Кулун тутар 6 күнүгэр олохтоох култуура дьиэтигэр Балыктаах орто оскуолатын 3 уонна 4 кылаастарга үөрэнэр сиэн кыргыттар эбээлэринээн кыттыылаах, сааскы маҥнайгы бырааһынньыгы көрсө, «Мин эбээбинээн — 2025» күрэх буолан ааста.
Оҕо да эрдэххэ, эдэр да сааска, баарадаҕыйар да кэмҥэ, кырдьан сорсуйар да сахха ийэ, эбээ барахсан баара, кэккэлэһэ сылдьара тустаах киһиэхэ – улуу дьол. Бу күрэххэ кыттыыны ыллылар Дьяконова Тамара Гаврильевна сиэнинээн, күн курдук тырымнас мичээрдээх Нина Чалкина — 3 кылаас үөрэнээччитэ, Дьяконова Евдокия Васильевна сиэнинээн, кэрэчээн сибэкки нарын-намчы, ааттыын Туйаарыма Дьяконова — 3 кылаас үөрэнээччитэ, Лихонди Варвара Михайловна сиэнинээн, кыталык курдук кэрэчээн кыысчаан Валерия Лихонди — 3 кылаас үөрэнээччитэ, Ноговицына Наталья Гаврильевна сиэнинээн, сулус курдук сырдыгынан сыдьаайа сылдьар Саша Скрябина — 4 кылаас үөрэнээччитэ.
«Мин эбээбинээн — 2025» күрэх дьүүллүүр сүбэтигэр үлэлээтилэр:
Кычкина Любовь Васильевна – олохтоох култуура дьиэтин директора – дьүүллүүр сүбэ председателэ; Барабанов Михаил Русланович – оройуон баайын-дуолун уонна сиргэ сыһыаннаһыыларын комитетын сүрүннүүр специалиһа; Винокуров Андрей Николаевич – педагогическай үлэ ветерана.
Күрэх 5 түһүмэҕинэн бэрт сэргэхтик, өрө көтөҕүллүүлээх ыытылынна.
1 түһүмэх «Сиргэ түспүт сэрэбиэйим, окко туспут оҥоһуум» — бэйэни билиһиннэрии. Биһиги эбээлэрбит хайа ыалга ытык-мааны эбээ буолан, силис-мутук тардынан, силигилээн, оҕо-уруу төрөтөн, удьуор ууһу тэнитэн олорорун хас биирдии эбээ уонна сиэнэ ситэрэн үөрэ-көтө кэпсээтилэр.
Күрэххэ «Көрөөччү биһирэбилэ» анал бириис оонньонно. Көрөөччүлэр сөбүлүү көрбүт кыттааччыларын бэйэлэрэ таллылар.
«Айыыһыттан айдаран» — күрэхпит 2 түһүмэҕэр кыттааччылар бэйэлэрин уран тарбахтарынан оҥорбут араас оҥоһуктарын аҕалан көрдөрөн сиэннэринээн кэпсииллэрин сэргии көрдүбүт, иһийэ иһиттибит.
«Талааммытынан дьоммутун-сэргэбитин үөрдэбит» — күрэх 3 түһүмэҕэр биһиги эбээлэрбит талба талааннаахтарын көрдүбүт-иһиттибит. Онтон оҕолорбут талааннаах мааныта, киһи кэрэмэһэ буола улаатыахтара диэн бүк эрэнэбит.
«Күһүҥҥү киһи күлбүтүнэн, сааскы киһи салбаммытынан» — күрэх 4 түһүмэҕэр хас биирдии оҕо бэрт имигэстик күөрчэх ытыйда, хас биирдии эбээ дьиэтигэр эт астан оригинальнай бүлүүдэ толкуйдаан оҥорон аҕалан кэпсээтэ, дьүүллүүр сүбэҕэ сыанабылга туттарда.
Ханнык баҕарар киһи сааһа бэйэтэ кэрэлээх, туспа муодалаах, хатыламмат уратылаах. Күрэхпит бүтэһик «Эбээ сундуугун кистэлэҥэ» — 5 түһүмэҕэр көрөөччүлэр сылаас ытыстарын тыаһыгар уйдаран Ретро муода таҥастары эбээлэр сиэн кыргыттарынаан наскылдьыйа хааман көрдөрдүлэр.
