Арассыыйаҕа сомоҕолоһуу, Саха Өрөспүүбүлүкэтигэр култуура, Мэҥэ Хаҥалас улууһугар оҥорон таһаарыы, нэһилиэкпитигэр урбаанньыт, Балыктаахпыт бөһүөлэгэ төрүттэммитэ 70 сылларыгар аналлаах ырыаҕа ылланар, хоһооҥҥо хоһуйуллар, удьуор саха ууһуур-сайдар, талба талаан тахса турар уйгу сирдээх, маанылаах сиригэр, саха мааны бырааһынньыга — үрүҥ тунах ыһыахха, буоларын курдук, араас тэрээһиннэр ыытылыннылар. Ол курдук кэнсиэр түһүлгэтигэр үбүлүөйдээх тэрээһин «Үрүҥ тунах ыһыаҕынан!» эҕэрдэ кэнсиэрбит түһүлгэтин истиҥ ырыаларынан, эҕэрдэ тылларынан, көрөөччүлэри кытта бииргэ буолан, дуораһыта саҕалаата Розанна Зыкова!
Бу өрөгөйдөөх кэнсиэрбитин ыҥырыылаах ыалдьыт, көрөөччү кутун туппут Василий Игнатьев Мичиллэй репертуарыттан «Сир Ийэ», Василий Игнатьев репертуарыттан «Хантан маннык» ырыаларынан киэргэтэн биэрдэ.
Үрүҥ тунах ыһыаҕынан эҕэрдэ кэнсиэрбитин бары таптыыр, куруук күүтэр тэтимнээх ырыаһыппыт, «Эн баар буолан», «Иэйиибин уһугуннарыы» ырыалар автордара WILD – Петр Коротовбэйэтэ толорон, көрөөччү биһирэбилин ылыан ылла.
Киһи дууһатыгар баар саамай истиҥ иэйиитин тиэрдэр кэрэ куоластаах Ева Попованы, Далаана репертуарыттан «Кыыс сайын», «Мин дойдум Сахам сирэ»ырыаларынан сыанаҕа үөрэ-көтө көрүстүбүт.
Олохпут кэрэ түгэннэрин ырыа матыыбыгар тиһэн, сахалыы мааны куолаһынан дэгэрэҥнэтэ ыллаата, уран тылынан уруйдаата ураты ырыаһыппыт Василий Петров, Дьулустаан Новгородов тыла Василий Еремеев дьүрүлэ «Эйэлээх Эһиэкэй» уонна «Кэҕэ» сэргэх ырыаларын көрөөччүлэргэ бэлэх уунна.
Мэҥэ — Хаҥалас улууһун тыа хаһаайыстыбатын управлениетын начальнигын солбуйааччыта Александр Борисов ураты күүстээх куолаһынан, Петр Сергучев тылыгар уонна дьүрүлүгэр «Ыллыыбын эһиэхэ анаан» уонна Петр Тобуруокап тылыгар Аркадий Алексеев дьүрүлүгэр «Кыһыҥҥы ырыа»ырыаларын толорон, көрөөччү кутун тутан, махталын ылан, кэнсиэрбит өрө көтөҕүллүүлээхтик түмүктэннэ.
Салгыы уйгулаах ыһыахпыт үөрүүтүн-көтүүтүн үксэтэн, өрөгөйдөөх түһүлгэҕэ бары мустаммыт, «Биир сомоҕо» дьиэ кэргэнинэн мааны таҥаһын, «Сайыҥҥы Күн Күлүмэ» — кэрэ аҥардарга аналлаах толору симэхтээх сайыҥҥы сахалыы таҥас көрүү уонна «Ырыа ыллыгынан» ырыа күрэхтэрин олохтоох култуура дьиэтэ тэрийэн ыытта.
«Биир сомоҕо», «Сайыҥҥы Күн Күлүмэ» көрүү күрэхтэри маннык састааптаах дьүүллүүр сүбэ сыаналаата:
Дьүүллүүр сүбэ бэрэссэдээтэлэ – Кычкина Мария Спиридоновна, Балыктаахтааҕы «Звездочка» оҕо уһуйаанын тутаах үлэһитэ, тарбаҕар талааннаах иистэнньэҥ, элбэх оҕо тапталлаах күн күбэй ийэтэ, элбэх сиэн эйэҕэс эбээтэ. Дьүүллүүр сүбэ чилиэннэрэ – Березкина Варвара Игоревна, биир дойдулаахпыт, Георгий Михайлович Артемьев аатынан 2-с нүөмэрдээх Аллараа Бэстээхтээҕи орто оскуолатын математика учуутала, уран тарбахтаах, иэйиилээх иистэнньэҥ, элбэх оҕо тапталлаах ийэтэ; Покатилова Айталина Яновна, биир дойдулаахпыт, технолог-конструктор, таҥас дизайнера, тарбаҕар талааннаах иистэнньэҥ, Дьокуускайдааҕы «Златошвейка» таҥас маҕаһыынын сэбиэдиссэйэ.
