Муус устар 11 күнүгэр нэһилиэкпитигэр «Дорообо, сандал саас!» кыһыны атаарар норуот күүлэйэ буолан ааста.
Бу күн нэһилиэкпит олохтоохторугар, ыалдьыттарыгар, оҕолорбутугар сандал сааһы уруйдуур эҕэрдэ кэнсиэр, тэрилтэлэринэн, биирдиилээн дьон кыттыылаах атыы-тутуу, сибиэһэй салгыҥҥа атынан хатааһылааһын, нэһилиэк эр дьонун хамаандаларын икки ардыларыгар аналлаах күрэхтэһии тэриллэн ыытылынна.
Кыһыны атаарыы норуот күүлэйин бырааһынньыга «Мэҥэ нэһилиэгэ» тыа сирин тэриллиитин баһылыга Ньургун Владимирович Габышев эҕэрдэтинэн саҕаланна.
Бүгүҥҥү бырааһынньыгы, ырыаны-тойугу таптыыр дьоммутун — түмэн олорон сааскы ылбаҕай ырыаларынан киэргэттилэр:
Аркадий Алексеев тылыгар «Таммахтар» ырыанан Вера Фадеева.
Татьяна Суздалова тылыгар «Барыта үчүгэй» ырыанан «Доруобуйа» түмсүү (салайааччы Ноговицына М.И.).
Далаана репертуарыттан «Мин дойдум Саха сирэ» ырыанан Ева Попова.
Артур Семенов репертуарыттан «Санаабынан» ырыанан Артем Дьяконов.
Христина Соколова репертуарыттан «Көмүс дорҕоон» ырыанан «Сайдыына» вокальнай ансаамбыл.
«Сааскы ырыанан» Петр Дохунаев.
Күндэл репертуарыттан «Суор» ырыанан Мотрена Монастырева.
Олимпия репертуарыттан «Кубалар» дуэтнай ырыанан Мотрена Монастырева, Аня Гаврильева.
Умсуура репертуарыттан «Куорсуннаах» ырыанан Ева Попова.
Эльза Павлова репертуарыттан «Санаабар» ырыанан Анна Гаврильева.
Саина репертуарыттан «Сааскы киэһэ» ырыанан Рима Фадеева.
Ону сэргэ нэһилиэкпит олохтоохторо сандал сааһы уруйдаан астаах-үөллээх атыы-тутуу дьаарбаҥкатыгар түмсүүлээхтик оҥостон, тэринэн, көхтөөх кыттыыны ылбыт сылаас саламаатынан, ас эгэлгэтинэн күндүлээбит М.П. Габышев аатынан орто оскуола коллективыгар (директор Иванов Е.Н., профсоюз председателэ Цыпандина К.Н.), минньигэс плов амсаппыт олохтоох дьаһалта коллективыгар (баһылык Габышев Нь.В., профсоюз председателэ Мохначевскай И.Е., эдэр ыччат лидера Говоров Л.Г.), итии буруолуу сылдьар сахалыы эт миининэн айах туппут олох-дьаһах коммунальнай хаһаайыстыба коллективыгар (салайааччы Харитонов С.С., профсоюз председателэ Стручков И.И.) уонна биирдиилээн минньигэс астардаах атыыһыттарбытыгар Габышева Александра Николаевнаҕа, Степанова Саргылаана Романовнаҕа, Протодьяконова Мотрена Николаевнаҕа, Шарина Алена Ивановнаҕа, Мохначевская Христина Иннокентьевнаҕа, биир дойдулаахпытыгар Габышева Маргарита Николаевнаҕа махтал сылаас тылларын аныыбыт.
Бу сылаас күн оҕо-аймах сыарҕалаах атынан, сааскы тыаллыын сырсан, астына-дуоһуйа хатааһылаатылар.
Салгыы нэһилиэкпит эр дьоннорун икки ардыларыгар көрдөөх эстафета ыытылынна. Күрэхтэһиини иилээн-саҕалаан ыыттылар «Мэҥэ нэһилиэгэ» тыа сирин тэриллиитин баһылыгын солбуйааччы Иван Егорович Мохначевскай, Михаил Русланович Барабанов.
Тыҥааһыннаах 5 түһүмэх киирсиилэрин түмүгүнэн барыларын кэннилэригэр хаалларан уопсайа 7 очколаах 1 миэстэни олохтоох ОДьКХ хамаандата ылары ситистилэр.
11 очколаах 2 миэстэҕэ эдэр ыччат хамаандата эрэллээхтик таҕыста.
3 миэстэ — орто оскуола хамаандата.
Кыайыылаахтар махтал суруктары, өйдөбүнньүк бэлэхтэри тутан, мэтээл кэтэн, үөрүү өрөгөйүн биллилэр.Түгэнинэн туһанан күрэхтэһиибит сүрүн спонсорыгар, өрүү күүс – көмө буола туруохтара диэн туран, ИП «Мета лошади» салайааччытыгар Кычкин П.П. олохтоох култуура дьиэтин коллективын аатыттан ис сүрэхпититтэн махтал тылларын аныыбыт. Баҕарабыт мэлдьитин бу курдук көмө, өйөбүл буола сылдьаргытыгар, үлэҕит-хамнаскыт куруутун таһаарыылаах буоллун!
«Дорообо, сандал саас!» кыһыны атаарар норуот күүлэйэ тэрээһиммит соһуччу түгэнинэн нэһилиэкпит саахыматчыттарын, дуобатчыттарын түмсүүлэрин аатыттан Шишигина Анна Егоровна,Цыденжапова Татьяна Сергеевна Михаил Барабановка, үрдүк үөрэх кыһатын ситиһиилээхтик бүтэрбитинэн эҕэрдэлээн туран, сэмэй бэлэхтэрин дохсун ытыс тыаһын ортотугар туттардылар.
Халлааммыт бу күн туран биэрэн, үгүс киһи тоҕуоруһа мустан, кыһыны атаарар норуот күүлэйигэр сылдьан, ылбаҕай ырыаларга тэҥҥэ үҥкүүлээн, ыллаһан, сылаас саламаат, миин, плов амсайан, тэриллибит атыы-тутуу арааһыттан атыылаһан, астына дуоһуйа тарҕастылар.
«Дорообо, сандал саас!» кыһыны атаарыы тэрээһиммитигэр үгүс элбэх киһи кэлэн, эр дьоҥҥо аналлаах хамаанданан күрэхтэһиигэ кыттан, үөрэн-көтөн, дуоһуйа сынньанан көхтөөхтүк кыттыбыккытыгар сылаас махтал тылларын аныыбыт, өрүүтүн даҕаны бу курдук бары бииргэ буолуоҕун. Баҕарабыт эһиэхэ, бастыҥ-мааны дьоммутугар, баҕарбыккыт туолуохтун, барыта үчүгэй буолуохтун.