Сааскы маҥнайгы бырааһынньыгынан, дьоро киэһээни бэйэлэрин ылбаҕай ырыаларынан Петр Дохунаев, Егор Афанасьев, Иван Прибылых, Гаврил Дьяконов киэргэтэн –ситэрэн биэрдилэр.
Дьүүллүүр сүбэ сүбэлэһэр кэмигэр көрөөччүлэргэ анаан викторина ыытылынна.
Күрэх долгутуулаах түмүктүүр түгэнигэр бу дьоро киэһэ үтүөкэн маанылаах түһүлгэ киэргэллэрэ – нарын-намчы кэрэчээн кыргыттарбытыгар уонна ытык-мааны эбээлэрбитигэр аймах–билэ дьонноро, истиҥ дьүөгэлэрэ, оҕолор бииргэ үөрэнэр доҕотторо бэлэхтэрин үөрэ — көтө туттардылар.
Дьүүллүүр сүбэ быһаарытынан хас биирдии түһүмэх кыайыылаахтарыгар тыыннаах сибэкки дьөрбөтө, анал ааты туоһулуур аалай лиэнтэлэр, туоһу суруктар туттарылыннылар:
«Сиргэ түспүт сэрэбиэйим, окко туспут оҥоһуум» — бэйэни билиһиннэрии түһүмэх түмүгүнэн «Истиҥ иэйиилээх эбээ — 2025» — Наталья Гаврильевна Ноговицына, «Хомоҕой Куо — 2025» — Саша Скрябина (4 кыл.)
«Айыыһыттан айдаран» — дьоҕуру көрдөрөр түһүмэх түмүгүнэн «Уран тарбахтаах эбээ — 2025» — Евдокия Васильевна Дьяконова, «Туйгууна Куо — 2025» — Туйаарыма Дьяконова (3 кыл.)
«Талааммытынан дьоммутун-сэргэбитин үөрдэбит» — талааны көрдөрөр түһүмэх түмүгүнэн «Талба талааннаах эбээ — 2025» — Варвара Михайловна Лихонди, «Кэскилээнэ Куо — 2025» — Валерия Лихонди (3 кыл.)
«Күһүҥҥү киһи күлбүтүнэн, сааскы киһи салбаммытынан» — ас астааһына түһүмэх түмүгүнэн «Минньигэс астаах эбээ — 2025» — Тамара Гаврильевна Дьяконова, «Күлүмчээнэ Куо – 2025» — Нина Чалкина (3 кыл.)
«Эбээ сундуугун кистэлэҥэ» — ретро муода түһүмэх түмүгүнэн «Сайдам мааны эбээ – 2025» — Евдокия Васильевна Дьяконова, «Сиэдэрэй Куо — 2025» — Туйаарыма Дьяконова (3 кыл.)
Көрөөччүлэр бэйэлэрин быһаарыыларынан көрөөччү биһирэбилэ «Алгыстаах эбээ — 2025» — Варвара Михайловна Лихонди, «Мичийээнэ Куо — 2025» — Валерия Лихонди (3 кыл.)
Уопсай түмүккэ «Мин эбээбинээн — 2025» күрэх кыайыылаахтарыгар анал аат туттарылынна: «Ытык-мааны эбээ — 2025» — Тамара Гаврильевна Дьяконова, «Сааскылаана Куо — 2025» — Нина Чалкина (3 кыл.)
Үтүө, ураты түһүлгэни бэлэхтээбит кэрэчээн кыргыттарбытын, ис киирбэх эбээлэрбитин көрөн сөхтүбүт-махтайдыбыт. Көрбүккүт курдук, бииртэн биир мааны таҥастаах, бэрт имигэстик туттан-хаптан, нарын куоластарынан, дьоһуннаахтык хамсанан лыах курдук эргичийэн, таайтарардыы көрөн-истэн, күлэн-үөрэн мичилийэн сыанаҕа тахсан умнуллубат кэрэ киэһээни бэлэхтээбиккитигэр ис сүрэхтэн тахсар сылаас махтал тылларын аныыбыт. Эһиэхэ барыгытыгар Айыыһыт алгыһын курдук амарах санааны, Иэйиэхсит эҕэрдэтин курдук эйэҕэс сыһыаны баҕарабыт. Бу курдук куруук дьоҥҥо кэрэ, үөрүүлээх түгэннэри бэлэхтии сылдьыҥ, тупса туругура туруҥ, үүнэн-үрдээн иһиҥ, эһигинниин үгүс үөрүү үөрдүстүн, дьол-соргу тосхойдун!
