Саха Республикатын үрдүнэн сылын аайы тэриллэн ыытыллар «Кыһын саҕаланар Саха Сириттэн» фестиваль чэрчитинэн ахсынньы ый 1 күнүгэр Балыктаахпыт бөһүөлэгэр лаглайбыт харыйабыт уота күлүмүрдүү сандаарар үөрүүлээх түгэнэ буолан ааста.
Харыйабыт уота чаҕылыйа сандаарыан иннинэ бэйэ илиитинэн оҥоһуллубут оонньуурдары ис сүрэхтэн оҥорон аҕалан ыйыырга акция биллэриллибитэ. Ол курдук кыралыын-улаханныын акцияҕа кыттыһан «Звездочка» оҕо уһуйаанын иитиллээччилэрэ, төрөппүттэрэ, оскуола үөрэнээччилэрэ уонна биирдиилээн нэһилиэкпит олохтоохторо сүрдээҕин кыһаллан оҥорон аҕалбыт үгүс элбэх оонньуурдарынан, киэргэллэринэн лаглайбыт харыйабытын кэлэн симээтилэр. Акцияҕа кыттыбыт бары көхтөөх оҕолорбутугар, дьоммутугар сылаас махтал тылларын аныыбыт. Эһиил эмиэ көхтөөх кыттыыны ылыаххыт диэн эрэнэбит!
Тымныы кыһын оҕонньор сиэн кыыһынаан Хаарчааналыын бу күн аан бастаан «Звездочка» оҕо уһуйааныгар ыалдьыттаатылар. Түннүк нөҥүө кырачаан оҕолору кытта алтыстылар, уһуйаан иитиллээччилэрэ Тымныы кыһын оҕонньорго, сиэн кыыһыгар Хаарчаанаҕа анаан кэмбиэргэ угуллубут саҥа дьыллааҕы уруһуйдарын бэлэх ууннулар.
Салгыы Тымныы кыһын оҕонньор сиэн кыыһа Хаарчааналыын дьон-сэргэ, оскуолабыт оҕолоро тоҕуоруһа мустубут сиригэр буранынан айаннатан тиийэн кэллилэр. Тымныы кыһын оҕонньор кэлэн иһэр саҥа дьылынан бэйэтин эҕэрдэтин тириэртэ, бэйэтин сорудаҕын — саҥа дьыллааҕы күрэхтэр балаһыанньаларын түөлбэ салайааччыларыгар, представитэллэригэр үөрэ-көтө бэлэмнэниэххит диэн эрэлин биллэрэн туран туттарда. Сиэн кыыс Хаарчаана саҥа дьыллааҕы кэрэ ырыатыгар, үҥкүүтүгэр оҕо аймах тэҥҥэ кыттыһан ылллаһан, үҥкүүлэһэн дуоһуйа астыннылар.
Саамай күүтүүлээх, долгутуулаах түгэн — Тымныы кыһын оҕонньор харыйабыт уотун сандаарыччы умаппыта дьон-сэргэ сүргэтин көтөхтө, салгыы Тымныы кыһын оҕонньор Саргылаах Саҥа дьыл салаллан иһэрин уруйдаан 3 кылаас кэрэчээн кыргыттарын кытта ырыатын бэлэх уунна.
Түмүккэ Тымныы кыһын оҕонньорбут сиэн кыыһынаан Хаарчааналыын Дьокуускай куоракка салгыы айаҥҥа туруннулар. Кинилэр биэрбит сорудахтарын толорон, ахсынньы 31 күнүгэр олохтоох култуурабыт дьиэтигэр көрсүөх, көрү-нары көҕүлүттэн тутуох буолан үөрэ-көтө атаардыбыт. Бүгүҥҥү тэрээһиҥҥэ кэлэн кыттыыны ылбыт оҕолорбутугар, нэһилиэкпит олохтоохторугар махтанабыт, бу курдук куруук мэлдьи бииргэ буолуоххайын, кэлэн иһэр Саргылаах Саҥа Дьылбытын өрө көтөҕүллэн туран көрсүөҕүҥ!
