Ахсынньы 31 күнүгэр олохтоох култуура дьиэтигэр «Саҥа дьыллааҕы күлүмнэс күөх уот» үүнэн иһэр 2024 сылы көрсөр бырааһынньыктааҕы шоу – программа тэрээһин буолан ааста.
Бу эрэ күҥҥэ саҥа көрсүһүүлэр, баҕа санаа туолуута, араас алыптаах түгэн тосхойуута өрүүтүн буоларын курдук олус сэргэхтик, тэрээһиннээхтик “Голубой огонек”, шоу- программа форматынан тэриллэн ыытылынна.
Бу дьоро киэһэҕэ интэриэһинэй дьоннор ыҥырыллыбыттар, сэргэх күрэхтэри, ырыалаах-үҥкүүлээх соһуччу түгэннэри бэлэмнээбиттэр. Билэргит курдук урут сотовай телефон, интернет суох кэмигэр хас бырааһынньыктар аайы сылаас эҕэрдэ тыллардаах араас дьэрэкээн ойуулардаах открыткалар аадырыстанан кэлэллэрин санатан, уруккуну –хойуккуну кэпсэтиинэн саҕаланна саҥа дьыл киэһэтэ.
Остуоруйаҕа этиллэринэн өссө былыргы Кытайга уонна Египекка саҥа дьылга бэйэ-бэйэлэригэр открытка бэлэх биэрэн саҕалаабыттар. Онтон Европаҕа эҕэрдэ открыткалары оҥорон бэлэхтиири 13-14 үйэлэргэ бэлиэтэммит. Биллэн турар, бу олус сыаналаах күндү бэлэх буолара, кыахтаах, баай эрэ дьон туһаналлара. Арай 19- с үйэ ортотуттан эҕэрдэ открыткалары дьон-сэргэ бука бары туһанан араас дойду муннуктарыгар тиийэ бэйэлэрин эҕэрдэлэрин суруйан открытка нөҥүө ыытыһар буолбуттара.
Бу дьоро киэһээбитигэр аан дойдубут араас муннуктарыгар олорор омук норуоттара саҥа дьылларын хайдах бэлиэтииллэрин биһиэхэ билиһиннэрэр саҥа дьыллааҕы открыткалар буолаллар эбит. Открыткаларынан сирдэтиллэн «Күлүмнэс күөх уот» шоу-программа ыытылынна.
Бүгүн өссө аан дойдубут араас муннугар, араас омуктар бэйэлэрин үгэстэринэн сана дьылы хайдах көрсөллөрүн билистилэр. Сана дьыллааҕы открыткаларынан кэпсээн, сирдэтэн араас дойдулар үҥкүүлэрин нэһилиэкпит тэрилтэлэрэ билиһиннэрдилэр. Маҥнайгы саҥа дьыллааҕы открыткабыт итии дойдуга Индияҕа аадырыстаммыт.
Индияҕа Саҥа дьылы хайдах көрсөллөрүн билиһиннэрэбит. Саҥа дьыллааҕы харыйа оннугар манго маһын илиинэн оҥоһуллубут оонньуурдарынан, араас минньигэстэринэн киэргэтэллэр эбит. Куорат уулуссаларыгар чаҕылхай карнаваллар, күрэхтэһиилэр, дьаарбаҥкалар тэриллэннэр ааһаллар. Индия олохтоохторо бэйэлэрин араас дьэрэкээн сибэккинэн киэргэнэннэр бары дьиэ кэргэнинээн уулуссаҕа ыллыы, үҥкүүлүү тахсаллар.
Индия алыптаах дойдутуттан эһиэхэ анаан кулууп коллективын, ыччаттар толорууларыгар индийскай үҥкүү.
