Бэс ыйын 4 күнүгэр Майа сэлиэнньэтин «Ураһалаах» алааһыгар, Мэҥэ Хаҥалас улууһун култуураҕа уонна духуобунай сайдыы управлениетын уонна култуура үлэһиттэрин профсоюһун көҕүлээһиннэринэн, үгэскэ кубулуйбут Мэҥэ Хаҥалас улууһун култууратын үлэһиттэрин 31-с спартакиадата буолан ааста.
Уопсайа култуура үлэһиттэрэ 5 хамаанданан волейболга, саастарынан сүүрүүгэ эстэпиэтэ, көрдөөх стартарга уонна канат тардыһыытыгар күөн көрүстүлэр. Күрэхтэһиилэр олус көхтөөхтүк, сэргэхтик, тыҥааһыннаахтык, өрө көтөҕүллүүлээхтик аастылар.
Илин-кэлин түсүһүүлээх күрэхтэһиигэ ,уопсай түмүккэ 1 миэстэ Киин КМО (Д.Ф.Ходулов аатынан НАДь, Хара, Бөкө, Чүүйэ, Лоомтука сүүмэрдэммит хамаандата), 2 миэстэ Култуура (И.М. Сосин аатынан МЦБС, ДЮЭЦ «Кыталык», Р.Г.Васильев аатынан краеведческай музей), 3 миэстэ Приленскэй КМО (Ороссолуода, Аллараа Бэстээх, Павловскай, Хаптаҕай, Хаатылыма) холбоһуктаах хамаандалара буолары ситистилэр. Хас көрүҥ аайы кыайыылаахтар анал мэтээллэринэн наҕараадаланнылар. Уопсай түмүккэ бары кыттыбыт хамаандалар миэстэлэринэн анал грамоталарынан, уу харчынан бириэмийэлэнэн, үөрүү аргыстаах тарҕастылар.
Спартакиада бэрт тэрээһиннээхтик тэриллэн, хамаандалар хомуллан кэлэн олус көхтөөхтүк, сэргэхтик кыттан, 31-с спартакиада ,буоларын курдук үрдүк таһымнаахтык ааста, тэрийээччилэргэ барҕа махтал буолуохтун!
