Бэс ыйын 20 күнүгэр «Ураһалаах» алааһыгар Арассыыйаҕа норуоттар сомоҕолоһууларын, Саха Өрөспүүбүлүкэтигэр култуура, Мэҥэ-Хаҥалас улууһугар олохтоох бэйэ оҥорон таһаарыы сылларыгар аналлаах улууспут ыһыаҕар нэһилиэкпит аатыттан көхтөөх кыттыыны ыллыбыт.
Ыһыах үөрүүлээх чааһыгар улуус салалтата, ыҥырыылаах ыалдьыттар, нэһилиэктэринэн, ону сэргэ Арассыыйаҕа сомоҕолоһуу сылын чэрчитинэн, 12 интернациональнай дьиэ кэргэн, ол иһигэр биһиги нэһилиэктэн Татьяна Сергеевна, Бимба Бимбаевич Цыденжаповтар уонна улууспут тарбаҕар талааннаах маастардарын колоннатыгар Валентина Борисовна Березкина сэлэлээн хаамыыга кытыннылар.
Салгыы, күнүскү омурҕан кэнниттэн улуус ыһыаҕар араас тэрээһиннэр, күрэхтэр, спортивнай күрэхтэһиилэр киэҥ далааһыннаахтык тэриллэн ыытылыннылар. Ол курдук, фольклор түһүлгэтигэр «Самаан сайыны уруйдуу» улууспут талааннаахтарын эҕэрдэ кэнсиэригэр Рима Фадеева «Күөрэгэй көрө» ырыанан кыттан, биир чаҕылхай тэрээһини ситэрэн-киэргэтэн биэрдэ.
Уус түһүлгэтигэр тэриллибит «Мэҥэ Уус» уран тарбахтаах маастардар уус-уран оҥоһуктарын быыстапка-дьаарбаҥкатыгар Валентина Борисовна Березкина көхтөөх кыттыыны ылла.
Улууспут ыһыаҕар «Мэҥэ нэһилиэгэ» тыа сирин түөлбэтин финансиһа Гоголева Елена Васильевна олохтоох бэйэни салайыныы органнарын сайдыытыгар үтүө суобастаах үлэтин уонна тус кылаатын иһин «СР муниципальнай сулууспа туйгуна» бэлиэнэн наҕараадаланна.
Уһун сылларга «Хаххах» өҥөнү оҥорор потребительскай кооператив салайааччытынан үлэлээбит Скрябина Маргарита Ивановна тыа хаһаайыстыбата сайдытыыгар үтүө суобастаах үлэтин уонна тус кылаатын иһин «Гражданская доблесть» бэлиэнэн наҕараадаланна.
Убаастабыллаах Маргарита Ивановна, Елена Васильевна, сыралаах үлэҕит ситиһиилэммитинэн, түбүктээх үлэҕит түмүктээх буолбутунан, нэһилиэкпит олохтоохторун ааттарыттан истиҥ эҕэрдэбитин тиэрдэбит. Баҕарабыт этэҥҥэ буолууну, дьолу, доруобуйаны.
Мэҥэ Хаҥалас улууһун Аҕа баһылыгын биһирэбилигэр хапсаҕайга уонна мас тардыһыытыгар нэһилиэктэр икки ардыларыгар «Мэҥэбил бөҕө күрэҕэ» күрэхтэһиигэ Максим Горькай совхоз сүүмэрдэммит хамаандатыгар, мас тардыһыы көрүҥэр биһиги нэһилиэктэн Андрей Винокуров, Ким Иванов, Алексей Стручков, хапсаҕай көрүҥэр Софрон Софронов илин-кэлин түсүһэн, кыттыбыт хамаандалары барыларын кэннигэр хаалларан, «Максим Горькай» совхоз сүүмэрдэммит хамаандата «Мэҥэбил бөҕө күрэҕэ» күрэхтэһии муҥутуур кыайыылааҕынан тахсан, чемпион аатын сүктүлэр. Мэҥэ Хаҥалас улууһун аҕа баһылыга Дмитрий Иванович Тихонов анал мэтээллэри, 500 тыһыынча солкуобай суумалаах сертификаты дохсун ытыс тыаһын ортотугар туттарда.
Бу курдук, элбэх ситиһиилэрдээх, үөрэн-көтөн улуус тэрээһинигэр көхтөөхтүк кытынныбыт. Быйылгы улууспут ыһыаҕын тэрээһиннэригэр, быыстапкатыгар, спортивнай күрэхтэһиигэ кыттыбыт, нэһилиэкпит аатын ааттаппыт дьоммутугар, ыччаттарбытыгар истиҥ махталбытын тиэрдэбит, мэлдьи бу курдук түмсүүлээх, куруутун инники күөҥҥэ буолуоҕуҥ! Кыайыылаахтарга , наҕараадаламмыттарга өссө төгүл итии-истиҥ эҕэрдэбитин тиэрдэбит.