Алыптаах киэһэбитигэр ыалдьыттыыр араас дойду норуоттарын саҥа дьылларын салгыы билистибит. Дьэрэкээн открытка Краснодарскай кыраайга аадырыстаммыт, билэргит курдук онно казак норуоттара олороллор. Кубань казактара Саҥа дьылы «Сиэдэрэй биэчэр» эбэтэр «Кыраан киэһэ» диэн ааттыыллар. Бырааһынньык иннинэ сэрэбиэйдииргэ табыгастаах кэм, түүл-бит туолуутугар итэҕэйэллэр эбит. Дьиэлэрин дьэрэкээн быысабайдаах сотторунан, түннүк сабыыларын сибэккилэринэн киэргэтэллэр эбит. Саҥа дьыл түүн халлаан сырдыар диэри костер уот оттон ол тула Кубань олохтоохторо мустаннар ыллыыллар, үҥкүүлүүллэр, илгэлээх үүнүү буоллун диэн үҥэллэрэ, бу маннык кэми кубаннар өбүгэлэрэ «Мороза греть» эбэтэр «Морозу бороду шмалить» диэн ааттыыллара.
Олох – дьаһах коммунальнай хаһаайыстыба коллективын толоруутугар Кубань казахтарын үҥкүүтэ.
Аныгыс открытка Узбекистан дойдутугар аадырыстаммыт эбит , онон узбек норуоттар саҥа дьылларын хайдах бэлиэтииллэрин билистибит.
Узбек омуктар саҥа дьылы иккитэ бэлиэтииллэр эбит. Европа стилинэн тохсунньу 1 күнүгэр бэлиэтэнэр. Былыргы үгэстэринэн бу бырааһынньык кулун тутар 21 күнүгэр сааскы тэҥнэһиилээх күнүгэр ааһар, навруз диэн ааттыыллар эбит. Узбек омуктар саҥа сылы хайдах көрсүөҥ да, сылгын оннук атаарыан диэн итэҕэйэллэр эбит, ол иһин туох-баар иэстэрин төлөөн, кимиэхэ да иэс биэрбэккэ, кыыһырсыбыт буоллахтарына бырастыы көрдөһөн, кэлэр сыл былааннарын оҥорорго кыһаналлар. Биир интэриэһинэй үгэстэринэн ааспыт сылга табыллыбаты суох гынан, саҥа сыл үчүгэйи түстээтин диэн хайдыбыт тэриэлкэлэрин алдьаталлар. Бырааһынньыктааҕы остуолларыгар хайаан да арбуз фрукта баар буолуохтаах.
Кыра тэрилтэлэр — балыыһа, ветучасток, маҕаһыын үлэһиттэрин толоруутугар Узбекистан дойдутуттан эҕэрдэ кэһиилээх узбекскай үҥкүү
Узбекистан аҕалбыт открыткатын кэннигэр Испания дойдутугар аадырыстанан суруллубут.
Испания норуота саҥа дьылларын дьиэлэригэр буолбакка куорат киин болуоссатыгар “Күннээх боруота” ол эбэтэр “Солнчные врата” мустаннар бары бииргэ норуот күүлэйинэн көрсөллөр, биир үгэстэринэн 12 түүн чаһы хас курант тыаһын аайы биир биир виноград отонун сии сии баҕа санааларын этэллэр, 12 виноград отонун чаһы курант тыаһын кэмигэр успейдаан сиэбит баҕа санаалара туолар, 12 ый ситиһиилээхтик ааһар диэн итэҕэйэллэр эбит.
Олохтоох оскуола коллективын толоруутугар испанскай үҥкүү.
Испания норуоттара хаалларан барбыт открытката эмиэ анаммыт аадырыстаах. Ол курдук Саҥа дьылы цыган норуоттар 3 күнү быһа бэлиэтииллэр. Хаастан, бөтүүктэн бүлүүдэ арааһын астыыллар. Абыычай быһыытынан күнүс эбиэттэн түүн 12 чааска дылы ааннарын хатаан ким да таһырдьа тахсыбат, ким да киирбэт да эбит уонна дьэ түүн 12 чаас кэннэ саҥа сылы көрсө бэйэ бэйэлэригэр ыалдьыттаһаллар, бастакы ыалдьыт ким буолара элбэҕи быһаарар дииллэр.
