Күндү тыыл ветераннара, сэрии сылын оҕолоро, бөһүөлэкпит олохтоохторо, Улуу Кыайыы өрөгөйдөөх күнүнэн итии — истиҥ эҕэрдэ!
Улуу Кыайыыга -Уруй!
Албан Ааттаах буойуннарга Айхал!
Бүгүн Кыайыы күнэ! Бүгүн өрөгөй күнэ! Ураа!
77 сыл анараа өттүгэр бүгүҥҥү биһиги дьоллоох, эйэлээх олохпутун түстээбит, сыл-хонук төһө да ааспытын иһин, хас да көлүөнэ дьон үөскээбитин-төрөөбүтүн иһин хаһан да өлбөөдүйбэт, хаһан да саппаҕырбат, Улуу Кыайыы чаҕылхай, сандаархай, үөрүүлээх күнэ. Бүгүн уот силлиэ охсуһуу хонуутугар сырдык тыыннарын толук уурбут, өлүүнү туораан кыайыы-хотуу көтөллөнөн дойдуларыгар эргийбит албан ааттаах буойуттарга, тыылга кыайыыны уһансыбыт үтүө үлэһит дьоммутугар бүгүн сүгүрүйэр, махтанар, э5эрдэлиир ытык күммүт үүннэ.
Улуу Кыайыы күнүгэр аналлаах митинг ардахтаах күнүнэн сибээстээн нэһилиэкпит олохтоох култууратын дьиэтигэр буолла.
Быйылгы «Саллаат хааһытын» олохтоох ОДьКХ коллектива бэлэмнээн күндүлээтэ.
Аҕа дойду көҥүлүн иһин кырыктаах кыргыһыыга өлбүт буойуттар сырдык кэриэстэригэр – Албан аат веногун –гирлянданы «Дьулурҕан» военно патриотическай кулууп байыастара сүгүрүйэ уурдулар.
Улуу Кыайыы күнүгэр аналлаах митинг кэнниттэн итии чэйдээх сандалы тула тыыл ветераннара, сэрии сылын оҕолоро, нэһилиэкпит бочуоттаах гражданиннара, ытык-мааны ветераннара уһун тохтобул кэнниттэн көрсүһэн, үөрэ-көтө сэһэргэһэ бырааһынньыкка түмүстүлэр.
Бүгүҥҥү бырааһынньыгы оҕолор, эдэр ыччат, аҕам саастаахтар эҕэрдэ нүөмэрдэринэн киэргэтэн, ситэрэн-хоторон биэрдилэр, нэһилиэкпит тэрилтэлэрэ тыыл ветераннарыгар, сэрии сылын оҕолоругар бэйэлэрин истиҥ тыллаах эҕэрдэлэрин, бэлэхтэрин туттардылар:
Кырдьаҕастар сэбиэттэрэ салайааччы Рожина Надежда Федоровна сылын ахсын ыытыллар, үгэскэ кубулуйбут “Полка Добра” акция тэрийэн нэһилиэкпит ытык – мааны ветераннарыгар бэлэх ууннулар.
Ветеран дьоммутугар толору астаах сандалытын Антонина Прибылых иилээн саҕалаан ыытта. Ытык мааны ветераннарбыт ирэ – хоро кэпсэтэн уруккуну хойуккуну санаан ахтан аастылар, истиҥ эҕэрдэлэрин, үтүө баҕа санааларын үөрэ көтө үллэстэн, быыһыгар оонньоон, ыллаан туойан астынан тарҕастылар.
