Балаҕан ыйын 27 күнүгэр, Саха сирин судаарыстыбаннаһын күнүгэр түбэһиннэрэн, олохтоох култуура дьиэтигэр Александра Николаевна, Павел Васильевич Габышевтар «Айар куттаах дьиэ-кэргэн» уус-уран оҥоһуктарын быыстапкатын үөрүүлээх аһыллыыта буолан ааста.
«Айар куттаах дьиэ-кэргэн» быыстапка үөрүүлээх аһыллыытыгар, бу күн ыраахтан-чугастан тоҕуоруһа мустубут ыалдьыттарын, нэһилиэкпит олохтоохторун өбүгэ үгэһинэн, саха сиэринэн арыылаах алаадьынан үөрэк-көтө көрүстүбүт. Бу үтүө күн, быыстапка аһыллыытын кыттыылаахтарыгар анаан Петр Дохунаев аал уоту оттон, айыылартан көрдөһөн, алгыһынан саҕаланна.
Мэҥэ нэһилиэгин тыа сирин түөлбэтин баһылыга Габышев Ньургун Владимирович, Александра Николаевна, Павел Васильевич Габышевтар, Төхтүрдээҕи техническай киин директорынан үлэлээбит, педагогическай үлэ ветерана Попов Николай Федосеевич уонна М.К.Попова аатынан Майатааҕы музыкальнай оскуолатын преподователэ, мелодист Санников Дмитрий Семенович аалай лиэнтэни дохсун ытыс тыаһынан быһан, быыстапканы үөрүүлээхтик арыйдылар.
Салгыы Саха Республикатын Судаарыстыбаннаһын күнүнэн, Мэҥэ нэһилиэгин ытык-мааны дьоно-сэргэтэ, ыҥырыылаах ыалдьыттар сүһүөхтэригэр туран, үөрүүлээх тэрээһин гимтэн саҕаланна.
Саха Республикатын Судаарыстыбаннаһын күнүнэн эҕэрдэлэрин тириэртилэр «Үрүйэ» үҥкүү коллектива (салайааччы Лилия Долгунова).
Александра Николаевна Мэҥэ-Хаҥалас улууһун норуотун маастара, «Үлэ албан аата» III-с степеннээх орден кавалера, РФ уопсай үөрэхтээһинин бочуоттаах үлэһитэ, «Үөрэҕириини сайыннарыыга кылаатын иһин» РФ мэтээлин кавалера, «Саха-Азия оҕолоро» фонда стипендиата, «Старшай учуутал», «Педагог-маастар», СР үөрэхтээһинин үтүөлээх үлэһитэ.
Павел Васильевич Мэҥэ-Хаҥалас улууһун норуотун маастара, Мэҥэ Хаҥалас улууһугар «Култуура уонна искусство сайдыытыгар кылаатын иһин» бэлиэ хаһаайына, өр сылларга үтүө суобастаах үлэтин иһин «Мэҥэ Аат» Бочуотун кинигэтигэр киллэриллибит, Мэҥэ нэһилиэгин бочуоттаах олохтооҕо. Балыктаах бөһүөлэгэр улаханнык убаастанар, биир тарбахха баттанар киһибит. Кини көмүс илиитинэн туппут мебеллэрэ, араас оҥоһуктара үчүгэй көстүүлээх, хаачыстыбалаах буолан, дьон-сэргэ көрө үөрэр. Павел Васильевич «Балыктаах киэһэтэ» ырыа тылларын суруйбута, билигин уостан түспэт ырыа буолан, Балыктаахтар гимнэринэн билинэн, ыллана турарыттан олохтоохтор киэн туттабыт.
Александра Николаевна 75 үбүлүөйдээх сааһынан уонна А.Н., П.В. Габышевтар «Айар куттаах дьиэ-кэргэн» быыстапкаларын үөрүүлээх аһыллыытынан эҕэрдэ тылларын тириэртилэр:
Мэҥэ нэһилиэгин тыа сирин түөлбэтин баһылыга Габышев Ньургун Владимирович.
М.П. Габышев аатынан Балыктаах орто оскуолатын коллективын аатыттан директор Иванов Егор Николаевич.
Өр сылларга бииргэ үлэлээбит, алтыспыт коллегалара, ытык-мааны ветеран учууталларбыт.
Үөрүүлээх кэрэ бэлиэ күнүнэн үөрэн-көтөн эҕэрдэлээтилэр үтүөҕэ-кэрэҕэ уһуйбут оҕолоро, 1-кы выпуск ааттарыттан эҕэрдэтин тириэртэ Мохначевская Парасковья Ивановна уонна үөрүүлээх быһыыга-майгыга художественнай оскуола үлэтин, историятын сырдатар анал истиэндэни үөрэппит бары выпуск үөрэнээччилэрин аатыттан бэлэх ууннулар.
2-с выпуск үөрэнээччилэрин ааттарыттан эҕэрдэлээтилэр Трифонова Сардана Семеновна, Сотникова Евгения Степановна, Ченянова Надежда Егоровна.
3-с выпуск үөрэнээччилэрин ааттарыттан эҕэрдэлээтэ Катакинова Мария Семеновна.
4-с выпуск үөрэнээччилэрин ааттарыттан истиҥ эҕэрдэтин тириэртэ Барабанов Михаил Русланович.
Өр сылларга Төхтүрдээҕи оҕо техническай сатабылы сайыннарар киин директорынан үлэлээбит, педагогическай үлэ ветерана Попов Николай Федосеевич уонна коллегалара Олесова Лидия Власьевна, Мохначевская Марфа Дмитриевна.