«Звездочка» оҕо уһуйаанын коллективын толоруутугар ылбаҕай ырыа доҕуһуоллаах, тыастаах-уустаах бэһиэлэй цыган норуотун үҥкүүтэ.
Бэһиэлэй үҥкүүлээх цыган норуоттара хаалларбыт открыткаларынан сирдэтэн Турцияҕа тиийэбит.
Турция саҥа дьылы дьиэ кэргэнинэн дьиэлэригэр бырааһынньыктааҕы остуол тула мустан, үөрэ-көтө кэпсэтэн, эҕэрдэлэһэн ылаллар, Турция сорох куораттарыгар «Яркое новогодье» диэн уоттаах-күөстээх фестиваль тэриллэн туристарга, ыалдьыттарга анаан бырааһынньыктааҕы кэнсиэрдэр, ярмаркалар ыытыллаллар.
Олохтоох дьаһалта уонна «Хаххах» кооператив коллективтарын толоруутугар турецскай үҥкүү.
Турция дойдутун ыалдьыттара хаалларбыт открыткалара Кытай дойдутугар сирдээтэ.
Кытай норуота үгэһинэн саҥа дьыл түүнүгэр утуйбакка сарсыардааҥҥы диэри сылдьаллар, ол кэннэ аймахтарыгар, доҕотторугар бэлэх тутуурдаах күүлэйдии бараллар эбит. Саҥа дьылларын бары уопсай күүлэйинэн, ыллаан-туойан, үҥкүүлээн, араас хлопушка тыаһатан этэргэ дылы уоттаахтык тыастаахтык ылалллар. Кытай норуота куһаҕан тыыны киэр кыйдаан үүрэбит диэн санаалаах итинник ньиргиэрдээх тыаһы тыаһатан араас хлопушкалары эһэллэр эбит. Ыраах Кытай сиригэр күн бүгүн олохсуйан олорор Туйаара, Михаил Платоновтар дьиэ кэргэнэ биир дойдулаахтарын видеосибээс нөҥүө саҥа дьыллааҕы эҕэрдэлэрин тириэртилэр.
Бүтэһик открытка чаҕылхай төлөн уоттаах ааһан иһэр куруолук сыла биһиэхэ 1956 сыллаахха тахсыбыт «Карнавальная ночь» киинэни санатта. Араас ылбаҕай ырыалардаах, кэрэ-нарын үҥкүүлэрдээх «Карнавальная ночь» киинэ бар дьон кутун-сүрүн ылыаҕын ылбыта. Бу дьоро киэһэҕэ «Күлүмнэс күөх уот» шоу-программабытыгар «Карнавальная ночь» киинэ чаҕылхай түгэннэриттэн ахтан-санаан аастыбыт.
Дьон кутун туппут «5 минут» ырыа.
Композитор Кручини композициятынан пенсионердар духовой оркестра.
Кыргыттар толорууларыгар зонтиктаах үҥкүү.
Евгений Дьяконов, Давид Михайлов толорууларыгар мексиканскай үҥкүү.
Официантка кыргыттар ырыалара.
Фокусник-иллюзионист саҥа дьыллааҕы эҕэрдэтэ.
«Карнавальная ночь» киинэ финальная ырыата «Песенка о хорошем настроении».
Саҥа дьыллааҕы открыткаларынан сирдэтэммит төрөөбүт дойдубутугар – сүүһүнэн уот лаампалаах, ырыаҕа ылланар, хоһооҥҥо хоһуйуллар, Мэҥэ сирэ бастыҥа – Балыктаахпыт бөһүөлэгэр тиийэн кэллибит.
Ааһан эрэр сыл биһиги бөһүөлэккэ үгүс үтүмэн түмүктэрдээх. 2023 сылга Россияҕа уһуйааччы уонна аҕа сүбэһит, Саха сиригэр Үлэ, Мэҥэ-Хаҥаласка тыа хаһаайыстыбатын, Мэҥэ нэһилиэгэр олох-дьаһах коммунальнай хаһаайыстыба сыллара биллэриллэн сыл устата киэн далааһыннаах былааннар ылынаннар үгүс үлэлэр, тэрээһиннэр ыытылыннылар.
