Муус устар 11 күнүгэр олохтоох култуура дьиэтигэр Аграфена Дмитриевна Макарова аатынан Дьокуускайдааҕы култуура уонна урамньы кэллиэһин устудьуоннара кыттыылаах «Күн Өркөн» айар түһүлгэтин сахалыы тыыннаах уус – уран самодеятельноһын кэнсиэрэ буолан ааста.
Бу киэһэ биһиги нэһилиэкпитигэр ыалдьыттаата саха сирин араас муннуктарыттан мустубут үөрэх – сайдыы киэн дуолун тэлэйэн, норуотун алгыһын кутугар сөҥүрдэн, сайаҕас сырдык санааларын, ыраах ыҥырар ыраларын, ыраас иэйии ымыыларын сайдам – ыллам ырыа гынан, өрө көтөр үҥкүү гынан, үрдүккэ көтүтэр аналлаах, ыллам – сайдам санаалаах эдэр дьон – «Күн Өркөн» оҕо дьон!
Бииртэн биир тупсаҕай, ураты нүөмэрдэри көрөн көрөөччүлэр ытыстарын тыаһа залы толордо.
Ол курдук «Кымыс» үҥкүүтүнэн кэнсиэри арыйдылар.
Алгыс тойугунан эҕэрдэлээтэ Лена Степанова.
«Алгыс» үҥкүүнү толордулар Арассыыйатааҕы норуоттар айымньыларын үтүөлээх коллектива «Өркөн» үҥкүү народнай ансаамбыла, уус – уран салайааччы СӨ култууратын үтүөлээх үлэһитэ Алена Павлова.
С.А. Зверев – Кыыл уола репертуарыттан «Үтүө күннэр» таҥалай ырыатын толордо Дьуур Егоров.
«Ыһыах төгүлэ» норуот ырыатын толордулар «Эйгэ» сиэр-туом народнай тыйаатыра, уус–уран салайааччы СӨ култууратын үтүөлээх үлэһитэ Мария Боппоенова.
«Кыталык» үҥкүүтүн толордулар «Өркөн» народнай үҥкүү ансаамбыла.
«Күрүлгэн» хомусчуттар бөлөхтөрүн толоруутугар «Сыыйа тардыы».
Устин Нохсоороп ырыаларынан попурри, толордулар «Эйгэ» сиэр – туом народнай тыйаатыра.
Петр Тобуруокап хоһоонугар, Христофор Максимов дьүрүлүгэр «Кырдал кыыһа» толордулар «Толомон» уолаттар ансаамбыла.
«Оһуор үҥкүүтэ», үҥкүүнү толордулар «Өркөн» народнай үҥкүү ансаамбыла.
Тимофей Сметанин хоһоонугар, Ольга Иванова – Сидоркевич дьүрүлүгэр «Манчаары» норуот ырыатын толордулар төрүт култуура салаатын 3 куурсун устудьуоннара.
Павел Семенов репертуарыттан «Туман буолбут», Василий Гоголев – Уйулҕан хоһоонугар Константин Степанов репертуарыттан «Ийэкээм» ырыалары толордо звукооператорскай маастарыстыба салаатын 3 курсун устудьуона Арсен Сокорутов.
Анастасия Варламова хоһоонугар уонна дьурүлүгэр «Аҕам алааһа» ырыаны толордо театральнай салаа 2 курсун устудьуона Никита Лукин.
Валерий Данилов хоһоонугар уонна дьүрүлүгэр «Саха кыыһа», «Айанньыт» ырыалары толордо Олимпия Алексеева.
Иннокентий Гаврильев – Лэкиэс репертуарыттан «Доҕотторбор» уонна Айгылаан репертуарыттан «Кэскили түстүөххэ» ырыалары толордо звукооператорскай маастарыстыба салаатын 3 курсун устудьуона Арсен Сокорутов.
«Дэгэрэн» үҥкүүнү толордулар «Өркөн» народнай үҥкүү ансаамбыла.
Кэнсиэр «Күн Өркөн» гимнинэн, сэргэх үҥкүүнэн өрө көтөҕүллүүлээхтик түмүктэннэ.
Бука бары көрөөччүлэрбит сахалыы тыыннаах эргиччи талааннаах эдэр ыччат кэнсиэрин биир тыынынан көрөн, дуоһуйа сынньанан тарҕастылар.
Бүгүҥҥү сааскы киэһэ «Күн Өркөн» иитиллээччилэрэ нэһилиэкпит олохтоохторугар хатыламмат дьикти түгэннэри бэлэхтээтилэр, талааннаах саха ыччатын кытта бииргэ буолан, умсулҕаннаах айар аартыктарын арыйсан, айар үлэ дьикти алыбар ылларан, сахалыы тыыннаах кэнсиэри дуоһуйа көрдүбүт. Күндү ыалдьыттарбытыгар, убаастабыллаах көрөөччүлэрбитигэр бука барыгытыгар баҕа санаа бастыҥын аныыбыт! Илгэ – быйаҥ түстэннин, үөрүү – көтүү элбээтин, дьол – соргу тосхойдун, саргы – дьаалы салалыннын!
