Бэс ыйын 30 күнүгэр олохтоох култуура дьиэтигэр Балыктаах бөһүөлэгин бочуоттаах олохтооҕо, улуус бочуоттаах гражданина, 1950-60-70 сылларга Максим Горькай аатынан совхозка ыанньыксытынан үлэлээбит, Республикаҕа тиийэ аатырбыт, «Бочуот знага» орден кавалера, ССРС Верховнай Сэбиэтин депутата, коммунистическай үлэ ударнига, социалистическай үлэ хас да төгүллээх кыайыылааҕа, ыччат наставнига, персональнай пенсионер, күн күбэй ийэ, эйэҕэс эбээ Черкашина Ксения Гаврильевна үлэтин, олоҕун сырдатар «Үлэни өрө туппут күн күбэй ийэбит» кинигэ сүрэхтэниитигэр аналлаах тэрээһин буолан ааста.

Хас биирдии кинигэ – кылаат, өй-санаа, билии кылаата. Ол туохтан да күндү кылаат. Кинигэҕэ суруллубут суоруллубат, үйэлэри уҥуордаан, билиҥҥи историяны кэлэр көлүөнэлэргэ тиэрдиэҕэ. Бу кинигэҕэ ССРС Верховнай Сэбиэтин депутата, «Бочуот Знага» орден кавалера, тыыл, үлэ бэтэрээнэ, Мэҥэ Хаҥалас улууһун бочуоттаах гражданина, персональнай пенсионер, ыччат наставнига Черкашина Ксения Гаврильевна дьоһун олоҕун, үрдүк таһаарыылаах үлэтин-хамнаһын, дьиэ кэргэнин туһунан оҕолорун, сиэннэрин, аймахтарын, бииргэ үлэлээбит дьонун истиҥ-иһирэх ахтыылара киирдилэр.

Тэрээһини иилээн-саҕалаан ыытта Ксения Гаврильевна
кыыһа Евдокия Васильевна Баишева.

Күн сирин көрбүт «Үлэни өрө туппут күн күбэй ийэбит» кинигэнэн ырытыы оҥордо кинигэни хомуйан оҥорбут Ксения Гаврильевна кийиитэ, С.Ф.Гоголев аатынан Дьокуускайдааҕы педагогическай колледж преподавателэ Фадеева Парасковья Викторовна.

Ксения Гаврильевна олорон ааспыт олоҕун, үлэтин сырдатар киэҥ ис хоһоонноох хаартысканан презентацияны тэрээһиҥҥэ кэлбит ыҥырыылаах ыалдьыттар, көрөөччүлэр долгуйа, астына көрөн ахтан-санаан аастыбыт.

Кинигэ сүрэхтэниитигэр Ксения Гаврильевна кыыһа Евдокия Васильевна үгүс элбэх хоһоонун көрөөччүлэргэ анаан аахпыта истиҥ-иһирэх эйгэ тэриллэн тэрээһин олус долгутуулаахтык ааста.
«Үлэни өрө туппут күн күбэй ийэбит» кинигэ сүрэхтэниитин тула ахтыы оҥорон, бэйэлэрин санааларын тириэртилэр:
Прибылых Марина Семеновна, Иванова Анна Андреевна, Прибылых Антонина Петровна, Иван Николаевич, Скрябина Анисия Даниловна, Черкашина Полина Егоровна, Змиевская Александра Гаврильевна, Черкашин Егор Гаврильевич, Борисов Афанасий Константинович, Захарова Валентина Егоровна, Кычкина Галина Гаврильевна, Габышева Прасковья Прокопьевна, Сотникова Вера Андреевна, Андросова Александра Дмитриевна, Ноговицына Марфа Иннокентьевна, Стручкова Сардана Степановна уонна оҕолор ааттарыттан Ксенья Гаврильевна сиэнэ Александрова Ксенья Васильевна.














Музыкальнай эҕэрдэлэринэн ситэрэн, киэргэтэн биэрдилэр:
«Ферма кыргыттара» үҥкүүнэн «Үрүйэ» үҥкүү коллектива.

Балыктаахпыт мааны күөрэгэйэ, уус-уран самодеятельность ветерана, улуустааҕы, республикатааҕы ырыа күрэхтэрин кыайыылааҕа, призера, Ксения Гаврильевна кийиитэ Вера Фадеева.

Ырыа куттаах дьиэ кэргэн, улуустааҕы Василий Константинович Степанов аатынан култуура уонна спорт эстафетатын фестивалын хас да төгүллээх лауреаттара, элбэх республиканскай, улууснай ырыа конкурс кыттыылаахтара, кыайыылаахтара Антонина, Иван Прибылыхтар.

«Талаһыахха кэрэҕэ» ырыанан Ксения Гаврильевна кыыһа Евдокия Баишева.

Бу курдук Ксения Гаврильевна оҕолоро, сиэттэрэ, аймах-билэ дьонноро нэһилиэкпит киэҥ туттуута – үлэни өрө тутан, үрүҥ илгэни үрүлүтэн ыанньыксытынан, ыччаттарга наставнигынан таһаарыылаахтык, сырдык сулус буолан сыдьаайан үлэлээбит ССРС Верховнай сэбиэтин депутата, «Бочуот знага» орден кавалера ытыктыыр, убаастыыр киһибит Ксения Гаврильевна Черкашина туһунан «Үлэни өрө туппут күн күбэй ийэбит» кинигэ сүрэхтэниитин, күн күбэй ийэлэрин, эбээлэрин төрөөбүт дойдутугар – сүүһүнэн уот лаампалаах, ырыаҕа ылланар, хоһооҥҥо холбонор, Мэҥэ сирэ бастыҥа – Балыктаахпытыгар кэлэн, Ксения Гаврильевна туһунан өйдөөн – санаан, сырдык аатын үйэтитэн ахтан ааһар түгэни анаан – минээн тэрийдилэр.

Оҕолор, сиэттэр, хаан – уруу аймахтар эбээҕит сирдээҕи дьолу толору билэн, олорон- үлэлээн ааспыт төрөөбүт дойдутун аатын үрдүктүк тута сылдьаргытыгар, сибээһи быспаккытыгар истиҥник махтанабыт. Кинигэ сүрэхтэниитигэр анаммыт тэрээһиммитигэр кэлэн кыттыыны ылбыт бар дьоммутугар махтал сылаас тылларын аныыбыт. Баҕарабыт бука барыгытыгар саха алмааһыныы кытаанах доруобуйаны, тус олоххутугар, дьиэ кэргэттэргитигэр этэҥҥэ буолууну. Мэлдьи бу курдук түмсүүлээх буолуоҕуҥ!