Арассыыйа норуоттарын төрүт көстүүмнэригэр «Биир сомоҕо» дьиэ кэргэнинэн мааны таҥаһын көрүү күрэҕэр 2 дьиэ кэргэн кыттыыны ылла.
Вероника Христофоровна, Петр Дохунаевтар дьиэ кэргэн.
Татьяна Сергеевна, Бимба Бимбаевич Цыденжаповтар дьиэ кэргэн.
Түмүккэ 1-кы миэстэни ылары ситиһэн, Вероника Христофоровна, Петр Дохунаевтар дьиэ кэргэн кыайыылаах тахсан, «Октябрь» колхуос бастакы ыанньыксыттартан биирдэстэрэ, үлэ ветерана, «Коммунистическай үлэ ударнига», ВДНХ путевка лауреата, күн күбэй ийэлэрэ, эбээлэрэ Александра Яковлевна уонна «Коммунистическай үлэ ударнига», «Социалистическай үлэ», «Пятилетка» хас да төгүллээх кыайыылааҕа, үлэ ветерана, аҕалаатар аҕалара, эһээлэрэ Петр Петрович Никитиннар дьиэ кэргэн сырдык ааттарын үйэтитэн, оҕолоро, сиэттэрэ олохтообут бирииһинэн наҕараадаланнылар. Анал диплому, бирииһи туттарда Александра Яковлевна, Петр Петрович Никитиннар кыыстара Ноговицына Екатерина Иннокентьевна.
2-с миэстэни Татьяна Сергеевна, Бимба Бимбаевич Цыденжаповтар дьиэ кэргэн ылары ситиһэн, «Коммунистическай үлэ ударнига», «Максим Горькай» аатынан сопхуос Балыктаах отделениятын «Халдьаайы» ферматын төһүү ыанньыксыта, ВДНХ путевка 2 төгүллээх лауреата, «Образцовай бэрээдэктээх» анал аат дьиэ кэргэнин күн-күбэй ийэтэ, эйэҕэс эбээтэ Татаринова Анна Гаврильевна аатын үйэтитэн, оҕолоро, сиэттэрэ олохтообут бирииһинэн наҕараадаланнылар. Диплому, бирииһи туттарда Анна Гаврильевна кыыһа Федотова Альбина Дмитриевна.
Ону сэргэ үлэ, тыыл ветерана, «Октябрь» колхуос, Максим Горькай аатынан сопхуос биир бастакы ыанньыксыта, улахан дьиэ-кэргэн күн-күбэй ийэтэ, эбээтэ, хос эбээтэ Черкашина Екатерина Ильинична сырдык аатын үйэтитэн, оҕолоро, сиэттэрэ олохтообут анал диплому, бирииһи, Екатерина Ильинична кыыһа Черкашина Александра Сергеевна Вероника Христофоровна, Петр Владимирович Дохунаевтар дьиэ кэргэҥҥэ анаан туттарда.
«Сайыҥҥы Күн Күлүмэ» кэрэ аҥардарга аналлаах толору симэхтээх сайыҥҥы сахалыы таҥас көрүү күрэҕэр уопсайа 6 кэрэ аҥар кыттыыны ылла:
Степанова Саргылаана Романовна.
Трифонова Сардана Семеновна.
Рожина Надежда Федоровна.
Прибылых Ксения Васильевна.
Барабанова Феоктиста Петровна.
Калачева Парасковья Семеновна.
Түмүккэ, Прибылых Ксения Васильевна кыайыылаах тахсан, 1-кы миэстэни ылары ситиһэн, Балыктаах бөһүөлэгин бочуоттаах олохтооҕо, улуус бочуоттаах гражданина, 1950-60-70 сылларга Максим Горькай аатынан совхозка ыанньыксытынан үлэлээбит, Республикаҕа тиийэ аатырбыт, «Бочуот знага» орден кавалера, ССРС Верховнай Сэбиэтин депутата, коммунистическай үлэ ударнига, социалистическай үлэ хас да төгүллээх кыайыылааҕа, ыччат наставнига, персональнай пенсионер, күн күбэй ийэ, эйэҕэс эбээ Черкашина Ксения Гаврильевна сырдык аатын үйэтитэн, оҕолоро, сиэттэрэ олохтообут бирииһинэн наҕараадаланан үөрүүтэ үксээтэ. Диплому, бирииһи туттарда Ксения Гаврильевна кийиитэ Фадеева Прасковья Викторовна.
