Ыам ыйын 21 күнүгэр олохтоох култуура дьиэтигэр самаан сайын салаллан тиийэн кэлбитинэн, үтүө үгэскэ кубулуйбут, ытык-мааны ветераннарбытыгар, үлэни өрө туппут туруу үлэһит дьоннорбутугар анаан, Ньукуолуну көрсөр сэргэх тэрээһин буолан ааста.
Бу күн нэһилиэкпит булчут эр дьоннорун көҕүлээһиннэринэн ытык-мааны дьоммутугар — тыыл ветераннарыгар Заровняева В.Г., Черкашин Е.Н., Стручков И.Е., Габышева П.П., сэрии сылын оҕолоругар Куприянова Р.Н., Габышева М.И., Максимова Д.А., Харитонова М.П., Габышева М.Н., Протодьяконов А.Н., Винокуров Н.С., Винокурова А.Х., Ноговицына Е.В. уонна анал байыаннай дьайыы кыттыылаахтарын дьиэ кэргэттэригэр баай байанайдарын бэлэҕиттэн сибиэһэй кус түҥэтэн күндүлээтилэр.
Ньукуолуну көрсө үөрүүлээх тэрээһини бэйэлэрин алгыстаах эҕэрдэлэринэн «Арчы» түмсүү, (салайааччы Надежда Федоровна Рожина) арыйдылар. Бу күн мустубут ытык-мааны ветераннарбытын, күндү ыалдьыттары самаан сайын кэлбитинэн, Петр Дохунаев, Вера Фадеева, Иван Прибылых ылбаҕай ырыаларынан, «Үрүйэ» үҥкүү коллектива «Алаас кыргыттара» үҥкүүнэн, бэйэлэрин эҕэрдэлэрин тириэртилэр.
Салгыы ытык-мааны дьоммутугар анаан саха омук сиэринэн саламааттаах, арыылаах алаадьылаах, нэһилиэкпит эр бэртэрэ байанайдаах булчуттар анаан-минээн күндүлээбит кустарыттан буһарыллыбыт сибиэһэй мииннээх, итии чэйдээх сандалы тула ырыа – тойук, ааспыты ахтан сэлэһэн истиҥ кэпсэтии, араас көрдөөх оонньуулар тэрилиннилэр.
Бу күн мустубут ытык-мааны дьоммут үөрэ-көтө кэпсэтэн, эҕэрдэ тылларын этэн, ылбаҕай ырыаларын ыллаан, көрдөөх оонньууларга көхтөөхтүк кыттан, ыллаан-туойан, үҥкүүлээн, сэргэхсийэн тарҕастылар.
Сандалыны иилээн-саҕалаан ыытта Петр Дохунаев.
Тэрээһиммитигэр күүс-көмө буолбут, чуолаан сибиэһэй кустары кэһии ууммут нэһилиэкпит булчут эр дьонноругар, минньигэс кус миинин буһарбыт олохтоох олох дьаһах хаһаайыстыба салайааччытыгар Ноговицын И.Н. уонна Харитонов С.С., Лихонди Е.А., тэрээһиммитин сэҥээрэн кэлэн кыттыыны ылбыт бары уус-уран самодеятельность кыттыылаахтарыгар уонна ыалдьыттарбытыгар сылаас махтал тылларын аныыбыт. Түмсүүлээх нэһилиэкпит түһүлгэтэ тэнийэ турдун, аан дойду үрдүнэн иллээх-эйэлээх олох олохсуйдун, хас биирдии дьиэ кэргэҥҥэ дьоллоох олоҕу, этэҥҥэ буолууну баҕарабыт. Самаан сайыммыт куйаас, итии, быйаҥнаах күннэри бэлэхтээтин!
