Муус устар 9 күнүгэр «Дорообо, сандал саас!» кыһыны атаарыы бырааһынньыга бэрт көхтөөхтүк, сэргэхтик, элбэх дьон түмсүүлээх буолан ааста.
Тэрээһин сахалыы сонноох сэгэйэ хаамыынан саҕаланна. Түөлбэ аайыттан сахалыы сонноох Далбар Хотуттар, Эр Хоһууннар киэргэнэн-симэнэн сэлэлии хааман киириилэрэ солун көстүү буолла.
Бүгүҥҥү тэрээһиҥҥэ эрдэттэн биллэриллибит күрэхтэргэ түөлбэнэн, биирдиилээн кыттааччылар, эдэр ыччаттар эрдэттэн бэлэмнэнэн кэлэн үөрэ-көтө кыттан, күрэстэһэн, илин-кэлин түсүһэн сэргэхсийэн тарҕастылар.
Бүгүҥҥү күрэхтэр түмүктэрэ:
1. Кыһыны атаарыы бырааһынньыгар нэһилиэкпит 40 саастарыгар дылы ыччаттар кыттыылаах хамаанданан түөлбэлэр икки ардыларыгар эстафета ыытылынна. Нэһилиэккэ баар 5 түөлбэттэн бүгүҥҥү күрэхтэһиигэ «Лесной» уонна «Нагорнай» хамаандалара күөн көрүстүлэр. Бииртэн биир интэриэһинэй этаптардаах күрэхтэһии элбэх көрөөччү болҕомтотун тардан олус сытыытык ааста. Түмүккэ 8 очколаах «Нагорнай» түөлбэ ыччаттара 1-кы миэстэ, 10 очколаах «Лесной » түөлбэ ыччаттара 2-с миэстэ ылары ситиһэн грамоталарынан, мэтээллэринэн, ИП «Руслан Федотов» маҕаһыынтан сертификаттарынан наҕараадаланнылар.
2. «Сандал Саас иһээр!» темаҕа түөлбэлэр икки ардыларыгар фотозона күрэҕэр түөлбэлэр бииртэн биир кэрэ көстүүлээх фотозона оҥостон дьон кэрэхсэбилин ыллылар. Түмүккэ 1-кы миэстэ «Лесной», 2-с миэстэ «Аартык», 3-с «Сүрэх тыа» түөлбэлэрэ кыайыылаах тахсаннар грамотанан, сэмэй бэлэҕинэн , «Сүрэх тыа», «Сайдыс» түөлбэлэр активнай кыттыыларын иһин грамотанан наҕараадаланнылар.
3. «Саамай улахан, кыраһыабай матрешка» илиинэн оҥоһук күрэҕэр 1-кы миэстэ — Прасковья Мохначевская («Сүрэх тыа» түөлбэ), 2-с миэстэ — Иван Осипов («Лесной» түөлбэ), 3-с миэстэ — Татьяна Цыденжапова («Аартык» түөлбэ) кыайыылаах тахсаннар үөрүүлэрэ үксээтэ.
4. «Амтаннаах алаадьы» сахалар маанылаах аспыт – араастаан астаммыт алаадьы көрүҥүн билиһиннэриигэ түөлбэлэр икки ардыларыгар тэриллибит күрэххэ 33 араас алаадьыны астаан 1-кы миэстэни «Лесной», 30 араас алаадьыны астаан 2-с миэстэни «Аартык», 28 араас алаадьыны астаан 3-с миэстэни «Сайдыс» түөлбэлэр үллэстэн грамотанан, сэмэй бэлэҕинэн, 16 араас алаадьыны астаан «Сүрэх тыа» түөлбэ активнай кыттыытын иһин грамотанан наҕараадаланнылар.