Бэйэтин ахтыытын, эҕэрдэтин тириэртэ бииргэ үлэлээбит коллегата Негнюрова Светлана Ильинична.
Эҕэрдэтин тириэртэ, Александра Николаевна үлэлиир кэмигэр, улуустааҕы култуура управлениетыгар начальниктыы олорон, художественнай оскуола аһыллыытыгар улахан көмөнү оҥорбут Санников Дмитрий Семенович.
Нэһилиэкпит уус-уран талааннаахтарын ааттарыттан эҕэрдэни тириэртэ СР норуотун маастара Березкина Валентина Борисовна.
Павел Васильевич Габышев үөлээннээхтэрин аатыттан эҕэрдэтин тириэртэ Гоголев Роман Иннокентьевич.
«Доруобуйа» түмсүү аатыттан эҕэрдэтин тириэрдэн тыл эттэ Ноговицына Марфа Иннокентьевна, истиҥ ырыанан киэргэттэ Рожина Надежда Федоровна.
«Аартык» түөлбэ олохтоохторун аатыттан эҕэрдэлээтэ түөлбэ депутата Цыденжапова Татьяна Сергеевна.
Александра Николаевна аймах-билэ дьонун ааттарыттан эҕэрдэтин тириэртэ эдьиийэ, «Норуот мындыр толкуйа өс хоһоонугар» кинигэ автора, педагогическай үлэ ветерана Черкашина Екатерина Егоровна.
Истиҥ эҕэрдэтин тириэртэ олохтоох култуура дьиэтин директора Кычкина Любовь Васильевна, тыыннаах сибэкки дьөрбөтүн туттарда оскуола директора Иванов Егор Николаевич.
Маны сэргэ, Намнааҕы педагогическай училищеҕа преподователинэн ананан үлэлээбит кэмнэригэр, куратордаабыт, үөрэппит оҕолорун истиҥ видеоэҕэрдэлэрин экран нөҥүө долгуйа, астына көрдүбүт.
Александра Николаевна, Павел Васильевич сүрэхтэрин чопчута — мааны кыыстара Надежда кэргэнинээн Александрдыын уонна оҕолорунаан долгуйа, үөрэ тэрээһиҥҥэ көхтөөх кыттыыны ыллылар.
Александра Николаевна үөрэппит оҕото, ырыа айааччы, мелодист Андрей Замятин авторскай ырыатынан оҥоһуллубут видеоклибы көрөн үөрдүбүт-көттүбүт.
Бэйэтин харда тылын тириэртэ «Айар куттаах дьиэ-кэргэн» быыстапка тэрийээччитэ Александра Николаевна.
«Айар куттаах дьиэ-кэргэн» быыстапкатын үөрүүлээх аһыллыытын музыкальнай эҕэрдэлэринэн ситэрэн, киэргэтэн биэрдилэр:
Эҕэрдэ ырыаларын тириэртилэр педагогическай үлэ ветераннара Цыпандин Михаил Петрович, Стручков Яков Константинович.
«Эҕэрдэ ырыата» ылбаҕай ырыаларын бэлэх ууннулар «Сайдыына» ырыа ансаамбыла, салайааччы Рима Фадеева.
Сахалыы кылыһахтаах норуот ырыатынан эҕэрдэтин тириэртэ Дария Андросова.
Салгыы Александра Николаевна, Павел Васильевич Габышевтар дьиэ кэргэн кэлбит ыалдьыттарга минньигэс, дэлэй астаах фуршет тэрийдилэр, ыалдьыттар быыстапканы наҕылыччы астына-дуоһуйа, сөҕө-махтайа көрдүлэр. Ирэ-хоро кэпсэтии, ырыа-тойук хойукка диэри дуорайда.
Александра Николаевна 75 үбүлүөйдээх сааһынан уонна А.Н., П.В. Габышевтар «Айар куттаах дьиэ-кэргэн» быыстапката үөрүүлээх аһыллыытынан, Дьяконова Татьяна Васильевна, Захарова Римма Николаевна, Мохначевский Валерий Ефимович, Гоголев Роман Иннокентьевич эҕэрдэ тылларын, музыкальнай эҕэрдэлэрин тириэртилэр.
Ыраахтан-чугастан кэлбит күндү ыалдьыттарын Александра Николаевна, Павел Васильевич минньигэс тордунан үөрэ-көтө күндүлээтилэр.
Балаҕан ыйын 29 күнүгэр быыстапка салгыы үлэлээтэ, оскуола үөрэнээччилэрэ, нэһилиэкпит олохтоохторо кэлэн үөрэ-көтө баай ис хоһоонноох быыстапканы көрдүлэр, билистилэр, дуоһуйа астыннылар.
Убаастабыллаах Александра Николаевна, Павел Васильевич, Эһиги сүдү талааҥҥытыгар сүгүрүйэн, махтанан туран. өссө да сүһүөххут үрдүгэр сылдьан, айан- тутан, көмүс кылааккытын киллэрэн, дьоҥҥутун — сэргэҕитин дьикти, уустук үлэлэргитинэн сөхтөрө тураргытыгар баҕарабыт. Тапталлаах оҕоҕут, сиэннэргит истиҥ тапталларыгар, бар дьоҥҥут ытыктабылларыгар бигэнэн өссө уһун үйэлэниҥ диэн баҕа санаабытын тиэрдэбит.
