Арассыыйаҕа дьиэ кэргэн, Саха сиригэр оҕо сылын чэрчитинэн Ньурбатааҕы судаарыстыбаннай көһө сылдьар драматическай тыйаатыр айар бөлөҕө тохсунньу 29 күнүттэн Мэҥэ Хаҥалас улууһугар гостуруоллуур туура саҕаламмыта. Ол курдук олунньу 5 күнүгэр Федоров Прокопий Давыдович салайааччылаах Ньурбатааҕы тыйаатыр айар бөлөҕө Саха Өрөспүүбүлүкэтин култууратын туйгуна, тыйаатыр сүрүн режиссера Алгыс Макаров-Сиэн Мөрөс туруорбут оҕолорго аналлаах Редьярд Киплинг айымньытын матыыбынан «Сурук хайдах айыллыбытай» уонна Анжелина Ильина айымньытынан «Һөҕүҥ» испэктээктэринэн ырыаҕа ылланар, хоһооҥҥо хоһуллар Мэҥэ сирин бастыҥа — Балыктаах дьонугар-сэргэтигэр ыалдьыттаатылар.
Ньурбатааҕы тыйаатыр артыыстарын «Арчы», «Доруобуйа» түмсүүлэрин далбар хотуттара арыылаах алаадьынан, минньигэс саламаатынан, толору астаах сандалы остуол тардан сахалыы сиэринэн көрүстүлэр. «Арчы» түмсүү салайааччыта Рожина Надежда Федоровна алгыс ырыатынан туойан, бур-бур буруо таһааран, кэлбит ыалдьыттары ыраастаата, алҕаата.
Киэһэ түөрт чаастан оскуола үөрэннээччилэрэ, учууталлар олохтоох култуура дьиэтин саалатыгар тоҕуоруһа мустаннар, Редьярд Киплинг айымньытын матыыбынан «Сурук хайдах айыллыбытай» оҕоҕо олус наадалаах, улахан суолталаах испэктээкили биһирии, астына-дуоһуйа көрдүлэр.
Салҕыы киэһэ сэттэ чаастан буолбут Анжелина Ильина айымньытынан «Һөҕүҥ» испэктээккэ кэлбит нэһилиэкпит олохтоохторо испэктээги биир тыынынан көрдүлэр.
Бу курдук Балыктаах бөһүөлэгэр испэктээк кэрэ киэһэтин тэрийбит Ньурбатааҕы судаарыстыбаннай көһө сылдьар драматическай тыйаатыр айар бөлөҕөр нэһилиэкпит олохтоохторун аатыттан сылаас махтал тылларын аныыбыт. Тыйаатыр артыыстарыгар айар үлэҕитигэр үрдүктэн үрдүк ситиһиилэри, тус олоххутугар, чугас дьоҥҥутугар чэгиэн доруобуйаны, дьолу-соргуну баҕарабыт.