5. «Көрдөөх частушкалар» биирдиилээн толорооччу күрэҕэр 1-кы миэстэни Тамара Дьяконова уонна Елена Стручкова («Сайдыс» түөлбэ), 2-с миэстэни Татьяна Стручкова («Лесной» түөлбэ), 3-с миэстэни Надежда Рожина («Аартык» түөлбэ) ыланнар, грамотанан, сэмэй бэлэҕинэн, активнай кыттыыларын иһин грамотанан Саргылана Катакинова («Сүрэх тыа» түөлбэ), Елена Турантаева («Нагорнай» түөлбэ) наҕараадаланнылар.
6. «Эбээ хаһаастаах сандалыта» хаһаас ас, бэйэ бородууксуйатынан оҥоһуллубут, төрүт аспыт аргыстаах толору астаах сандалы күрэҕэр 3 кыттааччы дэлэй астаах сандалы тэрийэн кытыннылар, дьон-сэргэ сөҕө-махтайа көрдүлэр, ас арааһын амсайдылар, өттүк харалаах, илии тутуурдаах тарҕастылар. Түмүккэ 1-кы миэстэ — Мария Захарова («Аартык» түөлбэ), 2-с миэстэ — Мария Сотникова («Сүрэх тыа» түөлбэ), 3-с миэстэ — Анастасия Куприянова («Лесной» түөлбэ). Кыайыылаахтар грамотанан, сэмэй бэлэҕинэн наҕараадаланнылар.
7. «Сымыыт охсуһуннарыыта» көрдөөх күрэххэ 5 кыттааччыттан 1-кы миэстэни Миша Ноговицын, 2-с миэстэни — Прасковья Дьяконова, 3-с миэстэни — Максим Ноговицын ылары ситиһэн сэмэй бэлэхтэри туттулар.
8. Хамаандалар икки ардыларыгар канат күрэхтэһиитэ бэрт сэргэхтик, ыһыы-хаһыы ортотугар ааста. 1-кы миэстэни — Холбоһуктаах ыччаттар хамаандалара, 2-с миэстэни — «Нагорнай» түөлбэ, 3-с миэстэни «Лесной» түөлбэ ыччаттара ылары ситиһэн, хас биирдии кыттааччы сэмэй бэлэхтэринэн наҕараадаланнылар.
Быйылгы тэрээһиҥҥэ нэһилиэк Женкома (сал. Мохначевская Мария Ивановна) көҕүлээһининэн сүүйүүлээх лотерея уонна винтовканан ытыыга күрэх тэриллибитэ хайҕаллаах.
Ону сэргэ биирдиилээн дьоммут Кычкина М.С., Осипова М.Н., Стручкова Е.И., Рожина Н.Ф., Макарова М.И., Гоголева М.И. уо.д.а. уонна «Бигэ» маҕаһыын (сал.Бродников И.Н.) атыы-тутуу тэрийэн бүгүҥҥү тэрээһиммитин киэргэтэн, ситэрэн-хоторон биэрбиттэригэр махталбытын аныыбыт.
Быйылгы «Кыһыны атаарыы» бырааһынньыкпыт тэрээһиннээхтик, сэргэхтик ааһарыгар күүс-көмө буолан, тэрээһин үлэлэргэ көмөлөспүт түөлбэлэрбит салайааччыларыгар Мордискина А.Н., Стручкова С.С., Катакинова С.Д., Цыпандина Х.А., сахалыы сонноох хаамыыга сэҥээрэн кыттыыны ылбыт бары дьоммутугар, «Арчы» (сал. Рожина Н.Ф.), «Доруобуйа» (сал. Ноговицына М.И.) түмсүүлэр коллективтарыгар, женком председателигэр Мохначевская М.И., нэһилиэк аҕа сүбэтигэр сылаас махтал тылларын аныыбыт. Мэлдьи бу курдук түмсүүлээх, көхтөөх буолуоҕуҥ! Нэһилиэкпит сайдарын туһугар иннин диэки биир сомоҕо буолан эрэллээхтик хардыылаан иһиэҕин!!!
