Алтынньы ый 14 күнүгэр, олохтоох култуура дьиэтигэр Балыктаах бөһүөлэгин үтүө мааны, үлэһит дьонугар-сэргэтигэр, эдэр ыччатыгар, эмэн саастаах ытык кырдьаҕастарга, сахалыы тыыннаах биир дойдулаахтарбытыгар, ытык-мааны ыалдьыттарга анаан Николай Новгородов – Сиэрдээх Сэһэн уонна Аман Винокуров – TUNALQAN кырыа кыһыммыт кэлбитинэн, тыыннаахха, толору куту-сүрү уруйдуур «Соргу Дугуй!» диэн ис эйгэлээх, ырыа-тойук аргыстаах, ийэ тыл арчылыыр, алгыстаах айар киэһээлэрэ буолан ааста.
Үрдүк Айыыларга сүгүрүйэр, иитэр иччилэрдиин иллэһэр, айгыр-силик айылҕабытын кытта алтыһар, дьоһун дьон өйө-санаата түмүллэр, үс кута бөҕөргүүр, өрөгөй талаана арыллар кэминэн, кырыа кыһын кэлбитинэн Николай Новгородов – Сиэрдээх Сэһэн бу киэһэ мустубут көрөөччүлэргэ анаан алгыһын түһэрдэ, күннээҕи түбүктэн сынньанар, эти-хааны хамнатар дьоро киэһээни сэргэхтик саҕалаата.
Салгыы Николай Новгородов уонна Аман Винокуров урукку уонна саҥа айымньыларын, сахалыы ырыа-тойук, горловой, тыыннаах толорууларын дьон-сэргэ астына-дуоһуйа, дохсун ытыс тыаһынан доҕуһуоллаан, сэргэх кэнсиэри астына көрөн тарҕастылар.
Ийэ айылҕабыт дьылын кэрэ кэмнэрэ көмүскэл буолан, тупсан, уларыйан турар кэмигэр хас биирдии көрөөччүлэригэр өҥ-быйаҥ олоҕу, чөл туругу түстээбит эдэр кэскиллээх уолаттарбыт Николай Новгородов – Сиэрдээх Сэһэн уонна Аман Винокуров – TUNALQAN, айар үлэҕитигэр өссө да саҥаттан саҥа саҕахтары арыйа тураргытыгар, үрдүктэн үрдүк ситиһиилэри, тус бэйэҕитигэр, дьиэ кэргэҥҥитигэр дьолу-соргуну, табыллыыны, этэҥҥэ буолууну баҕарабыт.