2-с бочуоттаах миэстэни Калачева Парасковья Семеновна ылары ситиһэн, үлэ ветерана, ньирэй көрөөччү, үүт тутааччы, осеменатор, Саха АССР Верховнай советын депутата, улахан дьиэ-кэргэн күн-күбэй ийэтэ, эйэҕэс эбээтэ Говорова Мария Александровна сырдык аатын үйэтитэн, оҕолоро, сиэттэрэ олохтообут бирииһинэн наҕараадаланна. Диплому, бирииһи туттарда Мария Александровна кыыһа Винокурова Любовь Васильевна.
3-с миэстэҕэ Степанова Саргылаана Романовна тахсан, Үлэ кыһыл Знамята, Ленин орденнар кавалердара, Саха АССР Верховнай советын 7-с ыҥырыылаах сессиятын депутата, өрөспүүбүлүкэ биллиилээх ыанньыксыта, коммунистическай үлэ ударнига, үлэ, тыыл ветерана, 8 оҕо күн-күбэй ийэтэ, эбээтэ, хос эбээтэ Прибылых Евдокия Иннокентьевна сырдык аатын үйэтитэн, оҕолоро, сиэттэрэ, хос сиэттэрэ олохтообут бирииһинэн наҕараадаланна. Диплому, бирииһи туттарда Евдокия Иннокентьевна сиэн кыыһа Гаврильева Анна Ивановна.
Үрүҥ тунах ыһыаҕы айхаллыы, ыллыыр «Ырыа ыллыгынан» ырыа күрэҕэр маннык састааптаах дьүүллүүр сүбэ сыаналаата:
Дьүүллүүр сүбэ бэрэссэдээтэлэ – Прибылых Иван Николаевич, Саха Республикатын култууратын туйгуна, Мэҥэ-Хаҥалас улууһун култууратын бочуоттаах бэтэрээнэ, «Ситим» эр дьон вокальнай ансаамбыл салайааччыта, элбэх оҕо тапталлаах амарах аҕата, элбэх сиэн эйэҕэс эһээтэ. Дьүүллүүр сүбэ чилиэннэрэ – Стручков Яков Константинович, уһун сылларга Балыктаах орто оскуолатыгар музыка учууталынан таһаарыылаахтык үлэлээбит педагогическай үлэ ветерана, Саха Республикатын үөрэҕин туйгуна, «Күнчээн» оҕо вокальнай ансаамбылын салайааччыта, элбэх оҕо тапталлаах амарах аҕата, элбэх сиэн эйэҕэс эһээтэ; Стручкова Елена Ивановна, «Звездочка» оҕо уһуйаанын физкультура уонна муусука дьарыктарын салайааччыта, Саха Республикатын үөрэҕин туйгуна, элбэх оҕо тапталлаах күн күбэй ийэтэ, элбэх сиэн эйэҕэс эбээтэ.
Үрүҥ тунах ыһыаҕы айхаллыы, ыллыыр «Ырыа ыллыгынан» ырыа күрэҕэр уопсайа 4 кыттааччы кыттыыны ылла:
Фадеева Вера Михайловна, Василий Местников репертуарыттан «Ыһыах» ырыанан.
Харитонова Марфа Александровна, Виктор Никаноров тылыгар уонна дьүрүлүгэр «Түһүлгэҕэ эн таскар» ырыанан.
Степанова Саргылаана Романовна, Мария Алексеева тылыгар, Иннокентий Гаврильев-Лэкиэс дьүрүлүгэр «Бастыҥабын кэтиэҕим» ырыанан.
Катакинова Саргылана Дмитриевна, Владимир Заболоцкай тылыгар уонна дьүрүлүгэр «Саха ыччата».
Түмүккэ, Степанова Саргылаана Романовна кыайыылаах тахсан, 1-кы миэстэни ылары ситиһэн, Саха АССР үтүөлээх бырааһа, Саха Республикатын доруобуйатын харыстабылын туйгуна, Мэҥэ Хаҥалас улууһун, Төҥүлү, Мэҥэ нэһилиэктэрин бочуоттаах олохтооҕо, үлэ ветерана, Саха республикатын доруобуйатын харыстабылын бочуоттаах ветерана, доруобуйа эйгэтигэр Кычкиннар дьиэ кэргэн династиятын төрүттээччитэ Кычкин Николай Гаврильевич аатынан оҕолоро, сиэттэрэ олохтообут бирииһинэн наҕараадаланан, үөрүүтэ үксээтэ. Анал диплому, бирииһи туттарда Николай Гаврильевич уола Кычкин Юрий Николаевич.
