Балаҕан ыйын 25 күнүгэр олохтоох култуура дьиэтигэр «Мэҥэ нэһилиэгэ» тыа сирин тэриллиитин дьаһалтатын көҕүлээһининэн, кэлэр 2025 сылга Республикаҕа «Олохтоох көҕүлээһини өйүүр программа» (ППМИ-2025) бырайыагынан конкурска кыттыы саҕаламмытынан, нэһилиэк уопсай мунньаҕа буолан ааста.
Мунньаҕы «Мэҥэ нэһилиэгэ» тыа сирин түөлбэтин баһылыга Куприянов Александр Валерьевич иилээн-саҕалаан ыытта. «Олохтоох көҕүлээһини өйүүр программа» (ППМИ-2025) туһунан баһылыгы солбуйааччы Мохначевский Иван Егорович билиһиннэрдэ, ону тэҥэ эрдэ олохтоох дьаһалта специалистара бэлэмнээн ватсап ситим нөҥүө ыыппыт опростарын түмүгүн иһитиннэрдэ. Иннинээҕи сылларга ППМИ-нан ылыллыбыты, оҥоһуллубуту, толору туһанылла сылдьалларын туһунан сиһилии быһаарда. Мунньах кыттыылаахтара эһиилги сылга ППМИ -2025 конкурсугар туруорсар бырайыактарын тула аһаҕас кэпсэтиигэ кыттан, санаа атастаһыыта көхтөөхтүк тэрилиннэ. Ситим нөҥүө эрдэ ыытыллыбыт опроска барыта 257 нэһилиэк олохтооҕо кыттыбытыттан, баһыйар элбэх куолаһы ылбыт 2 бырайыак куоластааһыҥҥа бу мунньахха киирдэ. Ол курдук бастакы бырайыак «Ийэ скверин тутуу», иккис бырайыак «Кылабыыһа территориятын күрүөлээһин».
Түмүккэ баһыйар куолаһы ситиһэн «Ийэ скверин тутуу» бырайыак талылынна. Ону тэҥэ утары үбүлээһин суумматын 300 солкуобайы хас биирдии нэһилиэкпит олохтооҕо биэрэрин куоластааһынынан быһаарылынна. Онон 2025 сыллаахха Республикаҕа ыытыллар «Олохтоох көҕүлээһини өйүүр программа» (ППМИ-2025) бырайыагынан конкурска Мэҥэ нэһилиэгэ «Ийэ скверин тутуу» бырайыагынан кыттар буолла.
