Ыам ыйын 31 күнүгэр Майа сэлиэнньэтин «Ураһалаах» алааһыгар Мэҥэ Хаҥалас улууһун култуураҕа уонна духуобунай сайдыы управлениетын уонна култуура үлэһиттэрин профсоюһун көҕүлээһиннэринэн үгэскэ кубулуйбут Мэҥэ Хаҥалас улууһун култууратын үлэһиттэрин спартакиадата буолан ааста.
Уопсайа култуура үлэһиттэрэ 7 хамаанданан волейболга, пулевой ытыыга, 60×60 саастарынан сүүрүүгэ, көрдөөх стартарга, канат тардыһыытыгар күөн көрүстүлэр. Күрэхтэһиилэр олус көхтөөхтүк, сэргэхтик, тыҥааһыннаахтык, өрө көтөҕүллүүлээхтик аастылар.
Илин-кэлин түсүһүүлээх күрэхтэһиигэ уопсай түмүккэ 1 миэстэ Хоту КМО (Төҥүлү, Тумул, Тарат, Балыктаах, Нуораҕана, Томтор, Матта, Дойду кулууптарын сүүмэрдэммит хамаандата), 2 миэстэ Киин КМО (Д.Ф.Ходулов аатынан НАДь, Хара, Бөкө, Чүүйэ, Лоомтука), 3 миэстэ — Приленскэй КМО (Ороссолуода, Аллара Бэстээх, Павловскай, Хаптаҕай, Хаатылыма) холбоһуктаах хамаандалара буолары ситистилэр. Хас көрүҥ аайы кыайыылаахтар анал мэтээллэринэн наҕараадаланнылар. Уопсай түмүгүнэн бары кыттыбыт хамаандалар миэстэлэринэн анал грамоталарынан, уу харчынан бириэмийэлэнэн, үөрүү аргыстаах тарҕастылар.
Спартакиада бэрт тэрээһиннээхтик, хамаандалар бары кэлбиттэринэн олус көхтөөхтүк, сэргэхтик буолан ааста, тэрийээччилэргэ барҕа махтал буолуохтун!
