Бэс ыйын 21 күнүгэр тэриллибит «Мэҥэ нэһилиэгэ» МТ төрүттэммитэ 65 сылыгар аналлаах Үрүҥ тунах ыһыах чэрчитинэн «Аймахтардыын алтыһан түһүлгэни төрүттүөҕүн!» куйаар ситиминэн ыытыллыбыт дьиэ кэргэнинэн хаартыска күрэҕэр барыта 5 дьиэ-кэргэн кыттыыны ыллылар.
Күрэх түмүгүнэн 1 миэстэҕэ — Людмила Михайловна, Иван Иванович Мохначевскайдар дьиэ кэргэн таҕыстылар. Кинилэргэ норуот маастара, иистэнньэҥ, үлэ ветерана, Мэҥэ-Хаҥалас сыанатын ветерана Елена Семеновна Кычкина — Иванова аатынан анал бириис — ДНС цифровой уонна бытовой техника маҕаһыыныгар 15000 солкуобайдаах подарочнай сертификат туттарылынна. Бирииһи олохтоотулар: Елена Семеновна кыргыттара, бииргэ төрөөбүттэрэ, кинилэр оҕолоро. 2 миэстэ — Мараҕа сайылыгын олохтоохторо уонна кинилэргэ тыыл, үлэ ветерана, Саха АССР 3 ыҥырыылаах Верховнай сэбиэтин депутата, дьахталлартан бастакы тракторист, сэрии сылларыгар «Үлэҕэ килбиэнин иһин» «И.В. Сталин» мэтээллэринэн наҕараадаламмыт, Мэҥэ-Хаҥалас улууһун «Мастер — умелец» бэлиэ хаһаайката Баишева Марфа Яковлевна аатынан анал бириис — многофункциональнай иистэнэр массыына туттарылынна. Бирииһи олохтоотулар: оҕолоро, сиэттэрэ Стручковтар, Баишевтар, Алексеевтар, Павловтар. 3 миэстэ — Кычкин Николай Гаврильевич дьиэ кэргэнэ уонна кинилэргэ бастакы тырахтарыыс, «Аляска — Сибирь» аэродром кыттыылааҕа, ВДНХ быыстапкатын кыттыылааҕа, оройуон сэбиэтин депутата, Саха АССР бастыҥ ыанньыксыта Ноговицына Мария Федотовна, үлэ ветерана, ВДНХ быыстапкатын кыттыылааҕа, коммунистическай үлэ ударнига Максимова Мария Федотовна, эдьиийдии-балыстыы Анна, Мария Федотовналар ааттарынан анал бириис туттарылынна — сахалыы иһит набора. Бирииһи олохтоотулар: оҕолоро, кийииттэрэ, күтүөттэрэ, сиэннэрэ, хос сиэннэрэ.
Активнай кыттыыларын иһин туоһу суругунан бэлиэтэнниллэр: Варвара Михайловна, Анатолий Васильевич Лихондилар дьиэ-кэргэн уонна Мария Иннокентьевна Гоголева. Махтал истин тылларын аныыбыт күрэх бука бары спонсордарыгар уонна кыттыыны ылбыт дьиэ кэргэннэргэ. Куруук маннык активнай позициялаах инники күөҥҥэ сылдьаргытыгар, чэгиэн буолун, доруобай буолун.