Эҕэрдэ тылын тириэртэ «Мэҥэ нэһилиэгэ» тыа сирин тэриллиитин баһылыгын солбуйааччытын Мохначевскай Иван Егорович уонна наҕараадалары туттартаата.
Уһун сылларга таһаарыылаах үлэтин иһин «Мэҥэ нэһилиэгин бочуоттаах олохтооҕо» анал бэлиэ уонна удостоверение туттарылынна – АНДРОСОВ НИКОЛАЙ ИЛЬИЧКА – үлэ ветерана, Саха Республикатын автомобильнай транспортын бочуоттаах үлэһитэ, Максим Горькай уонна Мэҥэ совхозтарга уһун сылларга эҥкилэ суох үтүө суобастаахтык улэлээбит ветеран суоппар.
2023 сыл түмүгүнэн нэһилиэкпит тэрилтэлэринэн бастыҥтан бастыҥ үлэһиттэринэн буоллулар:
-Сүөһү көрүүтүн өҥөтүн оҥорор «Хаххах» потребительскай коопертив сыл бастыҥ үлэһитинэн ааттанна – НОГОВИЦЫНА НАТАЛЬЯ ГАВРИЛЬЕВНА — “Мэҥэ нэһилиэгин Бочуот кинигэтигэр” киирбит, уһун сылларга «Сүрэх тыа» түөлбэ салайааччытынан үлэлээбит, бастыҥ общественник, элбэх оҕо күн күбэй ийэтэ, эйэҕэс эбээтэ.
— Александр Георгиевич Семенов аатынан Балыктаахтааҕы врачебнай лаборатория сыл бастыҥ үлэһитинэн ааттанна – СОТНИКОВА АКУЛИНА ФЕДОРОВНА – врачебнай лаборатория үрдүк категориялаах медицинскай сиэстэрэтэ, үлэ ветерана, нэһилиэк бастыҥ общественнига.
— Михаил Прокопьевич Габышев аатынан Балыктаахтаах орто оскуолатын сыл бастыҥ үлэһитинэн ааттанна – ГАБЫШЕВА ЯНА ИЛЬИНИЧНА – биология, химия учуутала, 11 кылаас кылааһын салайааччыта, Саха Республикатын «Надежда Якутии» бэлиэ хаһаайката.
— Оһох-дьаһах коммунальнай хаһаайыстыба сыл бастыҥ үлэһитинэн ааттанна НОГОВИЦЫН НИКОЛАЙ СЕМЕНОВИЧ – олох-дьаһах коммунальнай хаһаайыстыба оператора, нэһилиэккэ ыытыллар тэрээһиннэр активнай кыттыылаҕа, үс оҕо амарах аҕата.
— Балыктаахтааҕы «Звездочка» оҕо уһуйаанын сыл бастыҥ үлэһитинэн ааттанна – НОГОВИЦЫНА ГАЛИНА НИКОЛАЕВНА — Оҕо уһуйаанын иитээччи солбуйааччыта, элбэх оҕо амарах ийэтэ, нэһилиэкпит спортивнай, түөлбэ общественнай олоҕор көхтөөх кыттааччы.
— Балыктаахтааҕы ветеринарнай учаастак сыл бастыҥ үлэһитинэн ааттанна – НИКИТИНА ТАТЬЯНА СТЕПАНОВНА – ветеринарнай быраас, үлэ ветерана, нэһилиэк, түөлбэ общественнай олоҕор активнай кыттыылааччы, амарах ийэ, эйэҕэс эбээ.
— Олохтоох култуура дьиэтин сыл бастыҥ үлэһитинэн ааттанна – НОГОВИЦЫН СЕМЕН АЛЕКСАНДРОВИЧ — олохтоох култуура дьиэтин охраннига, нэһилиэк биир бастыҥ общественнига, элбэх оҕо амарах аҕата.
