Бэс ыйын 1 күнүгэр аан дойдутааҕы оҕо көмүскэлин күнүгэр аналлаах тэрээһин буолан ааста. Оҕо оонньуур площадкатыгар нэһилиэкпит кырачааннар, оскуола оҕолоро, төрөппүттэр бары тоҕуоруһа мустан бырааһынньыгы үөрэ-көтө көрүстүбүт.
Оскуола алын сүһүөх үөрэнээччилэрэ ылбаҕай ырыаларынан, тэтимнээх үҥкүүлэринэн тэрээһин үөрүүлээх чааһын ситэрэн, киэргэтэн биэрдилэр.
«Аартык» түөлбэ оҕолоругар анаан тэрийэн ыытыллыбыт уруһуй күрэҕин кыттыылаахтарын, кыайыылаахтарын Александра Николаевна Габышева, Сардана Степановна Стручкова эҕэрдэлээтилэр уонна анал грамоталары, туоһу суруктары, сэмэй бэлэхтэри дохсун ытыс тыаһыгар туттартаатылар.
Бу күн көрдөөх оонньууларга, эҕэрдэ ырыаларга, флешмоб үҥкүүлэргэ оҕолор астына дуоһуйа кытыннылар. Ол курдук «ТОТ ИС» уолаттарга аналлаах арбуз сиэһинин күрэҕэр Захаров Сергей-1 миэстэ, Кулаковскай Жора-2 миэстэ, Ноговицын Харысхан — 3 миэстэни ылары ситистилэр.
«Кустугу ситтэрбиэн» кыргыттарга аналлаах күрэххэ Кычкина Андриана — 1 миэстэ, Харитонова Сайнаара — 2 миэстэ, Ноговицына Санита — 3 миэстэни ылан үөрдүлэр-көттүлэр.
«Самокатынан сүүрүү» күрэхтэһиитигэр Андросова Амелия соҕотоҕун бэлэмнэнэн кэлэн анал бирииһинэн наҕараадаланна.
Ону таһынан араас көрдөөх оонньууларга көхтөөхтүк кыттан кыайыылаах тахсыбыт оҕолор бары сэмэй бириистэринэн наҕараадаланнылар.
Аан дойдутааҕы оҕо көмүскэлин күнүгэр аналлаах тэрээһиҥҥэ оҕолор астына дуоһуйа ыллаан-туойан, үҥкүүлээн, бэһиэлэйдик оонньоон-көрүлээн, сэргэхсийэн тарҕастылар.
