Олунньу 25 күнүгэр олохтоох култуура дьиэтигэр Мэҥэ нэһилиэгэр Кыайыы сылын уонна Аҕа дойдуну көмүскээччилэрин күннэрин чэрчитинэн, нэһилиэк тэрилтэлэрин икки ардыларыгар 2025 сыл устата ыытыллар спартакиада саҕаланна. Тэрилтэлэринэн, ол курдук олохтоох олох-дьаһах коммунальнай хаһаайыстыба уонна «Звездочка» оҕо уһуйаанын коллективтара, Михаил Прокопьевич Габышев аатынан Балыктаах орто оскуолата икки хамаанда, олохтоох дьаһалта, култуура дьиэтэ, почта, балыыһа коллективтара, тыа хаһаайыстыбаларын тэрилтэлэрин уонна урбаанньыттар коллективтара, ветераннар хамаандалара буолан сыл устата ыытыллар спартакиадаҕа күөн көрсүөхтэрэ. Нэһилиэк тэрилтэлэрин икки ардыларыгар ыытыллар спартакиадатын үөрүүлээх чааһын «Мэҥэ нэһилиэгэ» тыа сирин тэриллиитин баһылыга Куприянов Александр Валерьевич эҕэрдэ тылынан аста.
Тэрээһин үөрүүлээх чааһыгар култуура дьиэтин директора Любовь Васильевна Кычкина саамай активнай позициялаах ыччаттары, эр хоһууннары, кинилэринэн сирэйдээн нэһилиэкпит бары аҕаларын, эр дьонун Аҕа дойдуну көмүскээччилэр күннэринэн эҕэрдэлээтэ уонна бу тэрээһин кыттыылаахтарын олохтоох култуура дьиэтин коллективын аатыттан минньигэс тордунан күндүлээтэ.
Нэһилиэк тэрилтэлэрин икки ардыларыгар ыытыллар спартакиада үөрүүлээх чааһын «Сайдыына» вокальнай ансаамбыл эҕэрдэ ырыанан ситэрэн, киэргэтэн биэрдэ.
Нэһилиэк тэрилтэлэрин икки ардыларыгар ыытыллар спартакиада күрэхтэһии балаһыанньатын хаамыытын кылаабынай судьуйа Иван Мохначевскай билиһиннэрдэ.
Салгыы спартакиада бастакы көрүҥэ ол курдук тэрилтэтэр икки ардыларыгар «Веселые старты» күрэхтэһиитэ ыытылынна. Күрэхтэһиигэ түөрт кыыс, түөрт уол састааптаах хамаандалар кытыннылар. Ол курдук бастакы түһүмэх «Мээчиктээх сүүрүү» «Оскуола — 1» хамаандата бастакы кэлэн үөрүүлэрэ үксээтэ, иккис «ЖКХ+Детсад» хамаанда, үһүс «Тыа хаһаайыстыба тэрилтэлэрэ» хамаанда, төрдүс «Администрация+кулууп+почта» хамаанда, бэһис «Оскуола – 2» хамаанда буоллулар.
Күрэхтэһии иккис түһүмэҕэ «Мээчиги соһуу» буолла. Манна «Оскуола — 1» хамаанда иннин биэрбэтэ, иккиһинэн «Тыа хаһаайыстыба тэрилтэлэрэ», үсүһүнэн «ЖКХ+Детсад» тигистилэр, төрдүһүнэн «Администрация+кулууп+почта», бэсиһинэн «Оскуола — 2» хамаандалар түмүктээтилэр.
Үһүс түһүмэх «Теннис мээчигин илдьии-аҕалыы». Бу түһүмэххэ «ЖКХ+Детсад» хамаандата бастакы түмүктээтэ, иккис «Оскуола — 1», үһүс «Тыа хаһаайыстыба тэрилтэлэрэ», төрдүс «Администрация+кулууп+почта», бэһис «Оскуола — 2» хамаандалара буоллулар.
