Кулун тутар 28 күнүгэр олохтоох култуура дьиэтигэр, «Саха сирэ» хаһыат үлэһиттэрин көҕүлээһиннэринэн, нэһилиэк олохтоохторугар көрсүһүү буолан ааста. «Саха сирэ» хаһыат кылаабынай редактора Александр Тарасов бу күн тэрээһиҥҥэ мустубут нэһилиэк олохтоохторун кытта көрсөн, «Саха сирэ» хаһыат ис тутулун туһунан аһаҕас кэпсэтии тэрийдэ.
Сахабыт сирин биллэр оҕуруотчута Евдокия Степановна Гаврильева – Сибэкки Дуунньа оҕуруотчуттарга аналлаах маастар-кылаас тэрийэн оҕуруот аһын олордууга, ол курдук помудуор, оҕурсу, виноград уонна сибэккини хайдах олордорго бэйэтин сүбэлэриттэн үллэһиннэ, сүбэлээтэ, сиһилии кэпсээтэ. Ону сэргэ коллекционнай, бэйэтэ таһаарбыт үүнээйилэрин, оҕуруот астарын сиэмэлэрин, сибэкки рассадатын, виноград араас көрүҥүн билиһиннэрдэ, атыы-тутуу тэрийдэ.
Бу күн 2025 сыл иккис аҥарыгар «Саха сирэ» хаһыакка 20% чэпчэтиилээх сурутуу ыытылынна. Сурутуу түмүгэр, хас биирдии ааҕааччы «Саха сирэ» хаһыат аатыттан бириистэри тутан үөрдүлэр-көттүлэр.
Бу курдук, «Саха сирэ» хаһыат үлэһиттэрин тэрийиилэринэн бэрт сэргэх тэрээһиҥҥэ нэһилиэкпит олохтоохторо көхтөөхтүк кэлэннэр, хаһыакка сурутан, маастар-кылааска элбэх саҥаны билэн, сибэкки, сиэмэ арааһа ыланнар, аны сайын өлгөм үүнүүлээх оҕуруот аһын үүннэриэхпит диэн дуоһуйан, астынан тарҕастылар.
«Саха сирэ» хаһыат үлэһиттэригэр, Евдокия Степановнаҕа олохтоох култуура дьиэтин коллективын аатыттан сылаас махтал тылларын аныыбыт. Айар үлэҕитигэр үрдүк ситиһиилэри баҕарабыт. Дьоллоох, доруобай буолуҥ!
