Муус устар 8 күнүгэр олохтоох култуура дьиэтигэр Мэҥэ Хаҥалас улууһун социальнай көмүскэллээх буолуу кэлим киин, социальнай уонна пенсионнай пуонда, элбэх функциялаах судаарыстыбаннай уонна муниципальнай өҥөлөрү биэрэр киин специалистара мобильнай биригээдэнэн кэлэн, үгэскэ кубулуйбут, сылын аайы нэһилиэккэ миэстэтигэр олохтоохтору кытта көрсүһүүнү тэрийдилэр. Бу күн нэһилиэкпит олохтоохторо көхтөөхтүк мустаннар, анал специалистары кытта туһааннаах, интэриэһиргиир ыйытыыларынан сэһэргэстилэр, мунаарар боппуруостарын ырытыстылар.
Бу курдук сылын аайы улууспутугар үлэлиир туһааннаах тэрилтэлэртэн мобильнай биригээдэ нэһилиэк олохтоохторугар миэстэтигэр анаан кэлэннэр, дьон-сэргэ туһааннаах боппуруостарыгар эппиэттээн, докумуон уонна да араас көмөлөрү оҥороллоро хайҕаллаах суол. Кыайан айаннаабат нэһилиэкпит олохтоохторо интириэһиргиир ыйытыыларыгар хоруй ыланнар астынан, махтанан тарҕастылар.
