Кулун тутар 2 күнүгэр олохтоох култуура дьиэтигэр «Тыа сирэ -ис турук биһигэ» диэн ааттаах ис турукка үөрэх-дьарык, сахалыы сиэр-туом, санаа атастаһыы республиканскай таһымнаах түһүлгэтэ тэриллэн ыытылынна. Дьокуускайтан, Ньурбаттан, Амматтан, Чурапчыттан, Тааттаттан, Уус Алдантан, Майаттан, Төҥүлүттэн, Хорообуттан, Дойдуттан, Маттаттан элбэх саха куттаах , билиигэ — көрүүгэ тардыһыылаах ыалдьыттар киэҥ саалаҕа тоҕуоруһа муһуннулар.
Сарсыардаттан култуура дьиэтигэр ыраахтан – чугастан айаннаан кэлбит хас биирдии ыалдьыттары өбүгэбит саҕаттан илдьэ кэлбит ыалдьытымсах сиэринэн, “Арчы” түмсүү (салайааччы Рожина Н.Ф.) саха мааны аһынан – алаадьынан, быырпаҕынан айах туттулар, үөрэ – көтө көрүстүлэр.
Кулан Хаан кэлбит дьону саалаҕа мунньан сахалыы сиэр – туом иннинэ ис туругу уһугуннаран, наҕылыйан, чуумпуран сахалыы турукка киллэрэн, аал уотун оттон алгыс сиэрин – туомун олохтоото.
Тэрээһин салгыы эр дьоҥҥо уонна дьахталларга аналлаах түһүмэхтэрэ икки сиринэн, ол курдук эр дьон олохтоох култуура дьиэтигэр, кэрэ аҥардар М.П.Габышев аатынан Балыктаах орто оскуолатыгар тэриллэн ыытылынна.
Кэрэ аҥардарга «Айылҕа, Сир Ийэ, тыа сирэ — аныгы кэмҥэ оҕону, ыччаты, эдэр дьону тыа сириттэн тэйиппэт, айылҕаттан араарбат туһугар» санаа атастаһыытыгар сэһэргэһиини иилээн-саҕалаан ыытта — Евдокия Саввична Решетникова.
Эр дьоҥҥо «Арчыланыы, сэһэргэһии, ис турукка дьарык» диэн өйдөбүлү саас сааһынан сэһэргээтэ Кулан Хаан.
Күнүскү омурҕан кэнниттэн олохтоох култуура дьиэтигэр эр дьоҥҥо «Уол оҕо, эр киһи үлэттэн толлубат буоллаҕына дьиҥ күүстээх туруктанар» атах тэпсэн олорон аһаҕас кэпсэтиини тэрийэн ыытта Егор Кирсанов.
Ону сэргэ оскуола актовай саалатыгар дьахталларга «Арчыланыы, сэһэргэһии, ис турукка дьарык» тематыгар практическай дьарыгы ыытта Кулан Хаан.
«Тыа сирэ — ис турук биһигэ» диэн ис турукка үөрэх-дьарык, сахалыы сиэр-туом, санаа атастаһыы республиканскай таһымнаах түһүлгэтэ күн үҥкүүтэ оһуохайынан өрө көтөҕүллүүлээхтик түмүктэннэ.
