Муус устар 15 күнүгэр Аан дойдутааҕы культура күнүн чэрчитинэн Ытык Таатта улууһун делегацията Төҥүлү, Тумул, Балыктаах бөһүөлэктэрин культура дьиэлэрин үлэтин-хамнаһын ыкса билсиһэ, опыт атастаһан, ирэ-хоро кэпсэтэн тарҕастылар.
Биһиги нэһилиэкпитигэр олохтоох культура дьиэтигэр ыалдьыттары «Арчы», «Доруобуйа» түмсүү салайааччылара Рожина Надежда Федоровна, Ноговицына Марфа Иннокентьевна арыылах алаадьынан, кыынньар кымыһынан айах тутан көрүстүлэр.
Төгүрүк остуол тула олорон икки өттүттэн иһирэх кэпсэтии, санаа атастаһыыта тэриллэн, түмүккэ итии чээйдээх сандалы тула олорон опыт атастаһыы бэрт сэргэхтик ааста.
Нэһилиэкпит, общественнай түмсүүлэр, олохтоох культура дьиэтин кытта биир ситимнээх үлэни тэрийии туһунан бэйэлэрин санааларын үллэстэн, киэҥник сырдаттылар:
«Доруобуйа» түмсүү салайааччыта Ноговицына Марфа Иннокентьевна.
«Айылгы» нэһилиэкпит кырдьаҕастарын сэбиэтин салайааччыта Рожина Надежда Федоровна.
Женком сэбиэтин салайааччыта Мохначевская Мария Ивановна.
Эдэр ыччат түмсүү салайааччыта Бродникова Нелли Николаевна.
«Иэйии кытыла» айар түмсүү салайааччыта Трифонова Сардана Семеновна.
Эдэр ийэлэр түмсүү салайааччыта Иванова Татьяна Егоровна.
Нэһилиэкпит түөлбэлэрин үлэтин сырдатта «Аартык» түөлбэ салайааччыта Стручкова Сардана Степановна.
Олохтоох культура дьиэтин үлэтин ис хоһоонун сырдатан билиһиннэрдилэр Кычкина Любовь Васильевна, Долгунова Лилия Васильевна. Өр сыллаах үлэтин методическай копилкатыттан араас тэрээһиннэргэ анаан суруйбут сценарийдарын Сардана Степановна Стручкова ыалдьыттарга утары уунна.
Кэлбит делегация састаабыгар баар Таатта улууһун нэһилиэктэрин уус-уран салайааччылара, ыалдьыттара олохтоох культура дьиэтин үлэтин ис хоһоонун, общественнай түмсүүлэр, тэрилтэлэр бары биир сомоҕо буолан үлэлииллэрин, ордук чорботон «Балыктаах» телестудия сырдатар үлэтин, кулууп официальнай сайтыгар хас биирдии ыытыллар тэрээһиннэри ситимнээхтик сырдатыытын сөҕө сэҥээрдилэр, общественнай түмсүүлэр уонна тэрилтэлэр бииргэ үлэлээһиннэрэ биир ситимҥэ бигэтик киирбитин тоҕоһолоон бэлиэтээтилэр.
Ити курдук икки улуус культуратын үлэһиттэрэ көрсөн, санаа атастаһан, инникитин бииргэ үлэлииргэ сүбэлэһэн истиҥ көрсүһүүнү түмүктээтилэр.
