Муус устар 27 күнүгэр Саха сирэ биир сүрүн государственнай бырааһынньыга — Республика күнүн чэрчитинэн, М.П. Габышев аатынан Балыктаах орто оскуолатын площадкатыгар Саха АССР культуратын үтүөлээх үлэһитэ, М.К.Аммосов, П.А.Ойуунускай ааттарынан Государственнай бириэмийэлэр лауреата, Мэҥэ Хаҥалас оройуонун, Төҥүлү, Мөҥүрүөн нэһилиэктэрин бочуоттаах гражданина, ССКП сүүрбэ төрдүс съеһин делегата, Саха АССР Верховнай Советын түөрт төгүллээх депутата, биһиги киэн туттар биир дойдулаахпыт Михаил Прокопьевич Габышевка анаан туруоруллубут бюст таһыгар үөрүүлээх митинг буолан ааста.
Бырааһынньыктааҕы линейка-митиҥҥэ нэһилиэк олохтоохторо кырдьаҕастыын-эдэрдиин, нэһилиэк ыччаттара, оскуолабыт үөрэнээччилэрэ көхтөөхтүк кытыннылар. Тэрээһин сүрүн сыалынан — оҕолорго дойдуга тапталы иҥэрии уонна улуу дьоннорбут ааттарын үйэтитии буолла.
Үөрүүлээх чааһы «Мэҥэ нэһилиэгэ» тыа сирин тэриллиитин баһылыга Ньургун Владимирович Габышев уонна Балыктаах орто оскуолатын дириэктэри иитэр уонна үөрэтэр үлэ чааһын солбуйааччыта Надежда Михайловна Осипова эҕэрдэ тылларынан арыйдылар.
М.П.Габышев аатынан оскуола уолаттарын бөлөҕө А.Е. Кулаковскай — Өксөкүлээх Өлөксөй «Оттоку олук алгыһа» уус уран ааҕыы тэрээһини ситэрэн-хоторон биэрдэ.
Митинг сүрүн түгэнинэн Михаил Прокопьевич Габышев бюһугар сибэкки ууруутун сиэрэ-туома буолла. Михаил Прокопьевич олоҕо — кэлэр көлүөнэ ыччакка үтүө холобур буола турдун!
Убаастабыллаах нэһилиэкпит олохтоохторо, биир дойдулаахтарбыт, күндү оҕолор! Бүгүҥҥү тэрээһинҥэ кэлэн, биир сомоҕо буолан кыттыыны ылбыккытыгар муҥура суох махталбытын биллэрэбит, баҕарабыт саха алмааһыныы кытаанах доруобуйаны, үлэҕэ-үөрэххэ үрдүктэн үрдүк ситиһиилэри, этэҥҥэ буолууну.
