Алтынньы ый 23 күнүгэр Балыктаах култуура дьиэтигэр СР керамистарын союһун чилиэнэ Прасковья Егоровна Лебедева туойтан оҥоһук оҥорон таһаарыыга маастар кылаас тэрийэн ыытта. Барыта 10 киһи кэлэн туойтан оҥоһугу интэриэһиргээн көрдүлэр, иһиттилэр.
Прасковья Егоровна бастаан туой туһунан мустубут дьоҥҥо наһаа үчүгэйдик тиийимтиэтик кэпсээн дьон болҕомтотун тарта.



Саха туой иһитин түҥ былыргыттан XX үйэ бастакы сылларыгар диэри туттубуттар.
Туой оҥорооччу киһини Күөсчүт диэн ытыктаан этэллэрин, былыр-былыргыттан бэйэбитигэр баар, бэл ойууҥҥа, ууска сабарыйтарбат улахан толуу иччилээх идэ буоларын, уүт көмөтүнэн туой иһит убаҕаһы оборбот, аска туттуллар дьиҥ натуральнай, экологичнай иһит буоларын биллилэр.
Ол курдук маастар кылааска туой кистэлэҥин билэн сэҥээрдилэр. Ким тугу баҕарарынан оҥорон түмүгэр киһи санаатын иһинэн ис киирбэх сахалыы ойуулаах-мандардаах, уурбут-туппут курдук чочуонай, сороҕо култаҕар, сороҕо нэлэгэр кыра-улахан кытыйа, дьиэни буруолатарга туттуллар “ураһаны” оҥорон үөрдүлэр-көттүлэр. Ол курдук туой илиигэ олус сыстаҥныы сылдьыбат эбит. Киһи онтон быһыта тыытан ылан, быластылыын курдук, холбоон-илбээн оонньуу туруон баҕарарын санааларын үллэһиннилэр.
Иһити оҥорорго, нарылыырга туттар тэриллэрин күннээҕи олоххо туттуллар биридимиэттэринэн, мас лаппаакынан солбуйар эбит.
Туой иһити оҥоруу уустуга-мачайа элбэҕин, ардыгар оһоххо буһуутугар ханан эрэ хайдан, суолланан хаалыан эмиэ сөп.
Түмүктээн эттэххэ, туой иһиппит араас кистэлэҥэ, иирбэтэ-таарбата, эмтиир күүһэ да олус элбэх эбит.









Салгыы Прасковья Егоровна дьиэтигэр илдьэн куурдан-буһаран аҕаларын оҥорбут дьон бэйэлэрин оҥоһуктарын сотору кэминэн илиилэригэр тутан үөрүөхтэрэ, астыныахтара.
Махтал буоллун Прасковья Егоровнаҕа!
