Ахсынньы 24 күнүгэр Майа сэлиэнньэтигэр «Дьол түһүлгэтэ» уопсастыбатын киинигэр Мэҥэ Хаҥалас улууһун нэһилиэнньэ көмүскэллээх буолуутун биир кэлим киинин иһинэн үлэлиир улуустааҕы инвалидтар түмсүүтэ көҕүлээһиннэринэн, улууспут доруобуйаларынан хааччахтаах дьонноругар аналлаах Саҥа Дьыллааҕы тэрээһин буолан ааста. Биһиги нэһилиэктэн Парасковья Гаврильевна Бродникова салайааччылаах «Эрэл» түмсүү, ол курдук Февронья Васильевна Ноговицына, Альбина Николаевна Борисова, Ньургуяна Романовна Гоголева, Анна Егоровна Шишигина, Елена Егоровна Турантаева, Марфа Николаевна Осипова, Егор Ильич Шишигин, Николай Николаевич Ноговицы, уопсайа 9 буолан көхтөөх кыттыыны ылан, бары маскараад буолан, үөрэн-көтөн, сынньанан, сэргэхсийэн кэллилэр.
Нэһилиэкпит «Эрэл» түмсүүтүн туһунан А3 форматтаах хаһыат күрэҕэр 2 миэстэни ылары ситистилэр. Маскараад күрэҕэр Ньургуяна Гоголева 2 бочуоттаах миэстэни ылан үөрүүтэ үксээтэ, ону сэргэ ырыа күрэҕэр Елена Турантаева, ситиһиилээхтик кыттан, сэмэй бэлэх тутта. Сыл устата элбэх күрэхтэргэ, спортивнай күрэхтэһиилэргэ, тэрээһиннэргэ Татьяна Сергеевна ситиһиилээхтик кыттан «Бастыҥ общественник — 2024» анал махтал суругунан наҕараадаланна. Ытык-мааны ыалбытыгар, Екатерина Иннокентьевна, Семен Николаевич Ноговицыннар дьиэ кэргэҥҥэ ыал буолан, оҕо-уруу төрөтөн, бу орто дойдуга дьоллоохтук ньир-бааччы олорбуттара 50 сылларынан эҕэрдэлээн туран, улуустааҕы социальнай политика управлениетын салалтатын аатыттан эҕэрдэ сурук, сэмэй бэлэх туттарылынна. Улуус инбэлииттэрин уопсастыбатын түмсүүтүн аатыттан Парасковья Гаврильевна Бродникова махтал суругунан, сэмэй бэлэҕинэн наҕараадаланна.
Түгэнинэн туһанан, «Эрэл» түмсүү коллективын кэлэн иһэр Саргылаах саҥа дьылынан итиитик-истинник эҕэрдэлиибит, мэлдьитин бу курдук инники күөҥҥэ сылдьыҥ! Сыл устата нэһилиэкпит бары тэрээһиннэригэр көхтөөхтүк кыттыбыккытын бэлиэтээн туран, хас биирдиигитигэр махтал сылаас тылларын аныыбыт. Баҕарабыт чэгиэн-чэбдик доруобуйаны, этэҥҥэ буолууну!
