Ыам ыйын 9 күнүгэр олохтоох култуура дьиэтигэр ытык-мааны ветераннарбытыгар (тыыл ветераннарыгар, сэрии сылын оҕолоругар, 70 үөһээ саастаах ытык дьоннорбутугар) аналлаах «Уруйдуубут Кыайыы күнүн!» бырааһынньыктааҕы сандалы тула истиҥ көрсүһүү буолан ааста.
Улуу Кыайыы күнүн көрсө кэлбит ытык-мааны ветераннарбытын «Георгиевскай лента» акциянан үөрэ-көтө көрүстүбүт.
Бүгүҥҥү тэрээһин саҕаланыытыгар эриэккэс олоҕу көрбөккө охтубут буойуттары, эргиллэн кэлэн олох олорботохтору, ааттарын обелистарга хаалларбатахтары, өлүүттэн ордон кыайыыны өрө уунан тыыннаах эргиллэн кэлэн эйэлээх олоҕу олорон ааспыт ветераннарбытын сүһүөххэ тураммыт уһун үйэлэргэ кэриэстээтибит.
Салгыы үөрүүлээх чааска «Мэҥэ нэһилиэгэ» тыа сирин тэриллиитин баһылыга Куприянов А.В. бэйэтин эҕэрдэтин сэргэ, Дойду президена Владимир Владимирович Путин, Мэҥэ Хаҥалас улууһун аҕа баһылыгын Дмитрий Иванович Тихонов эҕэрдэ суруктарын, «Мэҥэ нэһилиэгэ» тыа сирин тэриллиитин аатыттан эҕэрдэ суругу, анал бородуукта бэлэҕин тыыл ветераннарыгар Заровняева Вера Григорьевнаҕа, Черкашин Егор Николаевичка, Габышева Прасковья Прокопьевнаҕа, Стручков Иван Егоровичка туттартаата.
«Мэҥэ нэһилиэгэ» тыа сирин тэриллиитин дьаһалтатын аатыттан эҕэрдэ суругу, анал бородууктанан бэлэҕи тыылга улуу кыайыыны уһансыбыт, кыайыы туһа диэн хара көлөһүннэрин тохпут, оонньоммотох оҕо сааһы ааспыт сэрии сылын оҕолоругар, күн бүгүн ытык-мааны ветераннарбытыгар Куприянова Розалия Николаевнаҕа, Габышева Марфа Николаевнаҕа, Харитонова Марфа Петровнаҕа, Габышева Мотрена Игнатьевнаҕа, Протодьяконов Афанасий Никифоровичка, Винокуров Николай Семеновичка, Максимова Дария Архиповнаҕа туттарылынна.
Күн бүгүн байыаннай дьайыыларга аҕа дойдубутун көмүскүү сылдьар хорсун уолаттарбытыгар Саха Республикатын Ил Дархана Айсен Сергеевич Николаев эҕэрдэ суруга, «Мэҥэ нэһилиэгэ» тыа сирин тэриллиитин аатыттан анал бородууктанан бэлэх туттарылынна: Ариан Александрович Колесовка, Николай Константинович Чирковка, Данил Иннокентьевич Скрябиҥҥа, Павел Владимирович Желобцовка, Николай Петрович Никитиҥҥа.
Биир дойдулаахтарбыт, аҕа дойду сэриитин, Чурапчы көһүүтүн кыттыылаахтарын сырдык ааттарын үйэтитиигэ эҥкилэ суох үлэтин иһин «Мэҥэ нэһилиэгэ» тыа сирин тэриллиитин баһылыга Александр Валерьевич Куприянов махтал суруга, өйдөбүнньүк сувенира туттарылынна ССРС култууратын туйгунугар, Саха республикатын култууратын үтүөлээх үлэһитигэр, Мэҥэ Хаҥалас улууһун, Мэҥэ нэһилиэгин бочуоттаах олохтооҕор Анисия Даниловна Скрябинаҕа.
Чечня сэриитигэр аҕа дойдубутун көмүскээбит байыаннай дьайыылар ветеран уолаттарбытыгар «Мэҥэ нэһилиэгэ» тыа сирин тэриллиитин аатыттан анал бородууктанан бэлэх туттарылынна: Ноговицын Семен Александровичка, Чукров Николай Николаевичка, Никитин Николай Петровичка.
ССРС култууратын туйгуна, Саха республикатын култууратын үтүөлээх үлэһитэ, Мэҥэ Хаҥалас улууһун, Мэҥэ нэһилиэгин бочуоттаах олохтооҕо Скрябина Анисия Даниловна Алаҕар нэһилиэгин «Ворошилов» аатынан колхоз Чурапчыттан Кэбээйигэ көһүү кыттыылаахтарын оччотооҕу оҕо сүрэҕэр хаалбыт ахтыыларынан оҥоһуллубут «Сүрэххэ сөҥмүт өйдөбүл» брошюралары оччотооҕу кэмҥэ ахтыыны суруйбут Кэбээйи көһүүтүн кыттыылаахтарын оҕолоругар, нэһилиэк уонна оскуола библиотекаларыгар, олохтоох дьаһалтаҕа, култуура дьиэтигэр туттартаата.
Үлэ ветерана Лихонди Варвара Михайловна нэһилиэк библиотекатыгар «Корейцы в истории Якутии» кинигэни бэлэх уунна.
Үөрүүлээх тэрээһини Рима Фадеева, Андрей Стручков, «Сайдыына» вокальнай коллектива, Антонина Иван Прибылыхтар ылбаҕай ырыаларынан, «Үрүйэ» үҥкүү коллектива «Смуглянка» үҥкүүнэн ситэрэн-хоторон, киэргэтэн биэрдилэр.
Бырааһынньыктааҕы сылаас астаах сандалы олохтоох олох-дьаһах коммунальнай хаһаайыстыба коллектива астаабыт минньигэс саллаат хааһыны амсайыыттан саҕаланна.
Кыргыhыы толоонугар эйэ-дьол, сырдык, көҥүл олох иhин тыыннарын толук уурбут биир дойдулаахтарбыт, эргиллэн кэлэн эйэлээх олоҕу олорон ааспыт сэрии ветераннарбыт сырдык мөссүөннэрин өйдөөн-санаан аастыбыт.
Ытык-мааны ветераннарбыт сандалы тула олорон, ирэ-хоро кэпсэтэн, уруккуну ахтыһан, ырыа ыллаан, оонньууларга активнайдык кыттан, дуоһуйа сынньанан тарҕастылар.
