Сэтинньи 25 күнүгэр « Идэһэ – 2022» түөлбэлэр икки ардыларыгар быыстапка – дьаарбанка тэриллэн ыытылынна. Бу киэһэ эт, балык ас, сахалыы бурдук ас, үрүҥ ас арааһын быыстапкатыгар, «Оригинальнай композиция» – Идэһэ 2022 сыл араас аһыттан бүлүүдэ, «Собо, собо барахсан» саамай улахан собо, «Мааны Маҥааччыйа» мааны ынаҕы хаартыскаҕа түһэрии, «Стоп , кадр !» оживи фрагменты «Золотые хиты Советского кино», «Сүөһү төбөтүттэн туйаҕар дылы туһата» сүөһү төбөтүн сүлүүгэ күрэхтэр, ону сэргэ, түөлбэлэр икки ардыларыгар көрдөөх эстафета олус интэриэһинэйдик, илин – кэлин түсүһэ ыһыылаах – хаһыылаах, бэрт сэргэхтик ыытылыннылар.
Дьүүллүүр сүбэҕэ үлэлээтилэр: Мохначевскай И.Е.- «Мэҥэ нэһилиэгэ» ТСТ баһылыгын солбуйааччы, Долгунова Л.В. – олохтоох култуура дьиэтин специалиһа, Чалкина А.И. – Мэҥэ нэһилиэгин тыа хаһаайыстыбаҕа специалиһа.
Күрэхтэр түмүктэрэ маннык буоллулар:
1. Түөлбэлэр икки ардыларыгар эт, балык ас, сахалыы бурдук ас, үрүҥ ас арааһын быыстапкатыгар сыаналанна: 1. Ас көрүҥүн арааһа, 2. Түөлбэттэн хас киһи кыттыыта, 3. Быыстапка турар сирин тупсаҕайдык киэргэтии. Быыстапканы бары түөлбэлэр бииртэн биир ис сүрэхтэн кыһаллан оҥорбут эриэккэстэн эриэккэс бүлүүдэлэрэ киэргэттилэр. Дьүүллүүр сүбэ быһаарыытынан 1 миэстэ «Сүрэх тыа» түөлбэ (сал. Степанова С.Р.), 2 миэстэ «Аартык» түөлбэ (сал. Стручкова С.С.), 3 миэстэ «Сайдыс» түөлбэ буолары ситистилэр. Маны сэргэ ситиһиилээхтик түөлбэ чиэһин көмүскээтилэр «Лесной» (сал. Мордискина А.Н.), «Нагорнай» түөлбэлэр.
2. «Идэһэ – 2022 сыл аһын көрүҥүттэн оригинальнай композиция» — бүлүүдэ күрэҕэр түөлбэ аайыттан бары Далбар Хотуттар олус бэлэмнээх кытыннылар. Манна сыаналанна: 1. Композицияҕа төһө элбэх ас арааһа туттуллубута. 2. Төһө оригинальнайдык оҥоһуллубута, киэргэтиллибитэ. 3.Кыттааччы кэпсиир тыла – өһө. Чахчы да олус интэриэһинэйдик толкуйдаммыт композициялары биһирии көрөн баран түмүккэ 1 миэстэ Ноговицына Н.Г. (Сүрэх тыа), 2 миэстэ Кычкина А.В. (Сайдыс), 3 миэстэ Кычкина М.С. (Лесной) буолан үөрүү – көтүү өрөгөйүн биллилэр. Маны сэргэ ситиһиилээхтик түөлбэ чиэһин көмүскээтилэр Трифонова Е.А. (Аартык), Васильева Я.Я. (Нагорнай).
3. «Собо, собо барахсан» — саамай улахан собону быһаарар күрэх. Бу күрэххэ бары да саамай улахан соболорун аҕалбыттар. Мантан көстөрүнэн быйылгы мунхаҕа бөдөҥ лэчигирэс соболорунан баай Байанай мичик гыммыт эбит диэн сыаналыыбыт. Түмүккэ 1 миэстэ — Барабанов М.Р. (Нагорнай), 2 миэстэ – Ноговицына Н.Г. (Сүрэх тыа), 3 миэстэ – Цыденжапова Т.С. (Аартык) буолары ситистилэр. Маны сэргэ ситиһиилээхтик түөлбэлэрин чиэһин көмүскээтилэр Владимиров И.В. (Сайдыс), Осипова Н.М. (Лесной).
4. Солун күрэҕинэн «Мааны Маҥааччыйа» түөлбэттэн хас баҕар саастаах ынах сүөһүнү киэргэтэн хаартыскаҕа түһэрэн аҕалан билиһиннэрии буолла. Бу күрэххэ сыаналанна: 1. Маанытык киэргэммитэ. 2. Оригинальность. 3. Тупсаҕай тылынан сиһилии билиһиннэрии. Олус интэриэһинэйдик ынахтар симэммиттэрин көрөн баран түмүккэ 1 миэстэ – Гоголева Е.В. (Лесной), 2 миэстэ –Бродникова П.Г. (Сүрэх тыа), 3. Миэстэ – Стручкова Е.И. (Сайдыс) ылары ситистилэр. Маны сэргэ ситиһиилээхтик түөлбэлэрин чиэһин көмүскээтилэр Габышева Я.И. (Аартык), Васильева Я.Я. (Нагорнай).
