«Василий Константинович Степанов аатынан култуура уонна спорт эстафетата» 69-с төгүлүн ыытыллар фестиваль уус-уран оҥоһук быыстапкатыгар бэлэмнэнии чэрчитинэн нэһилиэк ветераннарын сэбиэтин председателин Елена Кимовна Кычкина көҕүлээһининэн тирииттэн, түүлээхтэн үлэлэр хайысхаҕа көбүөр оҥоһуутугар күн ахсын илиинэн тигии үлэ барар. Аттаран, кыбытан тигиллэр көбүөр тириитин аттарыыга иистэнньэҥнэр Мордискина Антонина Николаевна, Ноговицына Екатерина Андреевна салайыыларынан, нэһилиэк ветераннара «Ситим» түмсүү дьиэтигэр мустаннар, күннэрин туһалаахтык атаараллар.
Ону сэргэ Рожина Надежда Федоровна салайааччылаах «Арчы», «Доруобуйа» түмсүүлэр уус-уран оҥоһук быыстапкатыгар бэлэмнэнэн кылтан, сиэлтэн үлэлэр хайысхаҕа Березкина Валентина Борисовна салайыытынан сапсыыка оҥоһуутун саҕалаатылар.
Бу курдук нэһилиэкпит дьоно-сэргэтэ, тэрилтэлэрэ бары биир сүбэнэн мустан, биир сомоҕо буолан «Василий Константинович Степанов аатынан култуура уонна спорт эстафетата» 69-с төгүлүн ыытыллар фестиваль уус-уран оҥоһук быыстапкатыгар бэлэмнэнэн үлэлииллэр-хамсыыллар.