—Тыа хаһаайыстыбатын эйгэтигэр сыл бастыҥ үлэһитинэн ааттанна – ГОВОРОВ ДЬУЛУСТАН ГЕННАДИЕВИЧ – бааһынай фермерскай хаһаайыстыба салайааччыта, «Мичээр» үҥкүү коллективын чилиэнэ.
— Предпринимательство эйгэтигэр сыл бастыҥ үлэһитинэн ааттанна – КИРИЛЛИН НИКОЛАЙ ЛЕОНИДОВИЧ – урбаанньыт, нэһилиэккэ ыытыллар тэрээһиннэр биир бастыҥ спонсора, көхтөөх кыттаачы.
— Спорт уонна физическай култуура эйгэтигэр сыл бастыҥ спортсменынан ааттанна – ШИШИГИНА АННА ИЛЬИНИЧНА – бастыҥ дуобатчыт, улуустааҕы, республикатааҕы, бүтүн россиятааҕы дуобат көрүҥэр араас таһымнаах күрэхтэһиилэр чемпиона уонна призера.
— Спорт уонна физическай култуура эйгэтигэр сыл бастыҥ спортсменынан ааттанна – ПЕТР КЫЧКИН – Дьокуускайдааҕы медицинскай колледж 1 курсун устудьуона, ааһан иһэр 2023 сылга мас тардыһыы көрүҥэр төрөөбүт нэһилиэгин үгүстүк көмүскээбит тарбахха баттанар кэскиллээх ыччаппыт, республикатааҕы, бүтүн россиятааҕы мас тардыһыыга араас таһымнаах күрэхтэһиилэр чемпиона уонна призера.
— Михаил Прокопьевич Габышев аатынан Балыктаахтаах орто оскуолатын сыл бастыҥ үөрэнээччитинэн ааттанна – ВИНОКУРОВ САЙДАМ – 10 кылаас үөрэнээччитэ, үөрэх туйгуна, «Тускул» оҕо тэрилтэтин лидера, оскуола иһинэн үлэлиир «Инникигэ хардыы» медиаклуб чилиэнэ, саха литературатыгар уонна обществознаниеҕа улуустааҕы олимпиадатын призера, Саха Республикатын «Профессиональнай мастерствоҕа» чемпионатын «Туризм» компетенцияҕа муниципальнай этап призера, мас тардыһыыга, баскетболга, спорт саха национальнай көрүҥнэригэр улуустааҕы, республикатааҕы араас таһымнаах күрэхтэһиилэр призердара, «Инникигэ хардыы» республикатааҕы научнай практическай ааҕыы «Математика науката» секцияҕа улуустааҕы этап лауреата, республиканскай этап кыттыылааҕа, Казахстаҥҥа тэриллибит профориентационнай-образовательнай тур чэрчитинэн «Айар кут — Голливуд» республиканскай лааҕыр кыттыылааҕа.
Нэһилиэкпит үбүлүөйдээх саастарын туолбут ытык-мааны ветераннарбытыгар үтүө үгэс быһыытынан эҕэрдэ сурук, өйдөбүнньүк бэлиэ туттарылынна:
— Ноговицына Лидия Михайловнаҕа — Төҥүлүтээҕи участковай балыыһа акушерката, үлэ ветерана, үрдүк категориялаах акушерка, Саха Республикатын доруобуйатын харыстабылын туйгуна.
— Ноговицын Прокопий Прокопьевичка — үлэ ветерана, Максим Горькай, Мэҥэ совхозтарга уһун сылларга тыа хаһаайыстыбатын эйгэтигэр эҥкилэ суох үтүө суобастаахтык үлэлээбит ытык-мааны ветераммыт.
— Кычкин Петр Павловичка– Михаил Прокопьевич Габышев аатынан Балыктаах орто оскуолатын суоппара, үлэ ветерана, Саха Республикатын автомобильнай транспортын бочуоттаах үлэһитэ.