5. « Стоп , кадр! « Оживи фрагменты из кинофильма « Золотые хиты Советского кино» диэн бэрт сэргэх күрэх буолла. Бу күрэххэ түөлбэлэр көҥүл темаҕа хит буолбут сэбиэскэй киинэттэн биир түгэни тилиннэрэн тохтотон көрдөрдүлэр. Сыаналанна: 1. Теманы сөпкө арыйыы. 2. Кыттааччы ахсаана. 3. Үтүктүү маастарыстыбата. Көрөн – истэн , дуоһуйа сэргэхсийэн түмүккэ 1 миэстэ — «Сүрэх тыа», 2 миэстэ – «Лесной», 3 миэстэ «Нагорнай» түөлбэлэр буоллулар. Маны сэргэ ситиһиилээхтик түөлбэлэрин чиэһин көмүскээтилэр «Аартык», «Сайдыс».
6. «Сүөһү төбөтүттэн туйаҕар дылы туһата» — сүөһү төбөтүн сүлүүгэ күрэх. Бу күрэххэ түөлбэ аайыттан биирдии эр бэрдэ кытынна. Сыаналанна: 1. Түргэн туттуу, хаачыстыбалаах сүлүү. Түөлбэ аайы бары да олус сатабыллаах, түргэн – тарҕам туттунуулаах эр бэрдэрэ кыттыыны ылан курэҕи сытыырҕатан биэрдилэр. Түмүккэ 1 миэстэни Владимиров И.В. (Сайдыс), 2 миэстэни Сотников П.П. (Сүрэх тыа), 3 миэстэни Шишигин И.Е. (Лесной) ылары ситиһэн , кыайыы өрөгөйүн биллилэр. Маны сэргэ ситиһиилээхтик түөлбэтин чиэһин көмүскээтэ Дохунаев П.В. (Аартык).
7. Ыһыылаах – хаһыылаах көрдөөх эстафетаҕа түөлбэ аайыттан 3 эр киһи, 2 кэрэ аҥар кыттыылаах хамаандалар кыттыыны ылан илин – кэлин түһүстүлэр. Бииртэн биир көрүдьүөс этаптары ааһан 1 миэстэҕэ «Сүрэх тыа», 2 миэстэҕэ «Аартык», 3 миэстэҕэ «Лесной» түөлбэлэр таҕыстылар. Маны сэргэ ситиһиилээхтик түөлбэлэрин чиэһин көмүскээтилэр «Сайдыс», «Нагорнай» түөлбэлэр.
Бары күрэхтэр кэннилэриттэн «Идэһэ – 2022 сыл» тоҥ ас, кыһыҥҥы хаһаас уонна да атын астартан аукцион тэрилиннэ. Аукциоҥҥа түөлбэлэр уонна биирдиилээн дьон көхтөөхтүк кыттан араас бородууксуйаны оонньоттулар. Убаһа ойоҕоһо, тоҥ кыһыллар балык, куулунан собо, ынах хаана, иһэ уо.д.а бородуукта арааһа сыана быһыллан, үрдэтиллэн хамаҕатык атыыга барда. Саамай хайҕаллааҕа бу аукционтан киирбит үп – харчы бу ыытыллыбыт 7 көрүҥ күрэх түмүгүнэн кыайыылаах тахсыбыт түөлбэҕэ бириэмийэ быһыытынан туттарыллар диэн эрдэ балаһыанньаҕа киирбитэ. Онон бу киэһэ саамай түмсүүлээх, бэлэмнээх буолан кыайыы өрөгөйүн биллэ уонна харчынан бириэмийэни – 7 370 солкуобай уу харчыны тутта «Сүрэх тыа» түөлбэ ( салайааччы Степанова С.Р.).
Быйылгы «Идэһэ – 2022» быыстапка – дьаарбанка кэмигэр соһуччу түгэннэр буоллулар. Ол курдук «Лесной» түөлбэ ( сал. Мордискина А.П.) сыл устата ыытыллыбыт күрэхтэргэ туппут анал бириэмийэ сертификаттарын нэһилиэкпититтэн анал байыаннай дьайыыларга сылдьар ыччаттарбытыгар көмө быһыытынан туттарга олохтоох дьаһалтаҕа туттардылар. Ону сэргэ «Сайдыс» түөлбэ аатыттан быйыл депутатынан талбыт Анастасия Ивановна Чалкинаҕа өйдөбүнньүк бэлиэ туттардылар. Ону сэргэ Сүрэх тыа түөлбэ саҥа талыллыбыт салайааччытыгар Степанова Саргылана Романовнаҕа Наталия Гаврильевна Ноговицына анал бэлиэтин туттарда.
Быйылгы тэрээһиҥҥэ нэһилиэкпит бары 5 түөлбэтин олохтоохторо көхтөөх кыттыыны ылбыттарын тоһоҕолоон туран бэлиэтиибит уонна истиҥ махтал тылларын аныыбыт! Баҕарабыт бука барыгытыгар чэгиэн чэбдик доруобуйаны, үлэҕэ – үөрэххэ үрдүктэн үрдүк ситиһиилэри, тус олоххутугар, дьиэ кэргэттэргитигэр этэҥҥэ буолууну , мэлдьи ыраас халлааны!