Салгыы «Скакалкалаах сүүрүү» түһүмэх бэрт тыҥааһыннаахтык ааста, түмүккэ «Оскуола — 1» хамаандата бастакы, «Тыа хаһаайыстыба тэрилтэлэрэ» хамаандата иккис, «ЖКХ+Детсад» хамаандата үһүс, «Администрация+кулууп+почта» хамаандата төрдүс, «Оскуола — 2» хамаандата бэһис миэстэлэри үллэһиннилэр.
Биир сэргэх түһүмэх, ол курдук «Тоһоҕо саайыыта» күрэхтэһиигэ «ЖКХ+Детсад» хамаанда кыайыылаах, «Тыа хаһаайыстыба тэрилтэлэрэ» хамаанда иккис, «Администрация+ кулууп +почта» хамаанда үһүс, «Оскуола — 1» хамаанда төрдүс, «Оскуола — 2» хамаанда бэһис миэстэ буоллуллар.
«Миэстэттэн ыстаныы» түһүмэххэ «ЖКХ+Детсад» хамаанда инники күөҥҥэ таҕыста, «Оскуола — 1» хамаанда иккис, «Тыа хаһаайыстыба тэрилтэлэрэ» хамаанда үһүс, «Администрация +кулууп +почта» хамаанда төрдүс, «Оскуола — 2» хамаанда бэһис миэстэлэргэ таҕыстылар.
Сэттис «Кумааҕы быраҕыыта» түһүмэххэ саамай ыраах кумааҕыны быраҕаннар «ЖКХ+Детсад» хамаанда бастакы, «Тыа хаһаайыстыба тэрилтэлэрэ» хамаанда иккис, «Администрация +кулууп +почта» хамаанда үһүс, «Оскуола — 2» хамаанда төрдүс, «Оскуола — 1» хамаанда бэһис миэстэ буоллулар.
Уонна күрэхтэһии бүтэһик «Шариктаах сүүрүү» түһүмэҕэр «Тыа хаһаайыстыба тэрилтэлэрэ» хамаанда бастакы, «ЖКХ+Детсад» хамаанда иккис, «Оскуола — 1» хамаанда үһүс, «Администрация +кулууп +почта» хамаанда төрдүс, «Оскуола — 2» хамаанда бэһис миэстэ буолла.
Нэһилиэк тэрилтэлэрин икки ардыларыгар ыытыллыбыт «Веселые старты» күрэхтэһии түмүгэ маннык буолла, ол курдук 14 очколаах «ЖКХ+Детсад» хамаанда бастакы миэстэни ылары ситистэ, 18 очколаах «Тыа хаһаайыстыба тэрилтэлэрэ» хамаанда иккис бочуоттаах миэстэ, 19 очколаах «Оскуола — 1» хамаанда үһүс миэстэ буоллулар. 30 очколаах «Администрация+кулууп+почта» хамаанда төрдүс, 39 очколаах «Оскуола — 2» хамаанда бэһис миэстэлэри үллэһиннилэр.
Күрэхтэһии көхтөөх бары кыттыылаахтарын, сэргэх көрөөччүлэрин, истиҥ истээчилэрин нэһилиэк тэрилтэлэрин икки ардыларыгар 2025 сыллаах спартакиада бастакы көрүҥэ түмүктэммитинэн эҕэрдэлиибит. Спартакиада бу курдук спорт араас көрүҥнэринэн сыл устата ыытыллан ахсынньы ыйга, саргылаах саҥа дьылы көрсөр тэрээһиҥҥэ уопсай түмүк тахсыаҕа. Барыгытыгар чэгиэн-чэбдик туругу, энчирээбэт эрчими, булгуруйбат модун санааны баҕарабыт. Чугас дьоҥҥут этэннэ буоллуннар, үлэҕит-хамнаскыт ситиһиилэннин, иннигит диэки эрэллээхтик хардыылаан иһин!
