт эҕэрдэ тылларын, ырыаларын-тойуктарын тириэртилэр.
Нэһилиэк ветераннарын сэбиэтэ «Айхаллан, Кыайыы күнэ!» бырааһынньыктааҕы тэрээһин кыттыылаахтарыгар анаан араас интэриэһинэй, көрдөөх оонньууларын оонньоттулар, кыайыылаахтарга бириистэри туттартаатылар. Ону сэргэ бэйэлэрин сылаас илиилэринэн тикпит бэлэхтэрин кэлбит ытык-мааны ветераннарга бэлэх ууннулар.
Ытык-мааны ветераннарбыт сандалы тула олорон, ирэ-хоро кэпсэтэн, уруккуну ахтыһан, ырыа ыллаан, урукку музыканан үҥкүүлээн, дуоһуйа сынньанан, үөрэн-көтөн тарҕастылар.
Бу курдук Улуу Кыайыы 81 сылын бииргэ түмсэммит, өрө көтөҕүллэн көрүстүбүт. Сандалы тула тэриллибит «Айхаллан, Кыайыы күнэ!» бырааһынньыкпытыгар күүс-көмө буолбут дьоммутугар: бэрэски, салаат астаабыт М.П.Габышев аатынан Балыктаах орто оскуолатын (директор Иванов Е.Н.), минньигэс соккуой астаабыт «Звездочка» оҕо уһуйаанын (сэбиэдиссэй Кычкина А.С.), саллаат хааһытынан күндүлээбит олох-дьаһах коммунальнай хаһаайыстыба (салайааччы Харитонов С.С.) коллективтарыгар, арыылаах саламаатынан айах туппут Ноговицына Е.А., нэһилиэк ветераннарын сэбиэтигэр (салайааччы Кычкина Е.К.), ону сэргэ музыкальнай эҕэрдэлэринэн киэргэппит «Доруобуйа» түмсүү (салайааччы Ноговицына М.И.), «Сайдыына» вокальнай, «Үрүйэ» үҥкүү коллективтарыгар, эдэр кэскиллээх ырыа куттаах уолаттарбытыгар уонна ытык- мааны ветераннарбытыгар кэлэн ыалдьыттаабыккытыгар сылаас махтал тылларын аныыбыт. Баҕарабыт саха алмааһыныы кытаанах доруобуйаны, мэлдьи үөрэ-көтө, сүбэлии-амалыы сылдьыҥ!
