Төрөөбүт-үөскээбит Мэҥэ — Хаҥаласпыт улууһа олунньу ый 10 күнүгэр тэриллибитэ 95 сылын бэлиэтиир. Бу кэрэ бэлиэ түгэнинэн олунньу ый 7 күнүгэр олохтоох култуура дьиэтигэр «Таптыыбын төрөөбүт дойдубун!» — көлүөнэлэр хамаандаларын икки ардыларыгар «Өркөн өй» күрэҕэ буолан ааста. Күрэх саҕаланыытыгар «Мэҥэ нэһилиэгэ» тыа сирин тэриллиитин баһылыгын солбуйааччы Иван Егорович Мохначевскай эҕэрдэ тылын тириэртэ.
Улууспут, нэһилиэкпит историятын төһө билэҕин диэн өйү мускуйар «Таптыыбын төрөөбүт дойдубун!» күрэхтэххэ «Дьулуур» аҕам саастаахтар, «Мэҥэбил» орто саастаахтар уонна «Сайдыс» эдэр ыччаттар 5-тии киһилээх хамаанда тэринэн кыттыыны ыллылар.
Кыттааччылар бары ох курдук оҥостон, 5 түһүмэҕинэн илин-кэлин түсүһэн күрэхтэстилэр. Ол курдук, бастакы түһүмэххэ Мэҥэ Хаҥалас улууһун историятыттан ыйытыкка эппиэттээтилэр. Бу түһүмэххэ элбэх ыйытыкка сөптөөх эппиэти биэрэн, бастыҥ көрдөрүүнү «Сайдыс» эдэр ыччат хамаандата ситистэ.
Күрэхпит иккис түһүмэҕэр нэһилиэк, нэһилиэк спортун историятыттан, ону сэргэ култуура, айылҕа, литература эйгэтигэр сыһыаннаах биэстии ыйытыкка хоруйдаатылар. Күрэх иккис түһүмэҕэр «Дьулуур» аҕам саастаахтар хамаандата инники күөҥҥэ таҕыста.
Үһүс түһүмэххэ нэһилиэкпит иһинэн тахсыбыт кинигэлэр ааттарын уонна ааптардарын сөпкө сааһылаан уурууга күрэхтэстилэр. Бу түһүмэххэ «Дьулуур» аҕам саастаахтар хамаандата саамай толору сөптөөх хоруйу биэрдилэр.
Төрдүс түһүмэххэ бэриллибит тылтан бириэмэҕэ тыллары таһаарыыга күрэхтэстилэр, ол түмүгэр «Сайдыс» эдэр ыччат хамаандата элбэх тылы таһааран, инники күөҥҥэ таҕыста.
Бэһис түһүмэххэ – блиц-турнирга 1 мүнүүтэҕэ хамаандалар ыйытыктарга эппиэттээн, түмүккэ «Сайдыс» эдэр ыччат хамаандата бастыҥынан ааттанна.
Сытыы киирсиилээх «Өркөн өй» күрэх уопсай түмүгэ маннык буолла: 39 очколаах 1 миэстэни «Сайдыс» эдэр ыччат хамаандата (капитан Габышев Нь.В.) ылары ситиһэн, күрэх кыайыылааҕынан ааттанна. Кыайыылаахтарга анал грамоталар уонна Акулина Егоровна, Игорь Васильевич Стручковтар дьиэ кэргэн олохтообут минньигэс тортара туттарылынна.
2 миэстэни 37,5 очколаах «Мэҥэбил» орто саастаахтар хамаандата (капитан Мохначевскай Е.В.) ылары ситистэ. Хамаандаҕа анал грамоталар уонна Зинаида Софроновна, Владимир Владимирович Цыпандиннар дьиэ кэргэн спонсордаабыт минньигэс тортара ананна.
3 бочуоттаах миэстэҕэ 34,5 очколаах «Дьулуур» аҕам саастаахтар хамаандата (капитан Захарова М.А.) тахсан, анал грамотанан уонна Сарана Бимбаевна Артемьева, Николай Леонидович Кириллин дьиэ кэргэнэ туруорбут минньгэс тортарынан наҕараадалананнар үөрүүлэрэ үксээтэ.
«Таптыыбын төрөөбүт дойдубун!» Мэҥэ Хаҥалас улууһун күнүгэр аналлаах көлүөнэлэр хамаандаларын икки ардыларыгар «Өркөн өй» күрэхпитигэр кэлэн кыттыыны ылбыт дьоммутугар сылаас махтал тылларын аныыбыт. Күндү Балыктаахпыт дьоно-сэргэтэ, биир дойдулаахтарбыт! Сыллата бэлиэтэнэр улууспут төрүттэммит күнүнэн итиитик-истинник эҕэрдэлиибит. Нэһилиэкпит, улууспут, Республикабыт сайдарын туһугар бары түмсүүлээх буолан, үгүс үтүө үлэлэрбитинэн дьон олоҕун таһымын үрдэтиигэ, олорорго, үлэлииргэ табыгастаах эйгэни тэрийэргэ, үлэ бары хайысхатыгар ситиһиилээх, кыайыылаах-хотуулаах буолуоҕуҥ диэн баҕа санаа бастыҥын аныыбыт!