— Черкашина Ирина Васильевнаҕа – Российскай Федерация уопсай үөрэхтээһинин бочуоттаах үлэһитэ, Саха Республикатын үөрэҕириитин үтүөлээх үлэһитэ, Саха Республикатын үөрэҕин туйгуна, Саха Республикатын тыатын хаһаайыстыбатын туйгуна, өр сылларга Мэҥэ нэһилиэгин тыа сирин тэриллиитин баһылыгынан үлэлээбит ытык-мааны ветераммыт.
Харитонов Спиридон Алексеевичка – нэһилиэккэ уһун сылларга үтүө суобастаахтык үлэлээбит үлэ ветерана.
— Кычкина Любовь Васильевнаҕа – олохтоох култуура дьиэтин директора, үлэ ветерана, Российскай Федерация уопсай үөрэххэ уонна наукаҕа бочуоттаах үлэһитэ, Саха Республикатын үөрэҕин туйгуна, учууталлар учууталлара.
Күүтүүлээх күндү ыалдьыттарбыт Тымныы кыһын оҕонньор, Хаарчааналыын ыраахтан айаннаан бүгүҥҥү дьоро киэһээбитигэр тиийэн кэлэн эҕэрдэлэрин тириэртилэр, саҥа дьыллааҕы күрэхтэр түмүктэрин таһаардылар:
«Фэмили луук» дьиэ кэргэнинэн Саҥа дьыллааҕы хаартысканан күрэххэ уопсайа 8 ыал кыттыыны ылла, түмүккэ көхтөөх кыттыыларын иһин Ирина Даниловна, Егор Васильевич Афанасьевтар, Любовь Васильевна, Андрей Николаевич Винокуровтар, Яна Ильинична, Ньургун Владимирович Габышевтар, Сайаана Софроновна, Максим Максимович Кубаровтар, Саргылаана Романовна Степанова, Нюргун Иннокентьевич Гоголев дьиэ кэргэттэригэр көхтөөх кыттыыларын иһин туоһу суругу, сэмэй бэлэхтэри туттартаата. 175 куолаһы ылан 3 миэстэни Виктория, Алексей Неустроевтар, 212 куолаһы ыланнар 2 миэстэни Яна Яковлевна, Айтал Борисович Васильевтар, 664 куолаһы ылан 1-кы миэстэни Татьяна Артуровна, Игорь Игоревич Стручковтар дьиэ кэргэттэригэр анал грамоталар, сэмэй бириистэр туттарылыннылар.
«Союзмультфильм» студия айан таһаарбыт сөбүлүүр мультфильмнарбыт геройун үтүктэн объемнай оҥоһук күрэҕэр 4 киһи кыттыыны ылла. Түмүккэ Прибылых Вероника Афанасьевнаҕа көхтөөх кыттыытын иһин туоһу сурук, сэмэй бэлэх туттарылынна. 3 миэстэни Мохначевская Прасковья Ивановна, 2 миэстэни Гоголев Нюргун Иннокентьевичка, 1-кы миэстэни Цыденжапов Бимба Бимбаевич ылары ситиһэн анал грамотанан, сэмэй бириистэринэн наҕараадаланнылар.
«Кыһыҥҥы оһуор» дьиэ кэргэнинэн саҥа дьыллааҕы хаһыаты оҥоруу күрэҕэр 2 кыттааччы кыттыыны ылла. Ол курдук «Сүрэх тыа» түөлбэ коллектива 2 миэстэҕэ, «Хаххах» потребительскай кооператив коллектива 1-кы миэстэҕэ тахсаннар анал грамотанан, сэмэй бириистэринэн наҕараадаланнылар.
«Араас матырыйаалтан бэйэ оҥорбут харыйата»саҥа сылы көрсө объемнай харыйа оҥоһук күрэҕэр 5 кыттааччы кыттыыны ылла. Түмүккэ Яна Яковлевна, Айтал Борисович Васильевтар дьиэ кэргэҥҥэ, Кычкина Лариса Лаврентьевнаҕа көхтөөх кыттыыларын иһин туоһу сурук, сэмэй бириис туттарылынна. 3 миэстэни Ирина Даниловна, Егор Васильевич Афанасьевтар дьиэ кэргэн, 2 миэстэни Татьяна Сергеевна Цыденжапова, 1-кы миэстэни Саргылаана Романовна Степанова ылары ситиһэн анал грамотанан, сэмэй бириистэринэн наҕараадаланнылар.
