Сэтинньи 19 күнүгэр олохтоох культура дьиэтигэр биэс түөлбэ кыттыылаах «Идэһэ киэһэтэ — 2021» түөлбэлэр икки ардыларыгар быыстапка-дьаарбаҥка күрэҕэ буолан ааста. Уһун кэмнээх тохтобул кэнниттэн нэһилиэкпит олохтоохторо өр мустубакка-көрсүспэккэ сылдьан баран бу үтүө, дьоро киэһэ бары ох курдук оҥостон, тэринэн кэлэннэр, быыстапкаҕа анаан бэйэлэрэ астаан аҕалбыт араас көрүҥ бүлүүдэлэрин туоруораннар, күрэхтэргэ барытыгар көхтөөхтүк кыттаннар сэргэх тэрээһин буолла. Кыттааччылар бары билиҥҥи кэм ирдэбилин тутуһан куар кодтаах киирдилэр.
Түөлбэлэртэн бастыҥ хаһаайыстыбалаах дьиэ-кэргэттэр бэйэлэрин үлэлэрин-хамнастарын слайданан көрдөрө көрдөрө сиһилии билиһиннэрдилэр. Ол курдук, «Аартык» түөлбэттэн – Ньургун, Яна Габышевтар, «Лесной» түөлбэттэн — Илья, Христина Мохначевскайдар, «Нагорнай» түөлбэттэн — Айтал, Яна Васильевтар, «Сайдыс» түөлбэттэн — Олег, Елена Стручковтар, «Сүрэх тыа» түөлбэттэн — Гаврил, Евдокия Дьяконовтар кытыннылар. Түөлбэлэр араас аһы астаан аҕалан остуол муҥунан тардан кэбистилэр,турар миэстэлэрин сахалыы киэргэтэн көстүүтүн тупсардылар. Дьүүллүүр сүбэ кэрийэн көрөн сыаналаата. Бастакы миэстэ «Сайдыс» түөлбэ — салайааччылар Попова Анна Владимировна, Семёнова Мария Матвеевна, иккис миэстэ «Лесной» түөлбэ – салайааччы Гоголева Елена Васильевна, үһүс «Сүрэх тыа» түөлбэ салайааччы Ноговицына Наталья Гаврильевна ылары ситиһэн кыайыы өрөгөйүн билэн үөрдүлэр-көттүлэр. «Оригинальнай бүлүүдэ» күрэҕэр бастакы Дьяконова Евдокия Васильевна, иккис Иванова Татьяна Егоровна, үһүс Цыденжапова Татьяна Сергеевна солун бүлүүдэлэринэн сөхтөрөннөр инники күөҥҥэ таҕыстылар.
«Хартыынаны тилиннэр» диэн биир интэриэһинэй күрэххэ бастакы миэстэ «Лесной», иккис «Аартык», үһүс «Сүрэх тыа» ааттаннылар.
«Көрдөөх стартар» спортивнай күрэххэ түөлбэлэртэн кытыннылар. Бастакы «Лесной», иккис «Нагорнай», үһүс «Аартык», төрдүс «Сайдыс», бэһис «Сүрэх тыа» буоллулар. Кыайыылаах «Лесной» түөлбэ олохтоох администрация бирииһин биир куул балык ылла.
Бу киэһээ атыылаан элбэх дохуоту киллэрэн анал бириис Саргылана Катакиноваҕа туттарылынна. Быыстапка-дьаарбаҥкаҕа элбэх ыалы кытыннаран бастыҥ түөлбэ анал бириискэ «Аартык» түөлбэ тигистэ, салайааччы Стручкова Сардана Степановна.
Бу киэһээҥҥи биэчэргэ конкурстарга бириистэри туруорбут олохтоох урбаанньыттарбытыгар: Игорь Васильевич уонна Игорь Игоревич Стручковтарга, Зинаида Софроновна, Владимир Владимирович Цыпандиннарга уонна Александра Николаевна, Владислав Владимирович Цыпандиннарга истиҥ махтал тылларын аныыбыт.
Быыстапка-дьаарбаҥканы олохтоохтор сүрдээҕин сэргээтилэр-хайҕаатылар, ыллаан-туойан, үҥкүүлээн бары астынан тарҕастылар.