Кулун тутар 2 күнүгэр сандал сааһы көрсө, Уус-Алдан улууһун Найахы нэһилиэгэр, Балыктаах бөһүөлэгэр Россияҕа дьиэ-кэргэн, Саха Республикатыгар оҕо сылларын, Найахытааҕы «Күбэйэ» үҥкүү ансаамбыла 15, «Чэлгийээнэ» 5 сылларынан, Саха Республикатын култууратын туйгуна, үҥкүү коллективтарын салайааччыта, хореограф Гаврильева Алена Васильевна култуура эйгэтигэр айымньылаах үлэтэ 30 сылынан төрдүс төгүлүн ыытыллыбыт «Талба Хотун» аһаҕас үҥкүү күрэҕэ үрдүк таһымҥа буолан ааста. Үҥкүү түһүлгэтигэр Уус-Алдан, Амма, Нам, Чурапчы, Мэҥэ-Хаҥалас, Эдьигээн улуустарыттан барыта 9 үҥкүү коллективтара, уопсайа 76 киһи кыттыыны ыллылар. Ол курдук биһиги нэһилиэктэн Лилия Долгунова салайааччылаах «Үрүйэ» үҥкүү коллектива «Эҕэрдэ үҥкүү» уонна «Сир симэхтэрэ» үҥкүүлэринэн ситиһиилээхтик кытыннылар.







«Үрүйэ» үҥкүү коллектива 35-тэн 50 саастарыгар диэри бөлөххө дипломант аатын ылары ситиһэннэр грамотанан, анал статуэтканан наҕараадаланнылар. Ону сэргэ, Илья Иванович Артамонов аатынан Найахы сынньалаҥ киинэ олохтообут «Мир на ладони» култуура, үөрэх өйөөһүнүн уонна сайдыытын фондатын аатыттан аны сайын Сочи куоракка ыытыллар «Кубок столицы» аан дойдутааҕы фестивальга салгыы кыттыыны ылалларыгар путевка туттулар.



«Үрүйэ» үҥкүү коллективын салайааччытын Лилия Васильевнаны уонна кэрэ, нарын кыргыттары бастакы ситиһиигитинэн итиитик-истинник эҕэрдэлиибит. Баҕарабыт үҥкүү коллективыгар өссө да үрдүктэн үрдүк ситиһиилэри, саҥаттан саҥа үҥкүүлэри, тус олоххутугар дьолу-саргыны, үгүс үөрүүнү.

Түгэнинэн туһанан, Уус-Алдан улууһун Найахы нэһилиэгэр ыытыллыбыт «Талба Хотун» аһаҕас үҥкүү күрэҕэр баран кыттарбытыгар Ноговицына Марфа Иннокентьевна салайааччылаах «Доруобуйа» түмсүү Далбар Хотуттарыгар дьэрэкээн көстүүлээх сахалыы соннорун уларсан, олохтоох дьаһалта транспорынан хааччыйан, суоппар Валерий Васильевич сылаастык, сымнаҕастык массыынанан илдьэн-аҕалан, күүс-көмө буолбуттарыгар «Үрүйэ» үҥкүү, олохтоох култуура дьиэтин коллективтарын ааттарыттан сылаас махтал тылларын аныыбыт. Бөһүөлэкпит чэчирии сайдарын туһугар түмсүүлээх буолуоҕуҥ, бары биир санаанан иннибит диэки, сайдыы суолунан баран иһиэҕиҥ! Чэгиэн-чэбдик буолуоҕуҥ, үөрэ – көтө үлэлиэҕиҥ-хамсыаҕыҥ, айа-тута сылдьыаҕыҥ!