«Сыл бэлиэтэ — дракон» түөлбэлэр икки ардыларыгар кэлэн иһэр саҥа сыл бэлиэтэ — дракон объемнай оҥоһук күрэҕэр түмүк маннык буолла: 3 миэстэ «Нагорнай» түөлбэ, салайааччы Васильева Яна Яковлевна, дракону оҥордо Яна Яковлевна. 2 миэстэ «Лесной» түөлбэ, салайааччы Мордискина Антонина Николаевна, дракону оҥордо Осипов Иван Иванович. 1-кы миэстэ «Сүрэх тыа» түөлбэ, салайааччы Ноговицына Наталья Гаврильевна, дракону оҥордулар Вероника Прибылых, Юра Ноговицын.
«Саргылаах саҥа дьыл» саҥа дьыллааҕы биирдиилээн маскарад көстүүмүн күрэххэ кыайыылаахтарынан ааттаннылар: Кэрэ аҥардарга 2 миэстэ — Стручкова Сардана Степановна, 1-кы миэстэ — Рожина Надежда Федоровна. Эр дьоҥҥо 1-кы миэстэ – Габышев Ньургун Владимирович. Кыайыылаахтарга анал грамота, сэмэй бириис туттарылынна.
«Алыптаах саҥа дьыл дойдута» дьиэ кэргэнинэн тэлгэһэни киэргэтии күрэххэ түмүк маннык таҕыста: 3 миэстэ — Ньургуяна Владимировна Местникова, Софрон Иванович Дьяконов дьиэ кэргэн, 2 миэстэ – Людмила Михайловна, Иван Иванович Мохначевскайдар дьиэ кэргэн, 1 миэстэ – Евдокия Васильевна, Гаврил Иванович Дьяконовтар дьиэ кэргэн. Кыайыылаахтарга олохтоох дьаһалта анал грамота, сертификат туттарылынна.
Сыл устата ыытыллан кэлбит тэрээһиннэргэ нэһилиэкпит түөлбэлэрэ түмсэннэр, барытыгар куруутун активнайдык кыттан кэллилэр. Бу дьоро түгэҥҥэ «Аартык», «Сайдыс», «Сүрэх тыа», «Лесной», «Нагорнай» түөлбэлэрин салайааччылара түөлбэҕэ сыл устата активнайдык кыттыбыт дьонноругар махтал суруктарын, сэмэй бэлэхтэрин туттартаатылар.
«Саҥа дьыллааҕы күлүмнэс күөх уот» шоу-программаны кыайа-хото, иилээн-саҕалаан ыыттылар Татьяна Стручкова, Михаил Рожин.
Бу курдук саҥа 2024 сылы бука бары бииргэ түмсэн үөрэ-көтө көрүстүбүт. Тэрээһиммитигэр көхтөөх кыттыыны ылбыт тэрилтэлэргэ, ыччаттарбытыгар, күрэхтэргэ кыттыыны ылбыт нэһилиэкпит олохтоохторугар истиҥ махтал тылларын аныыбыт. Бука барыгытыгар баҕарабыт умнуллубат кэрэ түгэннэрдээх дьоллоох үтүө кэмнэри, эһиэхэ анаан күн сыдьаайа тыгыахтын, сыламныыр уотун сылааһын ыытыахтын! Алаһа дьиэҕит сылаас эркиннэннин, аал уот күөдьүйэ умайан уостубат уйгуну, быстыбат быйаҥы түстээтин, дьиэҕитигэр сылдьар ыалдьыт сонуна сойботун, кэпсээнэ дэлэйдин! Бука барыгытыгар ситиһиилээх Саҥа сыл тосхойдун!