2-с бочуоттаах миэстэҕэ Харитонова Марфа Александровна тахсан, тыыл ветерана, Чурапчы көһөрүүтүн кыттыылааҕа, култуура уонна спорт эстафетатын элбэх төгүллээх лауреата, Мэҥэ Хаҥалас улууһун атыы-эргиэн холбоһуктаах тэрилтэтин ветерана, элбэх оҕо амарах аҕата, эйэҕэс эһээтэ, хос эһээтэ Поисеев Егор Афанасьевич сырдык аатын үйэтитэн, оҕолоро, сиэттэрэ, хос сиэттэрэ олохтообут бирииһинэн наҕараадаланна. Диплому, бирииһи туттарда Егор Афанасьевич сиэн кыыһа Монастырева Мотрена Михайловна.
3 миэстэни Катакинова Саргылана Дмитриевна ылары ситиһэн, үлэ ветерана, «Октябрь» колхуоска, Максим Горькай аатынан сопхуоска үтүө суобастаахтык үлэлээбит, индийскэй ырыаны ыллаан норуокка биллибит, улахан дьиэ-кэргэн амарах аҕата, эһээтэ, хос эһээтэ Андросов Николай Петрович-Муксуун Ньукулай сырдык аатын үйэтитэн, оҕолоро, сиэттэрэ олохтообут бирииһин тутан үөрүүтэ үксээтэ. Диплому, бирииһи туттарда олохтоох култуура дьиэтин директора Кычкина Любовь Васильевна.
Үрүҥ тунах ыһыаҕар ыытыллыбыт күрэхтэри ырыанан-тойугунан, муода көрдөрөн киэргэтэн-ситэрэн биэрдилэр:
Самаан сайыммытын уруйдаан, Үрүҥ тунах ыһыахха «Доруобуйа» түмсүү (салайааччы Ноговицына М.И.) Далбар Хотуттара анаан-минээн тиктибит сахалыы былааччыйаларын, халадаайы ситэрэр аныгылыы гипюровай хаһыаччыктарын көрөөччүлэргэ анаан, сайбайа хааман көрдөрдүлэр.
Музыкальнай эҕэрдэтин тириэртэ кэрэ нарын куоластаах, нэһилиэкпит күөрэгэйэ, уус-уран самодеятельность ветерана, улуустааҕы, республикатааҕы ырыа күрэхтэрин кыайыылааҕа, призера Вера Фадеева.
Ылбаҕай ырыаларын бэлэх ууннулар «Ситим» эр дьон вокальнай ансаамбыла, салайааччы Прибылых И.Н.
Самаан сайын кэлбитинэн, үрүҥ тунах ыһыаҕынан бэйэлэрин эҕэрдэлэрин тиэртилэр Гаврил Дьяконов, Вадим Шепелев, Евгений Дьяконов.
Күрэхтэр тэрээһинигэр кыттыһан, бириистэри олохтообут убаастабыллаах дьоммутугар барыгытыгар сылаас махтал тылларын тиэрдэбит. Ону сэргэ сылаас махтал тылларын аныыбыт бүгүҥҥү күрэхтэрбитигэр быыс булан кэлэн, дьүүллүүр сүбэҕэ үлэлээбит тарбахтарыгар талааннаах, иистэнньэҥ уонна ырыа куттаах убаастабыллаах дьоммутугар, күрэхтэрбит бары кыттыылаахтарыгар. Махтал тылларын аныыбыт «Үрүҥ тунах ыһыаҕынан!» эҕэрдэ кэнсиэри бэлэх ууммут ырыа куттаах ыҥырыылаах ырыаһыттарбытыгар. Бу курдук өрүүтүн активнай позицияҕытын ыһыктыбакка куруутун биһигинниин бииргэ буолун, баҕарабыт дьиэ кэргэҥҥитигэр байылыат олоҕу, дьолу саргыны! Оо, чахчы даҕаны! Үрүҥ тунах ыһыахпыт эҕэрдэ кэнсиэригэр уонна ыытыллыбыт күрэхтэргэ иэйии кута туолбут, дууһа кыла хоммут кэрэ ырыа матыыптара тиһиллэн, ырыаһыттарбытын, ыытыллыбыт күрэхтэр кыттааччыларын кытта тэҥҥэ ылластыбыт, тэҥҥэ үөрдүбүт! Кэрэ куоластаах ырыаһыттарбытыгар, күрэхтэр кыттааччыларыгар өссө төгүл көрөөччү истиҥ махталын, дохсун ытыс тыаһын анаатыбыт! Салгыы бу киэһэ 21:00 чаастан олохтоох култуура дьиэтигэр «Үҥкүүлүүр үрүҥ түүн!» диэн ураты, үөрүүлээх дискотека кэнсиэрэ буолан ааста. Үрүҥ түүн сипсиэригэр үҥкүү ситэригэр, ырыа алыптаах матыыбыгар уйдаран, умнуллубат киэһээни бииргэ атаардыбыт!
