Арассыыйа норуоттарын култуураларын үйэлээх баайын эбийиэгин – саха төрүт үҥкүүтүн «Оһуохайы» харыстыыр уонна тарҕатар сыаллаах Саха Өрөспүүбүлүкэтин Ил Дархана Айсен Сергеевич Николаев 2023 сыл балаҕан ыйын 7 күнүгэр 2968 нүөмэрдээх ыйаахха Оһуохай күнүн олохтуур туһунан илии баттаабыта. Оһуохай күнэ сылын ахсын ыам ыйын 25 күнүгэр бэлиэтэнэр буолуоҕа. Бүгүн Республикабыт үрдүнэн бу бэлиэ күн аан маҥнайгынан бэлиэтэнэр. Ол чэрчитинэн олохтоох култуура дьиэтигэр «Бары бииргэ — Оһуохайга!» — диэн оһуохай күнүгэр аналлаах тэрээһин буолан ааста.
Үөрүүлээх тэрээһиҥҥэ кэлбит ыалдьыттары олохтоох култуура дьиэтин үлэһиттэрэ сылаас алгыстаах алаадьынан үөрэ-көтө көрүстүлэр.
Оһуо-оһуо оһуокай, оһуокайдыыр оһуокай, эһиэ-эһиэ эһиэкэй, эһиэкэйдиир эһиэкэйи, чэйиҥ эрэ доҕоттоор, куоласпытын эрчийэн, дорҕоонноохтук көхтөөхтүк, туойа ыллаан саҕалыаҕын диэн туран оһуохай түһүлгэтэ тэрилиннэ. Оһуохайы таһаардылар: Гоголев Роман Иннокентьевич – Мэҥэ-Хаҥалас улууһун уус –уран оҥоһуктарын норуотун маастара, уус-уран самодеятельность ветерана, Харитонова Марфа Александровна — Чөмчүүнэ — «Иэйии кытыла» литературнай түмсүү чилиэнэ, уус-уран самодеятельность ветерана, Стручкова Елена Ивановна – «Звездочка» оҕо уһуйаанын физкультураҕа уонна муусукаҕа дьарыктарын салайааччыта, Саха Республикатын үөрэҕин туйгуна, Долгунова Лилия Васильевна – култуура дьиэтин специалиһа.
Үгэскэ кубулуйбут, үйэлэргэ умнуллубат умсулҕаннаах оһуокай олохтоно туруохтун! Бары кыттыбыт бар дьоммутугар баҕарабыт ыстаал курдук кытаанах доруобуйаны, дьолу – саргыны, алгыс курдук амарах санааланыҥ, эҕэрдэ курдук эйэҕэс сүрэхтэниҥ! Айар дьулуурдаах, алгыс аргыстаах маннык үтүө түгэннэр Балыктаахха биһиэхэ мэлдьитин буола турдуннар! Бары этэҥҥэ буолуоҕуҥ!
